Matthai 25 - Zanniat Bible

Fenu Sawmkhat Santehhnak

¹ Jesuh in, “Ciami can ah vancung Ukhnak heh mohoitu pa hmuak tuhin a maikhuat thawn a fehtu fenute pahra bang i tuh i.

² Ciami fenu pahra songah pangate tu voi ai a dang pangate tu fim i.

³ Fenu voite tu maikhuat keng napui yinan keng hal tlang lo i.

⁴ A fim mite tu maikhuat dim in yinan keng tlang i.

⁵ Mohoitu pa a hleng khuahnua manin fenute tu sing ai mitmu tlang i.

⁶ “Zan seulai fangin, ‘Mohoitu pa hleng i! Tho tu ilai hmuak tu ih,’ ti ai authawm thang i.

⁷ Fenute pahra tu tho ai maikhuat var tuhin pai tlang i.

⁸ Cen fenu voite in fenu fim mite hnenah, ‘Kin maikhuat hmit bengbo i, ning yinan kin khan tu ve ih,’ tiin ngen tlang i.

⁹ Fenu fim pawl in, ‘Cang tuh lo i, ning ceem tuhin yinan keng lo i ing. Dawr ah feh tu ilai lai ta tu ih,’ tiin ti tlang i.

¹⁰ Ciamanin fenu voite tu yinan lai tuhin dawr ah feh tlang i; amahte a feh songah mohoitu pa hleng i. Ralring niu in a um cia mi fenute panga tu mohoitu pa thawn mo hoihnak puai songah lut ai dawngkham kham tlang i.

¹¹ “Cia hnuaah a dang fanute hleng tlang ai ‘Bawipa, Bawipa, dawngkham kin hon tu hram law,’ tiin au tlang i.

¹² Thutak ning rel ing: ning tu ning ling lo ing,’ tiin mohoitu pa in ti i,” tiin rel i.

¹³ Jesuh in, “Ciatihin a ni le a can ning ling lo manin ralring in iang tu ih,” tiin a tawphnak ah ti i.

Hnenumte Pathum Santehhnak

¹⁴ Jesuh in, “Cia can ah vancung Ukhnak tu he bangin i tuh i. Vaikhat laiah mipa pakhat um ai khual tlawng tum i. A feh hlanah a hnenumte ko ai a thilrite kilkhawlruai i.

¹⁵ Amahte thil tibenhnak zah ṭen in anite hnenah pe i: pakhat pa hnenah sui tangka thawng nga pe i, a dang pakhat hnenah thawng hnih pe ai a dang pakhat hnenah thawng khat pe i. Cia hnuaah khual tlawng i.

¹⁶ Sui tangka thawng nga a ngahtu hnenum pa tu ciasawng pah feh ai sumpai ai amiat thawng nga ngah i.

¹⁷ Cia bangin thawng hnih a ngahtu pa khai a miat thawng hnih ngah ve i.

¹⁸ Ikhalselai thawng khat a ngahtu pa tu feh ai khur a co hnuaah a bawipa ai tangka heh phum i.

¹⁹ “Can raipui hnuaah a bawipa tu let ai a tangka hmangdan thula fiangruai tuhin relkhawm tlang i.

²⁰ Thawng nga a ngahtu pa tu kawi ai a miat thawng nga pe i. ‘Bawipa thawng nga i pe awng i si. Sik tu! Heta ah a miat thawng nga i ngahhnak khai na pe ing,’ tiin ti i.

²¹ A bawipa in, ‘Hnenum pha, rinsantlak na imanin tampui kilkhawltu ah na bawn tuh ing. Kawi tulai na bawipa anghnak songah tel tu ve law,’ tiin ti i.

²² Cen thawng hnih pehnak pa kawi ai ‘Bawipa na pe awnghnak thawng hnih i, Sik tu! Heta ah a miat i ngahhnak a dang thawng hnih khai um i,’ tiin ti i.

²³ A bawipa in, ‘Pha i, hnenum pha le rinsantlak hnenum i si. Tlawmniu vumah rinsantlak na imanin tampui kilkhawltu ah na bawn tuh ing. Kawi tulai na bawipa anghnak songah tel tu ve law,’ tiin ti i.

²⁴ Cen thawng khat ngahtu pa lut ai ‘Bawipa, nang tu mi ti fekfek isi ti na ling ing; na pawi lohnak ah a thai khawm ai na vorh lohnak ahkhai rong khawm i si.

²⁵ Ciatih imanin na kih ai na tangka heh laipua songah phum ing. Sik tu! Heta ah um hlen i,’ tiin ti i.

²⁶ Ciafangin a bawipa in, ‘Nang hnenum pha lo, thazawng pa! Hlaici i pawi lohnak ah at ai i vorh lohnak ah khawm heh ling taktak isim?

²⁷ Ciatih ilekhaw zaimanin tangka tu i let fangin tangka khang thawn i ngahthilhnak tuhin tangka dahhnak ah zaimanin dah lo isi?

²⁸ Hetih imanin he pa hnenai tangka heh lang tu ilai thawng hra a naitu pa hnenah pe tu ih.

²⁹ Zaimantifangin a naitute tu pe bet tuhai a hlaifuan in nai tuh i. Ikhalselai zaikhai a nai lotu pa hnenin a naihsun niu khai lang sah tuh i.

³⁰ Hemi hnempuihnak nai lo pa heh sumpua khuathim hmunah lon tu ilai ciata ah kap le rung in a kamriat tuseh,’ tiin ti i.

Hnuataber Thukhanhnak

³¹ Jesuh in, “Mi Fapa tu kumpibawi bangin a songlawihnak le vancungmi hmuahhmuah thawn a hleng fangin kumpibawi tohkham vumah to tuh i.

³² Miphun hmuahhmuah a hmaiah khawm tuh sio i. Cen tuukhal in tuu le me a khan bangin mi zongzong thukhan tuh i.

³³ Miphate tu a kiahhan lamah dah tuhai hrokhrawl mite tu a kekeh lamah dah tuh i.

³⁴ Cen kumpibawi in kiahhan lamai a umtute hnenah ‘Kawi tu ih, i Pa ai hmuifu a pe mite! Kawi tu ilai laivum sem ngom in ning caah a remmciahnak vancung Ukhnak heh co tu ih.

³⁵ Zaimantifangin ri i kam fangin aih tuh rong i pe i si; ti i hal fangin din tuh ti i pe i si; mikhual i cang laitak ah ning inn ah i tlungruai i si;

³⁶ hnikpon i nai lo fangin hnikpon i pe i si; i ur fangin i tuamhlawm i si; thawng i to fangin i fan i si,’ tiin ti tuh i.

³⁷ Cen midikcangte in, ‘Bawipa zaikom ah rikam na hmu ai rong na pe i ing; tihal na hmu ai ti na pe i ing?

³⁸ Zaikom fangin mikhual cang na hmu ai kin inn ah na tlungruai i ing; ihlahle hnikpon nai lo manin hnikpon na pe i ing?

³⁹ Zaifangin na ur ai thawng to na hmu in na fan i ing? tiin ti tlang tuh i.

⁴⁰ Kumpibawi in, ‘Thutak ning rel ing: he i unaute lakah nauta ber vumah ning bawnhnak heh i vumah bawn i si,’ ti tuh i.

⁴¹ Cen a kekeh lamai a umtute hnenah ‘Ning, Pathian ai cukcam mite, i hnenin tlan tusek ih. Satan le a hnuahlunte caah ruatciahnak a hmit awng lo maipui songah feh tu ih.

⁴² Zaimantifangin ri i kam teng ah rong i pe lo i si; ti i hal napui ti i pe lo i si;

⁴³ mikhual i awng laiah ning inn ah i tlung siang lo i si; hnikpon i nai lo laitak ah hnikpon i pe lo i si,’ tiin ti i.

⁴⁴ Cen anite in ‘Bawipa, zaikom fangin ril na kam i, ti na hal i, mikhual i si, hnikpon nai loin um i si, na ur ai thawng to na hmu fangin na bawm awng lo i ing?’ tiin ti tlang tuh i.

⁴⁵ Kumpibawi in, ‘Thutak ning rel ing: mi nauta ber pakhat bawm ning nuam lo khiah, kaimah i bawm nuam lo i si,’ ti tuh i.

⁴⁶ Cia hnuaah ciamite tu kumzangza cawh hmunah feh tuhai mi dikcangte tu kumkhua nunhnak ah feh tuh i,” tiin ti i.