Matthai 24 - Zanniat Bible

Biakinn Hnawm Tuhhnak Thu

¹ Jesuh tu tho ai Biakinn in a feh laiah a hnuahlunte a hnenah kawi tlang ai Biakinn sadan a mak zia khiah relpui i.

² Jesuh in, “I, hemite heh sik tu ih. Fiang ngai in ning rel ing: he lungto pakhat rin he a umhnak kelah um leh tuh nawn lo i; a veksen in bal tuh sio i,” tiin ti i.

Harsahnak Le Reemhnak Thu

³ Jesuh tu Olive mual vumah a to laiah a hnuahlunte a thupniu in a hnenah kawi tlang ai, “Hemi thil tu zaikom fangin cang tuh i? Cen na hleng leh can le san bohnak larruaitu ziang thil um tuh i, kin rel tu?” tiin zawt tlang i.

⁴ Jesuh in, “Ralring tu ih, aisu inkhai ning zawl maseh.

⁵ Mi tampui i hming in kawi tuhai, “Kai tu Messiah ing,’ tiin ti tuhai mi tampui zawl tuh i.

⁶ A nong ah ituseh, a hla ah ituseh, raltawnghnak thawmvang za tuh i si, ikhalselai a tawphnak hleng ihang tihnak ilai lo i.

⁷ Ramkhat le ramkhat, peng khat le peng khat tawng dun tuh i. Laivum nuamhmuncang ah rian le hlinhlin um tuh i.

⁸ Ciabang thilte tu naukai ur pan thawn bang tuh i.

⁹ Cen ning pom tuhai cawh tuhin le rek tuhin mi kut ah ning hlen tuh i. Kaimah manin miphun cangcang in ning hua tuh i.

¹⁰ Ciafangin mi tampui in amahte sanghnak hlum tuh i. Pakhat le pakhat zuar dun tuhai hua dun tuh i.

¹¹ Cen prophet khel tampui suak tuhai mi tampui zawl tuh i.

¹² Sualhnak pungzai tuhai mi tampui ai ithnak tu ṭumsuk tuh i.

¹³ Ikhalselai a tawphnak tian kho ngai in a dingtu heh ohnak ngah tuh i.

¹⁴ Cen miphun hmuahhmuah ai ling thai sio in he vancung Ukhnak Thuthangpha heh laivum khuahacang ah phuang tuh i. Cia hnuaah a tawphnak i tuh i.

Tihikkul Thil Ningrim

¹⁵ Prophet Danel in a relciahnak, ‘Tihikkul Thil Ningrim,’ hmu tuh i si. Ciami Thil Ningrim heh hmun thianghlim ah ding tuh i. (Hemi lai a siartu: a rel nuamhnak heh lingthiam tu).

¹⁶ Cen Judea ramai a umtute tu mual vumah tlan tuseh.

¹⁷ A inn phu ai a ummi tu innsong thilri lang tuhin tolh maseh.

¹⁸ Lo ai a umtu pa in a pon lang tuhin tlung maseh.

¹⁹ Cia can le cia nia ah nupang naupai le nau awkmi nupangte caah zaitlukin har tuh i.

²⁰ Khuasik cu le Sabbath nia ngelcel ah thinlau in ning tlan dekdo lohnak tuhin Pathian hnenah sawngen tu ih!

²¹ Zaimantifangin laivum a panin tunnia tian a hlenghnak a kihkul harsahnak tahin a kihkul sawn hleng tuhai ciabang a kihkul harsahnak tu tun hnuaah khai hleng tuh nawn lo i.

²² Ciami tikcucan tu Pathian in comruai lo selai aisu khai luat tuh lo i. Ikhalselai Pathian in a ril mite caah a can tu comruai tuh i.

²³ Cen mi pakhat in, ‘Sik tu ih, heta ah Messiah um i,’ ihlahle ‘Khiata ah um i,’ tiin ning ti lekhaw sang mah ih.

²⁴ Zaimantifangin Messiah khel le prophet khel pawl suak tuhai khuaruahhar le ngaihsunurkul mak ngaingai bawn tlang tuhai a cang thiltawp in Pathian ai ril cia mite rin zawl tuh i.

²⁵ Hih tu ngio ih! A hlanvom in ning rel cia ing.

²⁶ “Mi in, ‘Sik tu ih, Hampalak ah um i,’ ning ti lekhaw feh mah ih, ‘Heta ah relh i,’ ti lekhaw sang mah ih.

²⁷ Zaimantifangin nisuah lamin nitlak lam tian vantlingtleleuh a tleu zutzo bangin Mi Fapa khiah hleng tuh i.

²⁸ “Mithi luang umhnak cangcang ah langtar khawm tlang tuh i.

Mi Fapa Hlenghnak Tuh

²⁹ Ciami harsahnak can a hleng hnuaah ni thim tuh i, hlapui tleu tuh nawn lo i, van in arsite tlok tuhai van ai a ummi hathnak huhamte tu amahte vakhnak lampui in pial tuh sek i.

³⁰ Ciafangin Mi Fapa hleng tuh hnikhnaihhnak van vumah lar tuh i. Mi Fapa tu van mairo vuman huham le songlawihnak lianpui thawn a kawi hmu tlang tuhai laivum miphun cangcang kap tlang tuh i.

³¹ Thirhlung cawm ngai in tum tuhai laivum ningli ah vancungmite hlat tuh i; vanham khat lam tong in khat lam tong tian ai a ummi a ril cia mite hmunkhat ah khawm tuh i.

Thaikung In Zirhnak

³² Thaikung thula in fimhnak ning zirh tuseh. Thaikung khiah a kakte hing ai a hnah dawn niuniu khai a mem fangin khuakhal cu nong ihang tiin ling thil i si.

³³ Ciabang pah in he thil hmuahhmuah ning hmu fangin a can nong ze hang ai hleng cing tuh ihang ti ling tu ih.

³⁴ Hih tu ih: tun san ah a nung laimi hmuahhmuah a thi tlang sek hlanah he thil hmuahhmuah heh khim tuh sio i.

³⁵ Lai le van tu bo tuh napui i ponkam tu bo tuh awng lo i.

Aisu Inkhai A Can Ling Lo I

³⁶ Ciami nia le can heh van ai a umtu vancungmi in ituseh, Fapa in ituseh, aisu inkhai ling lo i; Pa ian in ling i.

³⁷ Noah san laiah thil a canghnak bangin Mi Fapa a hleng can ah cang tuh ve i.

³⁸ Tilawi a tlung hlanah minungte tu ai le ding in nupui hoi ai pasal nai tlang i; Noah lawng song a lut nia tian nuam roh in um tlang i.

³⁹ Ciatihin tilawi in a lan sek hlan tian ziang cang tuh i, ti aisu inkhai ling tlang lo i. Ciabang thotho in Mi Fapa a hleng fangin khai cang tuh i.

⁴⁰ Ciami can a hleng fangin lo ah mite pahnih naper kawm tuhai pakhat tu lang tuhai pakhat tu hlum tuh i.

⁴¹ Nupangte pahnih sum ruan dun tuhai pakhat tu lang tuhai pakhat tu hlum tuh i.

⁴² “Ciamanin ralring in um tu ih; zaimantifangin zaikom ah ning Bawipa hleng tuh i ti ling lo i si.

⁴³ Inn naitu pa in ruko a kawi tuh can ling selai mitmu loin kil tuhai ruko pa in a inn bal in lut thil tuh lo i, ti khiah ning linghnak i.

⁴⁴ Ciamanin ralring ngai in um tu ih, zaimantifangin Mi Fapa tu ning ralring lo can ah hleng tuh i.

Hnenum Fel Le Fel Lo

⁴⁵ “Ciatih ilekhaw aisu ber rintlak le hnenum fim i tuh i? Rintlak le hnenum fim tu a bawipa in a dang hnenumte hotu ah ṭuanvo pe ai a can hmanniu in a pe thaitu pa i tuh i.

⁴⁶ Phantakniu in a naper a per lakah a bawipa let lekhaw cia hnenum pa tu ang tuh i?

⁴⁷ Thutak ning rel ing: cia hnenum pa tu a bawipa in a thilri hmuahhmuah kilkhawltu ah dah tuh i.

⁴⁸ Ikhalselai hnenum fel lomi ilekhaw, i bawipa tu tlung tuhlai lo i, rai tuhlai ngawn i, tiin ti tuhai,

⁴⁹ a dang hnenumte khiah zohsuam in vit tuhai zurite thawn ai le ding in um tlang tuh i.

⁵⁰ Cen a bawipa tu a rin lo nia le a ling lo can ah mangrinlo in let tuh i.

⁵¹ A bawipa in ciami pa tu hnawt tuhai mi phalaktla pawl umhnak hmunah kuat tuh i; ciata ah kap le rung in kamriat tuh i,” tiin ti i.