Matthai 2 - Zanniat Bible

Nisuah Lam Mifimte Kawi Tlang I

¹ Jesuh tu Herod in Judea ram kumpibawi a ṭuan laiah, Judea ram Bethlehem khua ah te i. A rai hlanah nisuah lamin arsi sikthiamte Jerusalem khuapui ah hleng tlang ai,

² “Judah mite ai Kumpibawi tuhin a tehnak nauniu akonah um ini? Nisuah lamin a arsi hmu ai amah bia tuhin kawi i ing,” tiin ti tlang i.

³ Ciami thu tu kumpibawi Herod in a za fangin a thin har ngai i. Jerusalem khua ai a umtu midang hmuahhmuah khai thin har tlang ngai ve i.

⁴ Ciamanin Herod in suangbawi upate le Danthiam mite kokhawm ai, “Messiah tu akonah suak tuh ini?” tiin zawt i.

⁵ Ciafangin anite in, “Judea ram Bethlehem khua ah suak tuh i,” tiin sawn tlang i. Prophet ai nganciahnak tu:

⁶ “Judah ram songai Bethlehem, Judah ram khuapuite lakah a cik ber i hrimhrim lo isi. Zaimantifangin na songin konghoitu pakhat suak tuhai, I minung Israel mite hoi tuh i,” ti i.

⁷ Ciamanin Herod in nisuah lamai mifimte khiah a thupniu in ko ai, zaifangin arsi suak peu heh i, ti khiah fel ngai in zawt i.

⁸ Cen Bethlehem khua ah hlat ai, “Feh tu ilai nauniu khiah si tu ih; hmu le i sikhaw kai khai i rel tu ilai amah bia tuhin feh tuh ve ing,” tiin thucah i.

^9-10 Herod ai relhnak bangin feh tlang ai nisuah lamai amahte hmuhnak arsi heh hmu tlang leh i. Ciami arsi hmu fangin ang tlang ngai i. A hmaiah arsi feh betbo ai nauniu umhnak vumah com i.

¹¹ Inn songah lut ai nauniu tu a nu Mary thawn a hmu fangin khuk caicin in bia tlang i. Amahte kenghnak lehsawngte sui, frankincense rimhmui le mura yihmui suah ai pe tlang i.

¹² Cen mifimte tu Pathian in a mang ah Herod hnenah let tuh nawn loin rel manin lampui dang in amahte ramah tlung tlang i.

Egypt Ramah Tlanpui I

¹³ Nisuah lam mifimte a feh hnuaah Bawipa ai vancungmi pakhat tu Joseph mang ah lar ai, “Hemi nauniu heh Herod in rek tuhin si tuh i. Ciamanin tho tulai nauniu le a nu thawn Egypt ramah tlan tu ih. Let leh tuhin kaimah in ning rel hlanlo ciata ah um tu ih,” tiin ti i.

¹⁴ A tihnak bangin Joseph tu tho ai nauniu le a nu thawn a zanzan in Egypt ramah tlan tlang i.

¹⁵ Herod a thi tian ciata ah um tlang i. Hemi bangin a canghnak tu Bawipa in prophet ka in, “I fapa tu Egypt ram in ko ing,” tiin a ti awnghnak khiah a khimruaihnak tuhin i.

Herod in Naupangte Rek I

¹⁶ Nisuah lam mifimte in i zawl ngah i, ti Herod in a ling fangin a thin raw ngai i. Cen mifimte relhnak arsi suak can thawn tuat ai Bethlehem le a hiang khua ai a ummi pasalfa naupang kum hnih tanhnia hmuahhmuah rek tuh sek in thupe i.

¹⁷ Ciatihin prophet Jeremiah ai a rel cia awnghnak khim i. A relciahnak tu:

¹⁸ “Ramah khua songin aw thawm thang i, kaphnak le aihramhnak aw i. Rachel in a fapate kah i; Thi sek manin kap ai, A hnem khai thilh nawn lo i,” ti i.

Egypt Ram In Let Leh I

¹⁹ Herod thi hnua Egypt ramah Bawipa ai vancungmi pakhat Joseph mang ah lar ai,

²⁰ “Tho tulai nauniu le a nu heh Israel ramah letpui tu, zaimantifangin nauniu a rek tumtute thi zo sek ihang,” tiin ti i.

²¹ A tihnak bangin Joseph khai tho ai nauniu le a nu khiah lang ai Egypt ramah let tuhin feh tlang i.

²² Ikhalselai Archelaus in a pa Herod ai tumrul in Judah kumpibawi ṭuan i, ti Joseph in a za fangin ciata ahcen feh ngam lo i. A mang ah thu a rel bethnak bangin Galilee peng ah feh ai,

²³ Nazareth tihnak khua ah um i. Ciatihin prophette relciahnak, “Ani tu Nazareth khuami i tuh i,” tihnak khim i.