Matthai 26 - Zanniat Bible

Jesuh Sualsihnak

¹ Hemi thute Jesuh in a zirh ben fangin a hnuahlunte hnenah,

² “Ning linghnak bangin tun hnua ni hnih ah Kansuak Puai i tuh hang ai Mi Fapa heh thinglamteh vumah khen tuhin pe tuh i,” tiin ti i.

³ Cen suangbawi upate le a dang upate tu Suangbawi Sang Caiaphas inn ah tawk dun tlang ai,

⁴ Jesuh heh pom ai rek tuhin a thupruk in tawlrel tlang i.

⁵ “Puai song ahcen rek tuh lo ising, mizapui buai pang fangin,” ti tlang i.

Bethany Ah Jesuh Yihmui Burhhnak

⁶ Jesuh tu Bethany khua, phar ur a tuar awngtu Simon inn ah um ai,

⁷ rong a ai laitak ah nupang pakhat a hnenah kawi ai alabaster thawl dim in a mankhung yihmui a kenghnak heh Jesuh lu ah burh i.

⁸ Ciami tu a hnuahlunte in hmu fangin a thinraw tlang ai, “Pamhmaih ze aw!

⁹ Hemi yihmui tu tangka tampui in zuar selai a man heh mifarah pe tuh sawnhnak napui i,” ti tlang i.

¹⁰ Ciatih ai a tihnak tu Jesuh in a za fangin anite hnenah, “Zaimanin he nupang nu tu hnaihnok hnelhno i si? Kaimah caah a bawnhnak heh thil pha le thil mawi ngai i.

¹¹ Mifarah tu ning hnenah um tuh ṭio i, ikhalselai kai tu ning hnenah um tuh ṭio lo ing.

¹² I vumah yihmui a burhhnak heh i luang vui tuhin a pai cia i.

¹³ Thutak ning rel ing: Thuthangpha a relhnak hmun lailung vum khuahacang ah he nu ai bawnhnak heh amah hai lohnak ah rel tuh ṭiode i,” tiin ti i.

Judas In Jesuh Zuarhnak

¹⁴ Cen hnuahluntu lakai pakhat Judas Iskariot tihnak tu suangbawi upate hnenah feh ai,

¹⁵ “Ning hnenah Jesuh ning pe lengkhaw ziang i pe tuh i si?” tiin zawt i. Anite in tangka sawmthum siar ai Judas pe i.

¹⁶ Cia nia ai panin Jesuh zuar thil tuhin Judas in can pha lek iang in um i.

Kansuak Puai Rong Aihnak

¹⁷ Col tello sang Puai ni hmasaber nia ah hnuahlunte tu Jesuh hnenah kawi tlang ai, ‘A konteng ah Kansuak Puai rong aihnak na bawn sah tuh i ing?” tiin zawt i.

¹⁸ Ani in, “Khuapui song mi pakhat pa ai inn ah feh tu ilai ‘Sayapa in i tikcucan khim zo i; i hnuahlunte thawn na inn ah Kansuak Puai bawn tuh i ing, ti i,’ ti ta tu ih,” tiin ti i.

¹⁹ Jesuh relhnak bangin hnuahlunte in Kansuak Puai zanfak ai tuh pai tlang i.

²⁰ Zan lamah Jesuh le a hnuahlunte tu rong ai tuhin to tlang i.

²¹ Zanfak ai laitak ah, “Fiang ngai in ning rel ing: ningmah lakah pakhat in i zuar tuh i,” tiin ti i.

²² Hnuahlunte tu lungsia tlang ngai ai pakhat hnua pakhat in, “Bawipa, kaimah ing maw?” tiin ti tlang ṭen i.

²³ Jesuh in, “Kaimah thawn hleng khat songai sang a purtu in i zuar tuh i.

²⁴ Lai Thianghlim ai relciahnak bangin Mi Fapa heh thi tuh i, ikhalselai Mi Fapa a zuartu pa tu a hmai lam a pit ze i! Ciami pa tu a nu ai pum songin suak loin um ta sawn selai pha tuh sawn napui i!” tiin ti i.

²⁵ Mi zuartu Judas in, “Sayapa, na ti nuammi tu kaimah ing maw?” tiin zawt i. Ciafangin Jesuh in, “Nangmah in rel zo i si,” tiin sawn i.

Bawipa Ai Zanfak

²⁶ Rong ai tlang laitak ah Jesuh in sang lang ai saw a ngen hnuaah khan ai a hnuahlunte hnenah pe i. “Lang tu ilai ai tu ih; hemi tu i taksa i,” tiin ti i.

²⁷ Cia hnuaah khuat lang ai Pathian hnenah anghnak thu a rel hnuaah anite hnenah pe i, “Ning veksen in ding tu ih;

²⁸ Hemi tu i thisan i. Pathian thukham khoruaitu le mi tampui sualngaithiamhnak hrang ai luangruaihnak thisan i.

²⁹ Fiang ngai in ning rel ing: i Pa ai Ukhnak songah ningmah thawn cabit thar i ding leh hlanlo he cabit heh ding tuh nawn lo ing,” tiin ti i.

³⁰ Cen la sa tlang ai Olive Mual ah feh tlang i.

Peter Ai Elhnak Thu Relcia I

³¹ Cen Jesuh in anite hnenah, “Tun zan rori ah ning veksen in tlan tuh sio ai kaimah lek i hlum tuh i si; zaimantifangin Lai Thianghlim in ‘Pathian in tuukhal heh rek tuhai tuurualte tu piak tuh sek i,’ ti i.

³² Ikhalselai thihhnak in I thoruai leh fanginGalilee ah ning hmaiah feh tuh ing,” tiin ti i.

³³ Peter in Jesuh hnenah, “Midang tlan sek khalselai kai tu tlan tuh lo ing,” tiin ti i.

³⁴ Jesuh in Peter hnenah, “Thutak ning rel ing: Tun zan ar a khuang hlanah ‘Ani tu ling lo ing,’ tiin vel thum tian i pheh tuh isi,” tiin ti i.

³⁵ Peter in, “Nang mah thawn thi kawm tuhin rin na pheh tuh lo ing,” ti i. A dang hnuahlunte inkhai ciatihin ti tlang ṭen i.

Gethsemane Vuan Ah Sawngen I

³⁶ Cen Jesuh tu a hnuahlunte thawn Gethsemane tihnak vuan ah feh tlang ai anite hnenah, “Khiata ah saw i ngen songah heta ah lo to tu ih,” tiin ti i.

³⁷ Peter le Zebedee ai fapate pahnih fehpui i. A lungsia ai a thin nuam lo i.

³⁸ Cen anite hnenah, “I thinlung tu lungsiahnak in dim ze ai a khoi tuh sek bangin i um i. Heta ah um tu ilai mitmu loin i iang tu ih,” tiin ti i.

³⁹ A hla thah hmunah feh ai laipua lakah bok in, “I Pa, cang thil lekhaw he tuarhnak khuat in i luatruai tu hram law! Ikhalselai kaimah daihhnak bangin i maseh, na daihhnak bangin cang tuseh,” tiin sawngen i.

⁴⁰ Cen hnuahlunte pathum hnenah a let fangin anite pathum in mitmu tlang khiah hmu ai Peter hnenah, “Akontih in it loin nazi pakhat song tengtal iang ben lo i si?

⁴¹ Sualsawmhnak songah tla tuh loin mitmu loin sawngen tu ih. Thinlung in tu nuam napui taksa tu a thazang niar i,” tiin ti i.

⁴² Jesuh tu feh lehthio ai sawngen lala i. “I Pa, he khuat in luat thil loin ding kul tuh tengteng ilengkhaw na daih bangin cang tuseh,” ti i.

⁴³ Hnuahlunte pathum hnenah let ai mitmu tlang thotho i; mit thak ben tlang tau lo i.

⁴⁴ Jesuh in hlum leh ai a ngen kel in a vel thumhnak sawngen i.

⁴⁵ Cen hnuahlunte pathum hnenah let ai, “Mitmu ai cawlum tlang lai i sim? Sik tu ih! Mi Fapa tu misualte kut songah hlengruaihnak can hleng zo ihang.

⁴⁶ Tho tu ilai feh ngasing. Sik tu ih, i zuartu pa tu heta ah hleng zo ihang,” tiin ti i.

Jesuh Pomhnak

⁴⁷ Jesuh a pong hnelhno laitak ah hnuahlunte hlaihnih lakah a teltu ve Judas hleng i. Amah thawn hmunkhat ah suangbawi upate le Judah mi a dang upate ai hlathnak miburpui heh ralvang le tumbelte awh in kawi tlang i.

⁴⁸ Mi zuartu in miburpui hnenah lingthiamhnak rel cia ai, “I thut tuhhnak pa tu ning pom nuamhnak pa i ai pom tu ih,” tiin ti i.

⁴⁹ Judas in Jesuh nong ah kawi vurvo ai, “Sayapa, na vumah daphnak um tuseh,” a ti kong in thut i.

⁵⁰ Jesuh in, “I rual, na tumhnak bawn tu taito hang,” tiin ti i. Cen miburpui hleng tlang ai Jesuh a pom hnuaah kho ngai in pen tlang i.

⁵¹ Jesuh thawn a umtu lakah pakhat pa in a ralvang phok ai Suangbawi Sang ai sal pa heh a bil sat ai tlok i.

⁵² Ciafangin Jesuh in, “Na vang a kawng songah thun leh tu. Ralvang a hmangtu heh ralvang in thi tuh ve i.

⁵³ I Pa hnenah bawmhnak ngen inglai cia sawngpah in vancungmi ralkap bur hlaihnih tah tam hlat thai i ti khiah ling lo isim?

⁵⁴ Ikhalselai cia bangin iselai Lai Thianghlim in cang tuh i ti ai a relciahnak akontih in khim thil tuh i?” tiin ti i.

⁵⁵ “Cen Jesuh in miburpui heh, “Kai tu ruko ing maw, ralvang le tumbelte thawn i pom tuhin kawi tlang lianglo i si? Nisiar in Biakinn ah to ai thu ning zirh laiah aisu inkhai i pom fawn lo i si.

⁵⁶ Ikhalselai prophette in Lai Thianghlim songai nganhnak a khim thil tuhin he bangin a canghnak i,” tiin ti i. Ciata in hnuahlunte in hlum ai tlan tlang sio i.

Thureltu Hmaiah Suahpui I

⁵⁷ A pomtute in Jesuh tu Suangbawi Sang Caiaphas inn ah fehpui tlang ai ciata ah Danthiam mite le Judah upate taikhawm tlang i.

⁵⁸ Peter in a hla thah in Suangbawi Sang ai tualvan tian hlun i. Tualvan ah lut ai zaibang in thil cang tuh ini ti sik nuam in ralviltute hnenah to i.

⁵⁹ Suangbawi upate le Council upate tu Jesuh a rek thil thai tuhin sual si tlang i.

⁶⁰ Thudonrel in a mawhhnak situ tampui suak tlang napui a sualhnak hmu thil tlang cuanglo i. A tawphnak fangin mite pahnih suak kawm ai,

⁶¹ “Hemi pa in Pathian Biakinn heh kaimah in bal tuhai ni thum ah sa ben leh tuh ing,’ ti i,” tiin ti kawm i.

⁶² Ciafangin Suangbawi Sang ding ai Jesuh heh, “Hetihin sual na puh heh a sawn tuh pha ling lo i sim?” tiin zawt i.

⁶³ Ikhalselai Jesuh tu dap niu in um i. Cen Suangbawi Sang tu pong lehthio ai, “A nungmi Pathian hming sal in cukcam in na ti ing: Pathian ai fapa Messiah i maw ilo isi, rel tucuk,” tiin ti i.

⁶⁴ Jesuh in, “Nangmah in rel zo isi! Ikhalselai thungai in ning rel ing: tunai panin Mi Fapa in cungnungber ai kiahhan lamah a to in hmu tlang tuh i si, cen vancung mairo vuman a kawi khai hmu tlang tuh i si,” tiin ti i.

⁶⁵ Cia sawngpah in Suangbawi Sang in a hnikpon zik ai, “Ciami tu Pathian thangsiat i! Thulingtu dang kin kul nawn lo i. Pathian a thangsiat zia heh tunin ling tlang zo i si!

⁶⁶ Akontih in ruat i si?” tiin zawt i. Anite in, “Mawh rori i, a rek tlak i,” ti tlang i.

⁶⁷ Cen a hmaiah cil thuih tlang ai vit in beng tlang i. Cen a bengtute in,

⁶⁸ “Aw Messiah, prophette bangin kin rel tucuk law! Na bengtu aisu i!” tiin ti tlang i.

Peter In Vel Thum Tian Jesuh Hnawl I

⁶⁹ Peter sumpua tualvan ah a to lakah Suangbawi Sang ai hnenum naupang pakhat kawi ai, “Nangmah khai Galilee mi Jesuh thawn a pawlduntu isi,” tiin ti i.

⁷⁰ Ikhalselai Peter in mizapui hmaiah el ai, “Na ponghnak tu ziang thu i ti ling lo ing,” tiin sawn i.

⁷¹ Cen Peter tu kotka lamah feh i. Hnenum nupang a dang in hmu ai, “Hemi pa tu Nazareth mi Jesuh thawn a umtu i,” tiin ciata ai a umtu mizapui hnenah ti i.

⁷² Peter in el lala ai, “Cukcam in rel ing: Hemi pa heh i mi lin ilo i,” ti i.

⁷³ A rai hlanah ciata ai a dingtute in Peter heh, Pheh duh mah, nang khai a anite hnenah a teltu isi. Na kamsem in na lar i,” tiin ti tlang i.

⁷⁴ Cen Peter in, “Cukcam in thudik rel ing. Thudik lo rel lengkhaw Pathian in i cawh tuseh! Hemi pa heh ling hrimhrim lo ing,” tiin ti i. Ciaben sawng fangin ar khuang ai,

⁷⁵ Peter in Jesuh ai a relciahnak, “Ar khuang hlanah ling lo ing, tiin vel thum tian i pheh tuh isi,” a tihnak hih leh ruangro i. Peter tu sumpua ah suak ai a thin ur roh in kap i.