Matthai 20 - Zanniat Bible

Cabit Vuan Napertute

¹ Jesuh in, “Vancung Ukhnak tu hetih bang i. Mi pakhat tu a cabit vuan songai napertu si tuhin zing khuantla in feh i.

² Nikhat hlawhman ngun tangka fangkhat pe tuhin a lungkhim ai a vuan ah napertute hlat i.

³ Zing lam nazi pakua ah dawr hmunah feh ai mi um lak menma hrekkhatte hmu i.

⁴ Ciamite hnenah, ‘Ning khai cabit vuan ah feh tu ilai naper tu ih; ning nihlawh a cateng ning pe tuh ing,’ tiin ti i.

⁵ Ciatihin feh i, ciatihbang thotho in nazi hlaihnih ah le zan lam nazi pathum fangin a dangte hlat lala i.

⁶ Zan lam nazi panga dawn fangin dawr hmunah feh lala ai minung hrekkhatte a ding tlang lai ngio hmu i, ‘Zaimanin zaikhai bawn loin sunnivui ding ai ning can boruai i si?’ tiin zawt i.

⁷ Anite in, “Aisu inkhai naper kin ruai lo manin i,’ tiin sawn i. Ani in, ‘Ciatih ilekhaw cabit vuan ah feh tu ilai per tu ih,’ tiin ti i.

⁸ Zan lam a hleng fangin vuan naitu pa in vuan uktu pa khiah, ‘Vuan napertute ko tulai a nihlawh pe tu. A hnuataber ai a pertute in pan tulai a hmasaber ai a pertute tian,’ tiin ti i.

⁹ Zan lam nazi panga ai naper a pantute tu a hlawhman ah ngun tangka fangkhat ṭen pe i.

¹⁰ Ciamanin hmasaber ah naper ruaihnak mite hlawhman pe tuhin a kawi tlang fangin tam deuh ngah tuhin um dun i; ikhalselai anite khai ngun tangka fangkhat ṭen pe ve i.

¹¹ Tangka tu lang tlang ai vuan naitu vumah phuncam tlang i.

¹² Hemi hnuataber ai napertute tu nazi pakhat song ian per tlang i; kin tu nisan sa lakah sunnivui per i ing, ikhalselai kinmah zah thotho ni hlawhman pe isi,’ tiin ti tlang i.

¹³ “Ciafangin vuan naitu pa in pakhat pa hnenah, ‘I rual, ngai tucuk! Na zawl lo ing. Ni khat hlawhman heh ngun tangka fangkhat i tuhin lung na khim ita lo im?

¹⁴ Ning hlawhman tu lang tu ilai inn ah tlung tu ih. Hnuataber ai naper i ruaimi pa khai he ning ngah zah ngah tuh ve heh i daihhnak i.

¹⁵ Kaimah in i tangka tu i daihhnak bangin hmang thilhnak thu nai ilo ing maw? Amahte vumah hmun i thiam manin iksik tlang i sim?’ ti i,” tiin rel i.

¹⁶ Cen Jesuh in, “Ciamanin hnuataber mite tu hmasaber ah cang tuhai a hmasaber mite tu hnuataber ah cang tuh i,” tiin ti i.

A Thi Tuhhnak Thu

¹⁷ Jesuh tu Jerusalem lamah a feh laitak ah hnuahluntu hlaihnih khiah a dangniu in hoi ai amahte lek, vak kongin, thu ruatpui i.

¹⁸ “Ngai tu ih! Jerusalem ah feh tuhai ciata ah Mi Fapa heh suangbawi upate le Danthiam mite kut ah hlen tuhai rek tuhin rel tlang tuh i.

¹⁹ Cia hnuaah Gentile mite kut ah hlenpui tuh i. Cen Gentile mite in zohsuam tlang tuh i, vit tuhai thinglamteh ah khen tlang tuh i. Ikhalselai ni thumhnak nia ah thoruai leh tuh i,” tiin ti i.

Nu Ai Ninghio Ngenhnak

²⁰ Cen Zebedee ai nupui tu a fapate pahnih thawn Jesuh hnenah kawi ai; Jesuh hmaiah ut in ninghio ngen i.

²¹ “Ziang na daih i?” tiin Jesuh in zawt i. Ani in, “Kumpibawi na cang fangin i fapate pahnih heh na kiahhan lam le na kekeh lamah a to kawm thilhnak tuhin thu i kham tu,” tiin ti i.

²² Jesuh in, “Ning ngenhnak heh ziang ngen i ing ti ling tlang lo i si. I ding tuhhnak tuarhnak khuat heh ding ben tuh i sim?” tiin zawt i. A fapate pahnih in, “Ding ben tuh i ing,” ti kawm i.

²³ Jesuh in, “I ding tuhhnak khuat tu ding ben thai peu i si. Ikhalselai i kiahhan lam le i kekeh lamah aisu to tuh i ti a riltu heh kaimah ilo ing. Hemi tohhmunte tu i Pa ai remruat sah cia mite caah i,” tiin ti i.

²⁴ Ciami thu tu hnuahlunte sawmkhat in a za tlang fangin ciamite unau hnih vumah thinraw tlang ngai i.

²⁵ Ciamanin amahte veksen in Jesuh in kokhawm ai, “Ning linghnak bangin laivum uktute in amahte ukhnak mite khiah thunai ngai in uk tlang ai hotute inkhai thu nai tlang ngai i.

²⁶ Ikhalselai ningmah lakah tu cia bangin i maseh. Ningmah lakah midang tahin thupui deuh ning nuam lekhaw midangte ai hnenum cang kul i;

²⁷ ningmah lakah pakhatkhat in hmasaber nuam lekhaw ning sal ah cang hmasa kul i.

²⁸ Mi Fapa tu mi in ruaih tuh ring in kawi lo i. Amah in mi ruaih tuh le mi tampui tlan ai a nunhnak pe tuhin kawi i.

Jesuh In Mitcawte Pahnih Cakruai I

²⁹ Jesuh le a hnuahlunte tu Jericho in suak tlang ai mi tampui in hlun tlang i.

³⁰ Lampui hiangah a totu mitcawte pahnih in Jesuh amahte hiangniu in vak i, ti a za kawm fangin, “Aw David ai fapa, ning kin hio tu law,” tiin au kawm i.

³¹ Mipui in dap niu in um tuhin hau tlang i. Ikhalselai dap cuanglo i. “David ai fapa, ning kin hio tu law,” tiin cawm amam in au kawm i.

³² Jesuh tu ding ai anite pahnih in ko i. “Ziang bawn sah ning daih i?” tiin zawt i.

³³ Anite in, “Bawipa, khua kin hmuruai tu hram law,” ti kawm i.

³⁴ Jesuh in ngaihhar ai a mit dai i. Cia sawngpah in khua hmu leh ai amah khiah hlun kawm i.