Matthai 23 - Zanniat Bible

Jesuh In Ralringhnak Pe I

¹ Jesuh in misenpui le a hnuahlunte hnenah thurel i.

² “Danthiam mite le Farasite heh Moses pehnak dan a relfiangtu tuh i.

³ Ciamanin anite relhnak hmuahhmuah heh ningmah in bawn tuh le hlun tuhhnak i si, ikhalselai anite thil bawnhnak tu cung mah ih; zaimantifangin amahte relhnak bangin anite in bawn lo i.

⁴ Mi vumah thilrit ngaingai phurh i, ikhalselai anite in ciami thilrit phur bawm tuhin amahte kutzung hmur inrin dai nuam tlang lo i.

⁵ Mi mithmuh ian ah zaizongza bawn tlang i. Amahte lu le ban ai a khithnak vumai Lai Thianghlim a nganhnak lukhip le bankhihte khiah sik tucuk ih! Zaitluk in lian i! Amahte ponpar khai sik tucuk ih! Zaitluk in sau i.

⁶ Puai bawnhnak hmun le synagogue ah a pha ber hmunah le upathnak hmunah to nuam tlang i.

⁷ Dawr tluan misenpui hmunah mi ai upat pehnak daih ai, ‘Sayapa, sayapa,’ ti ai kohnak daih i.

⁸ Ikhalselai ning incen, ‘Sayapa,’ ti khiah daih mah ih! Zaimantifangin ning tu unau tlang i si ai Sayapa ti tuhhnak tu pakhat ian nai i si.

⁹ Cen laivum ah aisu khai, ‘I Pa,’ tiin ko tuh lo i si, zaimantifangin vancung ai umtu ning Pa lek Pa pakhat nai i si.

¹⁰ Ciahlaiah aisu khai, ‘Hotu,’ ti ai ko tuh khiah cuh mah ih, zaimantifangin hotu pakhat lek nai i si ai ani tu Messiah i.

¹¹ Ningmah lakai a lianber heh ning hnenum cang tuh i.

¹² Aisu khai ituseh, amah veve a thangphattute heh ṭhum tuhai thinniam mite tu thangphathnak ngah tuh i.

Jesuh In Leplehnak Sawi I

¹³ Danthiam mite le Farasite, ning hmai lam a pit ze i! Ningmah mileple pawl! Vancung Ukhnak dawngkham tu mi lut thil tuh loin kham meng ai ningmah le lut ning nuam fawn lo i.

¹⁴ Danthiam mite le Farasite, ning hmai lam a pit ze i! Ningmah mileple pawl! Hmaitongte heh a hmaitong manin zohsuam tlang ai a inn tianin sut tlang i si; cen misenpui hmuh ahcen rai ngaingai sawngen ning uar i. Hebang ning imanin cawhhnak harsa tuar tlang tuh i si.

¹⁵ Danthiam mite le Farasite, ning hmai lam a pit ze i! Ningmah mileple pawl! Mi pakhat thinlung thlengruai tuhin tifingriat ah lawng in feh ai ram tampui ah vak tlang i si. Mi pakhat ning ngah fangin hell ah ningmah tahin let hnih tuar tuhin bawn i si.

¹⁶ “Ningmah konghoitu mitcawte, ning hmai lam a pit ze i! ‘Mi pakhat in Biakinn hming sal in cukcam lekhaw a cukcamhnak in awkruai lo i, ikhalselai Biakinn songai a umhnak sui hming sal in cukcam le i sikhaw a cukcamhnak in awk i,’ tihnak zirh dun i si.

¹⁷ Mitcaw le mivoite! Ziang thupui sawn i? Sui maw, ihlahle sui a cianghlim thai in a bawntu Biakinn sawn i pa?

¹⁸ Ciahlaiah, ‘Mi pakhat in puleng lungdawl hming sal in cukcam lekhaw a cukcamhnak in awkruai lo i; ikhalselai puleng vumai umhnak thil selhnak hming sal in cukcam lekhaw a cukcamhnak in awkruai i,’ tiin ti tlang i si.

¹⁹ Khua hmu thil lo lawmlam i si! Ziang thupui sawn i? Thil selhnak maw, thil selhnak a cianghlimruaitu Biakinn sawn i?

²⁰ Ciamanin mi pakhat in puleng hming sal in cuk a cam fangin puleng le puleng vumai a umhnak thil selhnak hmuahhmuah thawn cukcam i.

²¹ Biakinn sal in cukcam fangin biakinn le a songai umhnak Pathian hming in cukcam i.

²² Cen vancung sal in cukcam lekhaw Pathian tohkham le a vumai a totu hming in cukcam i.

²³ Danthiam mite le Farasite, ning hmai lam a pit ze i! Ning mileple pawl! Meh ah roihhnak patina, remhmui le khakhuante tu Pathian hnenah seu hra seu khat pe tlang i si; ikhalselai dan songai a thupui ngai dikcanghnak, ninghiohnak le rintlakhnak tepawl tu hlun lo ai zaikhai siar tlang lo i si. Seu hra seu khat tu ning pe tuhhnak rengreng i. Ikhalselai dan songah a umhnak a dangte khai ngulsul tuh lo i si.

²⁴ Hotu mitcawte! Ning dinghnak songai thothi tu hap i si, ikhalselai kalauk lehlam lem tlang i si.

²⁵ “Danthiam mite le Farasite, ning hmai lam a pit ze i! Ning mileple pawl! Ning khuat le ning pakante a pualam lek ciang liang in som tlang ai a song tu midang thil ning suthnak le pamhaphnak in ning ngahhnak thil in dim i.

²⁶ Farasi mitcawte! Ning khuat a songlam khiah som hmasa tu ilai ciatihin a pualam khai ciang tuh ve i.

²⁷ “Danthiam mite le Farasite, ning hmai lam a pit ze i! Ning mileple pawl! Ning tu si ngo mathnak hlan bang i si; sumpua ah mawi napui a songah ruh le mithi luang hmon uih in dim i.

²⁸ Cia bangtluk in ning pualam in sik fangin mi zongzong caah mipha bik ning bang i, ikhalselai ning songlam ahcen leplehnak le sualhnak a phunphun in ning dim i.

Amahte Cawh Tuh Relciahnak

²⁹ Danthiam mite le Farasite, ning hmai lam a pit ze i! Ning mileple pawl! Prophette phumhnak ah hlan phapha bawn tlang ai mipha pawl ai khanlung tu mawiruai i si.

³⁰ Ning in, ‘Hemi kin pupate ai san ahhen nung awng ve inglai amahte thil bawnhnak tepawl heh bawn tuh loin prophette khai thi tuh hrimhrim lo i,’ tiin ti i si.

³¹ Ciatihin ning ti fangin prophette a rek awngtute ai tesinfa i ing, tiin ning tidunhnak larruai i si.

³² Ciamanin ning pupate ai a panhnak thil heh ning in a khimliang in bawn tu lawlaw ih!

³³ Ning, rulte, ru nai rul ai fate! Hell song tlok tuhin hnawlmi ning ihnak in akontih in ning luat thil tuh ini?

³⁴ Fiang ngai in ning rel ing: ning hnenah prophet, mifim le zirhtu sayate hlat tuh ing; a hrekkhat tu rek tuh i si, a hrekkhat tu thinglamteh vumah ningmah in rek tuhai a hrekkhat tu synagogue ah ningmah in vit tuhai khua khat in khua dang ah hnawt tuh betbo i si.

³⁵ Ciabangtluk in mawh nai lomi thihhnak tuarruai manin cawhhnak ning vumah hleng tuh i. Mawh nai lo Abel ai panin Biakinn le puleng karlak ai ning rekhnak Berachiah ai fapa Zechariah tian, amahte thisan suak man heh ning vumah hleng tuh sio i.

³⁶ Thutak ning rel ing: hemite heh ning rek manin cawhkuan khiah tun san minungte vumah hleng tuh sio i,” tiin ti i.

Jesuh In Jerusalem It I

³⁷ Jesuh in, “Aw Jerusalem, Jerusalem! Na hnenah Pathian ai prophette nangmah in rek ai a hlathnak tepawl khai lungto in sep isi. Arpui in ar fate a ko hniaah a op bangin na minungte tu i kut in hup thliahthlo napui na daih lo i!

³⁸ Ciamanin na Biakinn tu lawng tuhai khing tuh i.

³⁹ Na rel cia ing: ‘Bawipa hming in a kawitu heh Pathian in hmuifu pe tu hram seh,’ tiin na ti ben hlanlo tunai panin i hmu tuh nawn lo isi,” tiin ti i.