Matthai 19 - Zanniat Bible

Nu le Pa Madunhnak Thu

¹ Ciami thute Jesuh in a rel ben fangin Galilee an suak ai Judea ram, Jordan run ralkhat ah feh i.

² Mi tampui in hlun tlang ai ciata ah miur tampui cakruai i.

³ Farasi hrekkhat a sual si nuam in a hnenah kawi ai, “Zaibang thu ahkhai pasal in a nupui ma tuhin kin dan in hlat awm? tiin zawt tlang i.

⁴ Jesuh in, “A hampanhnak ah semsuahtu in nu le pa bawn i, tiheh Lai Thianghlim songah siar awng lo i sim?

⁵ Ciami thu manin Pathian in ‘Ciamanin pasal in a nu le a pa hlum tuhai a nupui thawn kom dun tuh i; ciatihin anite pahnih tu pumkhat sakhat ah cang tuh i,’ ti i.

⁶ Ciamanin anite tu pumhnih i nawn lo ai pumkhat cang i. Pathian ai a kopmi khiah aisu inkhai khan maseh,’ tiin ti i.

⁷ Farasite in, “Ciatih ilekhaw zaimanin Moses in ‘Pasal in a nupui heh mahnak lai pe tu selai tlanruai tuseh,’ tiin dan kin pe ini?” tiin zawt tlang i.

⁸ Jesuh in, “Thu zirh ning har ze manin Moses in nupui mathilhnak thu ning pe i. Ikhalselai a hlan ahcen ciabang i awng lo i.

⁹ Fiang ngai in ning rel ing: mi pakhat in a nupui heh pasal dang thawn sual khelh in a um ti siarlo, ma ai nupui dang hoi lekhaw ciami pa tu kangkawm sualhnak a bawntu i,” tiin ti i.

¹⁰ Hnuahlunte in, “Nupui le pasal karlak ah hebang tuh lekhaw hoi dun loin um lawlaw selai pha sawn i,” tiin Jesuh hnenah ti tlang i.

¹¹ Ciafangin Jesuh in, “Ciami ning tihnak tu mi zongzong ca ilo i; Pathian ai vo zem mite ca ian i.

¹² Pasal in nupui a hoi lohnak san heh a thu a phunphun um i; mi hrekkhat tu ciatihin a suahpui mi i; mi hrekkhat tu nupui hoi tuh loin tilretmi i ai mi hrekkhat tu vancung Ukhnak manin nupui hoi loin um tlang i. Ciabang ai a hlun bentute in he thuzirhhnak heh hlun tlang tuseh,” tiin ti i.

Jesuh In Naupangte Hmuifu pe I

¹³ Mi hrekkhat in amahte fate heh Jesuh in a lu vumah kut suan in sawnget tuhin koih tlang i; ikhalselai hnuahlunte in kham tlang i.

¹⁴ Jesuh in, “Naupangte i hnenah kawi tuseh, kham mah ih; zaimantifangin vancung Ukhnak tu hebang ai a hlun bentute ca i,” tiin ti i.

¹⁵ Naupangte lu vumah a kut suan hnuaah ciata in feh i.

Milian Tlangvalpa

¹⁶ Vaikhat laiah mi pakhat Jesuh hnenah kawi ai, “Sayapa, kumkhua nunhnak co tuhin zaibang thil pha bawn tuh ing?” tiin zawt i.

¹⁷ Jesuh in, “Ziang thil heh a pha i tihnak thu ah zaiman i zawt isi? Mi pha pakhat ian um i. Nunhnak co ngah na nuam lekhaw thupehnakte hlun tu,” tiin ti i.

¹⁸ Tlangval pa in, “Zaibang thupehnak maw?” tiin zawt i. Jesuh in, “Mi rek mah; kangkawm sualhnak bawn mah; ru ko mah; a hman loin mi sual hluk mah;

¹⁹ na nu le na pa upat tu; na ompuite heh nangmah na it dun bangin it tu,” tiin ti i.

²⁰ Tlangval pa in, “Hemi thupehnakte tu hlun zo sio ing. Ziang bawn tuh ilai ing?” tiin zawt nengno i.

²¹ Jesuh in a hnenah, “Mi semkhim cang na nuam lekhaw feh ta tulai na naihnak hmuahhmuah zuar in na ngahhnak tangka heh mifarahte sum tu; ciatihin vancung ah hlawnthil nai tuh isi. Cia hnuaah i hlun tu,” tiin ti i.

²² Ciami thu heh tlangval pa in a za fangin lungsia in let teu i, zaimantifangin mi lian ngai manin i.

²³ Ciafangin Jesuh in a hnuahlunte hnenah, “Fiang ngai in ning rel ing: milian caah vancung Ukhnak song lut heh a har ngai i.

²⁴ Ning rel sal ing: Kalauk pakhat khimhuk nabil songah lut tahin milian pakhat Pathian Ukhnak songah lut har sawn i,” tiin ti i.

²⁵ Ciami tu hnuahlunte in za fangin ngaihsunur tlang ngai ai, “Ilekhaw aisu in ohnak ngah thil tuh i?” tiin zawt tlang i.

²⁶ Jesuh in hmaiton in sik ai anite hnenah, “Hemi tu minung ca ahcen a cang thilhnak ilo i, ikhalselai Pathian ca ahcen zaizongza cang thil i,” tiin ti i.

²⁷ Cen Peter in, “Zaizongza zam in nangmah na hlun tlang zo i ing. Ziang co tuh i ing?” tiin zawt i.

²⁸ Jesuh in anite hnenah, “Fiang ngai in ning rel ing; San Thar hleng ai Mi Fapa tu a tohkham songlawi vumah a to fangin ningmah i hnuahlunte hlaihnih tu Israel uktute hlaihnih cang tuh ve in tohkham vumah to tlang tuh ve i si.

²⁹ Cen aisu khai ituseh kaimah manin nu le pa ituseh, fate ituseh, unau ituseh, farnu ituseh, inn le lo ituseh, a zamtu heh a let zakhat in ngah leh tuhai kumkhua nunhnak ro khai co tuh i.

³⁰ Ikhalselai tunai hmasaber mite heh a hnuataber cang leh tuh i; tunai a hnuataber mite heh hmasaber cang leh tuh i.