Matthai 21 - Zanniat Bible

Jesuh Jerusalem Ah Lut I

¹ Jesuh le a hnuahlunte tu Jerusalem nong betbo ihang. Olive mual ai Bethphage khua hleng tlang i. A hnuahluntu pahnih khiah hmaiah hlat ai,

² hetihin thucah i. “Ning hmai ai khua ah feh tu ilai laakpui le a fa niu henhnak hmu tuh i si. A ri hawk tu ilai i hnenah koih tu ih.

³ ‘Mi in zaimanin dukpui i si,’ ning ti lekhaw, ‘Bawipa in kul i,’ ti tu ih. Ciatihin ning hlat tuh vut ngawn i,” tiin ti i.

⁴ Hemi tu prophet ai a relciahnak khimruai tuhin i. Prophet in:

⁵ “Zion khuapui heh rel tu ih, Na kumpibawi tu na hnenah a kawi lai i; Amah tu mi lungnem i ai Laak vumah to i. Laak dawnniu vumah to i, ti tu ih,” tiin ti i.

⁶ Ciamanin hnuahlunte tu feh ai Jesuh relhnak bangin bawn kawm i.

⁷ Laak le a faniu tu fehpui ai a zangkhun ah pon dan ai Jesuh in to i.

⁸ Mi tampui in Jesuh fehhnak tuh lampui ah amahte pon phah tlang ai midangte in hnahsawl hliak ai lampui ah phah tlang ve i.

⁹ Jesuh hmaiah a fehtute ituseh, a hnua lamin a hluntute in ituseh, amahte veksen in: “Hosanna! David ai fapa thangphat tu ih! Bawipa hming ai a kawitu heh Pathian in hmuifu pe tuseh! Hosanna! Pathian tu van a sang ber ah thangphat tu ih!” tiin au tlang dekdo i.

¹⁰ Jesuh Jerusalem khua songah a lut fangin a khua pumpuhluk in au tlang dekdo ai, “Hemi pa tu aisu i?” tiin khua mite in zawt dun murhmo i.

¹¹ Ciafangin mizapui in, “Hemi pa tu Galilee ram Nazareth khuami prophet Jesuh i,” tiin ti tlang i.

Jesuh Biakinn Ah Feh I

¹² Jesuh tu biakinn songah lut ai ciata ah thil a zuartu le a laitute khiah hnawt sek i. Tangka thlengtute ai cabuaite le laileng zuartute ai tohkhamte khiah bungbaleh sek i.

¹³ Cen anite hnenah, “Lai Thianghlim songah Pathian in, ‘I inn tu sawngen hmun inn i tuh i,’ tiin ti i. Ikhalselai ning incen ruko relhhnak kua ah bawn tlang i si,” tiin ti i.

¹⁴ Biakinn songah mitcaw le kebai mite a hnenah kawi tlang ai cakruai i.

¹⁵ Thil ngaihsunurkul a bawnhnak le Biakinn songai naupangte in, “David ai fapa tu thangphat tu ih,” tiin a au tlanghnak heh suangbawi upate le Danthiam mite in hmu fangin thinraw tlang ngai i.

¹⁶ Ciamanin Jesuh khiah, “A au tlang hnelhnohnak heh za aw sim?” tiin zawt tlang i. Jesuh in, “Za bang ing! Lai Thianghlim songah, ‘Naupang le nauniu songin Thangphathnak semkhim suakruai isi,’ ti ai a nganhnak siar awng lo i sim?” tiin ti i.

¹⁷ Jesuh in hlum ai Jerusalem khuapui songin a suak hnuaah Bethany khua ah feh ai ciata ah cam i.

Jesuh In Thaikung Cukcam I

¹⁸ A thangha zingniu ah Jesuh tu Jerusalem khuapui lamah feh ai lamlak ah a rikam roh i.

¹⁹ Lam rong ah thaikung khat hmu ai thaihmin si tuhin ben i; ikhalselai a hnah siar lo zaikhai hmu lo i. Ciamanin thaikung heh, zaikom inkhai thai nawn mah,” tiin ti i. Cia sawngpah in thaikung heh ro suang i.

²⁰ Ciami tu a hnuahlunte in a hmu fangin mangbang tlang ngai i. “Zaimanin ciatluk rang in ro sek ini? tiin zawt dun i.

²¹ Jesuh in, “Fiang ngai in ning rel ing: sangsamhnak nai loin sang taktak le i sikhaw thaikung vumai i bawnhnak heh ning inkhai bawn thil tuh ve i si. Hemi lek ilo in he mual rin thawn tulai tifingriat songah theuh tu,’ ti le i sikhaw ning tihnak bangin cang tuh i.

²² Sang ngaingai le i sikhaw sawngenhnak thawn ning ngenhnak hmuahhmuah ngah tuh i si,” tiin ti i.

Jesuh Ai Thunaihnak

²³ Jesuh tu Biakinn songah lut leh ai thu a zirh laitak ah suangbawi upate le hotute a hnenah kawi tlang ai, “Zaimanin hebang thil bawn i si? Aisu in thu na pe i?” tiin zawt tlang i.

²⁴ Jesuh in, “Thu pakhat ning zawt tuh ve ai i sawn ben le i sikhaw aisu thu in hebang thil bawn ing ti ning rel tuh ing,” tiin ti i.

²⁵ “John in baptisma a pe khiah Pathian thu in maw minung thu in pe i?” tiin zawt i. Ciafangin amahte lakah pakhat le pakhat eldunhnak um ai, “Akontih in ti tuh ising? Pathian thu in ti lesingkhaw, ‘Zaimanin John khiah sang lo i si,’ kin ti tuh i.

²⁶ Ikhalselai minung thu in ti lesingkhaw mi zongzong in John tu prophet i tiin sang lawnsi ai misenpui in kinmah sawn lehlam zaimaw tiin kin ti pang tuh i, ti laukul lawnsi,” tiin ti tlang i.

²⁷ Ciamanin, “Ling lo i ing,” tiin Jesuh heh sawn tlang i. Cen Jesuh in, “Ciatih ilekhaw kai inkhai aisu thu in hebang bawn ing, ti ning rel tuh ve lo ing,” tiin ti i.

Fapate Pahnih Santehhnak

²⁸ Jesuh in, “Zaitin ruat tlang i si? Vaikhat laiah mi pakhat in fapate pahnih nai awng i. A fapa upa hnenah kawi ai, ‘I fa, tunnia ah cabit vuan ah feh tulai naper tu,’ tiin ruai i.

²⁹ A fapa in, ‘I zuam lo i,’ tiin el i; ikhalselai lehhnua ah sir leh ai cabit vuan ah feh i.

³⁰ Cen a fapa nauta hnenah kawi lehthio ai cabit vuan feh tuhin ruai ve i. Ciami pa in, ‘E law, i pa,’ tiin ti i; ikhalselai feh lo i.

³¹ Hemi fapate pahnih lakah aisu in a pa ai daihhnak bawn i?” tiin zawt i. Anite in, “A fapa upa,” tiin sawn i. Ciafangin Jesuh in, “Fiang ngai in ning rel ing: siahkhawltu le hlotlaute heh ning hlanah Pathian ukhnak songah lut tuh i.

³² Zaimantifangin baptisma petu John tu a dikmi lampui hmuh tuhin ning hnenah kawi napui sang tlang lo i si; ikhalselai ngun khuai khawltu le hlotlaute incen sang tlang i. Ciami ning hmu hnuaah rin ning thinlung thleng cuanglo i si, sang khai sang cuanglo i si,” tiin ti i.

Cabit Vuan Napertu Santehhnak

³³ Jesuh in, “Hemi santehhnak thu heh ngai rih tu ih. Vaikhat laiah ram naitu pakhat um ai cabit vuan bawn i. Ciami a vuan heh sen in ren i, cabit suthnak ah khur co ai a kilhnak ah hlam sa i. Cia hnuaah cabit vuan napertute hnenah zawn ai amah tu khual tlawng teu i.

³⁴ Cabit thai loih can a cu fangin a covo lang tuhin a vuan zawngtute hnenah a hnenumte hlat i.

³⁵ Cabit vuan a zawngtute in a salte tu pom ai pakhat khiah vit i, pakhat tu rek ai a dang pakhat tu lungto in sep tlang i.

³⁶ Lo naitu pa in a salte tam deuh in hlat lala i; ikhalselai vuan zawngtute in a hlan ai bang thotho in hnawmcan tlang lala i.

³⁷ Hnuavai fangin a fapa hlat i, “I fapa tu hmaison tlang tuh rengreng i,” tiin ruat i.

³⁸ Ikhalselai vuan zawngtute in a fapa a hmu fangin, “Hemi pa tu vuan naitu ai fapa i. Kawi tu ih, rek ngasing khaw a thilri co tlang tuh ising,” tiin ti dun i.

³⁹ A fapa tu pom le vuandum pualam ah duk teu ai rek tlang i.

⁴⁰ “Vuan naitu pa a hleng fangin cia vuan zawngtute tu akontih in bawn tuh i tiin ruat i si?” tiin zawt i.

⁴¹ Anite in, “Ciabang hrokhrawl mite tu rek tuhai a covo hmanniu ai a pethaitu tuh midang hnenah a vuan zawn tuh i,” tiin sawn i.

⁴² Jesuh in anite hnenah, “Lai Thianghlim ai a tihnak tu siar awng lo isim? Lai Thianghlim in: ‘Inn satute in santlai lo i tiin a hnawlhnak lungto khiah A thupui ber lungto ah cang so i; Hemi tu Bawipa ai bawnhnak i, kin mithmuh ah a mawi ngai i,’ ti i.

⁴³ Fiang ngai in ning rel ing: Pathian ukhnak heh ning hnenin lang tuhai thai pha ngai ai a suahruaitu tuh pawl hnenah pe tuh i,” tiin ti i.

⁴⁴ “Aisu khai hemi lungto vumah a tloktu heh khoi tuh sek ai he lungto ai a rialhnak hmuahhmuah heh laivut bangin vut tuh sek i,” tiin ti i.

⁴⁵ Jesuh relhnak santehhnakte tu suangbawi upa le Farasite in a za fangin amahte sawh ai rel i ti khiah ling tlang i.

⁴⁶ Ciamanin Jesuh heh pom tum i. Ikhalselai misenpui in Jesuh tu prophet i tiin ruat tlang manin misenpui lau in pom ngam tlang lo i.