Matthai 22 - Zanniat Bible

Mo Puai Santehhnak

¹ Jesuh in misenpui hnenah santehhnak thawn thuzirh i.

² “Vancung Ukhnak thu tu hebang i. Vaikhat laiah kumpibawi pakhat in a fapa ai nupui hoihnak puai bawn i.

³ Ciami rong aih puai ah tel tuhin a sawmmi hmuahhmuah vaikham tuhin a hnenumte hlat i; ikhalselai aisu khai kawi lo i.

⁴ Ciamanin a sawm mite hnenah a dang hnenumte hlat ai hetihin thucah i. ‘Dai pharh zo i ing, rong ai man zo i ing. I kawlpawcangte le sumhnam thau ngaingai pawl ro zo ai zaizongza ralring i ing. Rong ai tuhin kawi tuhang ih,’ ti i.

⁵ Ikhalselai sawm ciamite in zaikhai siar lo ai amahte naper kel per tlang i; pakhat tu a lo ah feh i, a dang pakhat tu a dawr ah fehsan i;

⁶ Mi hrekkhatte in a hnenumte tu pom ai a vit hnuaah rek tlang i.

⁷ Kumpibawi tu a thinraw bik i. Ciamanin a ralkapte hlat ai ciami mi rektute khiah rek ai a khua khai mai in tai sek i.

⁸ Cia hnuaah a hnenumte ko ai, “Mopuai i bawnhnak tu zaizongza khim zo sio napui i sawm mite tu sawm tlak lo i.

⁹ Ciamanin lamtluanah feh tu ilai ning sawm ben zahzah heh mopuai ah sawm tu ih,” tiin ti i.

¹⁰ Ciatihin hnenumte khai feh ai lamlak ai a tawkhnak hmuahhmuah mipha mihnawm ti loin khawm ai puai bawnhnak innpui dim tlang sio i.

¹¹ “A sawm mite sik tuhin kumpibawi khiah lut ai mopuai hnikpon a sil lotu pakhat hmu i.

¹² Kumpibawi in, ‘I rual, mopuai hnikpon sil loin zaimanin he hmunah lut thil isi,’ tiin zawt i. Ikhalselai ani in zaikhai rel pha nai lo i.

¹³ Cen kumpibawi in a hnenumte hnenah, ‘A kutke pen tu ilai sumpua a thimhnak ah lon tu ih. Ciata ah kap le au le kamriat in um tuh i,’ ti i,” tiin ti i.

¹⁴ Cia hnuaah Jesuh in, “Sawmmi tam napui a rilmi tlawm i,” tiin a tawphnak ah rel i.

Ngunkhuai Pehnak Thu

¹⁵ Farasite tu feh ai Jesuh sual si thilhnak tuhin thu zawt tuh ruah dun i.

¹⁶ Cen a hluntute hrekkhat le Herod ai minung hrekkhat heh Jesuh hnenah hlat ai, “Sayapa, nang tu thudik rel isi, ti ling i ing. Pathian daihhnak thudik khai mi mithmai sik loin zirh isi. Zaimantifangin nang tu mi ihnak sik in mi hlaihdan lo isi.

¹⁷ Ciamanin na ruathnak kin rel tucuk law. Rome kumpibawi hnenah ngunkhuai pe heh kin dan in daih maw daih lo ini,” tiin zawt tlang i.

¹⁸ Tumtekhnak pha lo a nai khiah Jesuh in a ling manin anite hnenah, “Mi leple pawl! Zaimanin thang in i awk tum tlang i si?

¹⁹ Ngunkhuai pe tuhhnak tangka i hmuh tucuk ih,” ti i. Tangka a pe fangin Jesuh in,

²⁰ “Aisu ai hmuihmel le hming cuang i?” tiin zawt i.

²¹ Anite in, “Kumpibawi ai hmuihmel le hming!” tiin ti tlang i. Ciafangin Jesuh in, “Ciatih ilekhaw Kumpibawi ai tu kumpibawi pe tu ih; Pathian ai tu Pathian pe tu ih,” tiin sawn i.

²² Ciami a za fangin aican in a hnenin suak tlang i.

Tholehhnak Thu

²³ Cia nia thotho ah Sadusite hrekkhat tu Jesuh hnenah kawi tlang i. Anite tu tholehhnak um lo i, a titute i.

²⁴ Jesuh tu, “Sayapa, Moses in akin zirhhnak ah, ‘Mi pakhat fa nai loin thi lekhaw a nau pa in a nupui tu hoi tu rengreng seh. Ciatihin hoi ai fa nai lekhaw mithi pa ai fa ah cang tuh i,’ ti i.

²⁵ Heta ai a um awngtu unaute pasarih um tlang i. Upaber in nupui hoi ai, fa nai lo pah in thi i; a nupui tu a nau pa in co i.

²⁶ Pahnihhnak pa khai thi lala ai a pathumhnak pa in a nupui tu co lala i. Ciatihin amahte unau tlang ai nupui a cang hnuaah thi sio i.

²⁷ A hnuataber ah cia nu khai thi ve i.

²⁸ Anite pasarih in hoi tlang ṭen manin tholehhnak nia ah aisu ai nupui ber i tuh i?” tiin zawt tlang i.

²⁹ Jesuh in, “Ning khelh ze i! Hemi tluk in ning khelhhnak heh Lai Thianghlim le Pathian hathnak huham ning ling lo manin i.

³⁰ Zaimantifangin mithi a tho leh fangin van ai a ummi vancungmi bang i tuhai hoidunhnak ti um tuh nawn lo i.

³¹ Mithi tholehhnak thu ah Pathian in ning relhnak thu siar awng lo i sim? Pathian in,

³² ‘Kai tu Abraham ai Pathian, Isaac ai Pathian, Jacob ai Pathian ing,’ ti i. A nungmi ai Pathian i, a thimi ai Pathian ilo i,” tiin ti i.

³³ Ciami thu misenpui in a za fangin a thuzirhhnak dan khiah ngaihsunur tlang ngaingai i.

Thukham Lian Ber

³⁴ Jesuh in Sadusite khiah pong tuh pha ling loin bawn i, ti Farasite in a za fangin taikhawm tlang ai,

³⁵ amahte lakai mi pakhat, Danthiam pa in Jesuh sual si tuhin thu zawt i.

³⁶ “Sayapa, dan song ahhen zai dan heh a lianber ini?” tiin zawt i.

³⁷ Jesuh in, “Bawipa na Pathian tu na thinlung veksen, na nunhnak veksen le na ruathnak veksen in it tuh isi,’

³⁸ tihnak tu a lianber le a pakhathnak thupe i.

³⁹ A pahnihhnak ai a thupui ber thupe tu a pakhathnak bang thotho i: ‘Na ompui khiah nangmah na it dun bangin it tu,’ tihnak i.

⁴⁰ Moses dan hmuahhmuah le prophette ai zirhhnak hmuahhmuah hemi thupe pahnih in huap sio i,” tiin ti i.

Messiah Thu

⁴¹ Farasite hmunkhat ah a tai tlang fangin Jesuh in,

⁴² “Messiah heh zaitin ruat i si? Aisu ai tefa i tiin ruat i si?” tiin zawt i. “David ai tesinfa i,” ti tlang i.

⁴³ Jesuh in, “Ciatih ilekhaw zaimanin Rauhla in David hnenah, ‘Messiah heh Bawipa i, ti tu,’ tiin ruai ini? David in:

⁴⁴ “Bawipa in i Bawipa hnenah, Na ralte na ke hniaah i dah hlanlo, I kiahhan lamah to tu,’ ti i.

⁴⁵ David in Bawipa ti lekhaw akontih in Messiah tu David ai tesinfa cang thil tuh ini?” tiin zawt i.

⁴⁶ Jesuh ai thuzawthnak tu aisu inkhai sawn ben lo ai cia nia ai panin aisu inkhai thu zawt ngam nawn lo i.