Matthai 17 - Zanniat Bible

Jesuh Ai Hmuihmel Thlenghnak

¹ Ni ruk hnuaah Jesuh in Peter le James le a nau John khiah mual sangpui vumah kaipui ai amahte lek um tlang i.

² Cen amahte mithmuh rori ah Jesuh tu a hmuihmel thleng dun i; a hmai tu ni bangin tleu ai a hnikpon tu mi det thai khop in ngo liang i.

³ Ciafangin hnuahlunte pathum in Moses le Elijah heh Jesuh thawn thurel tlang hnelhno in hmu i.

⁴ Cen Peter in, “Bawipa, heta ah kin um heh a pha ze i; na daih lekhaw riahbuk pathum sa tuh ing; pakhat tu nangmah ca, pakhat tu Moses ca, pakhat tu Elijah caah,” tiin Jesuh hnenah ti i.

⁵ Ciatih ai a pong laitak ah mairo tleu ngai in khuk ai mairo songin aw pakhat in, “Hemi pa tu i it ngelngo mi i Fapa i; a vumah lung i khim i, a thu ngai tu ih,” tiin ti i.

⁶ Ciami aw khiah hnuahlunte in za fangin lau ze in lailung ah bok tlang i.

⁷ Jesuh kawi ai amahte khiah dai i. “Tho tu ih, lau mah ih,” ti i.

⁸ Ciafangin sik tlang ai Jesuh lek hmu i.

⁹ Mual vuman a tolh tlang fangin Jesuh in, “Hemi ning hmuhnak thu heh Mi Fapa thihhnak in a thoruai leh hlanlo aisu khai rel tuh lo i si,” tiin cah i.

¹⁰ Cen hnuahlunte in Jesuh khiah, “Zaimanin Danthiam mite in Elijah kawi hmasa tuh i tiin ti ini?” tiin zawt tlang i.

¹¹ Jesuh in, “Elijah tu kawi hmasa tuh ngaingai ai zaizongza amah in ralring tuh i.

¹² Ikhalselai ning rel ing: Elijah tu hleng zo ai mi in aisu i ti ling lo manin daih bangin hnawmcan tlang i. Ciabang thotho in Mi Fapa khai hnawmcan tuh ve i,” ti i.

¹³ Ciafangin hnuahlunte in a relhnak heh baptisma petu John ai thula i, ti lingthiam tlang i.

Jesuh In Khuasia Molhmi Cakruai I

¹⁴ Mipui hnenah a let tlang fangin mi pakhat tu Jesuh hnenah kawi ai a hmaiah khuk caicin in,

¹⁵ “Bawipa, i fapa heh ninghio tu hram law. Thihkah nai ai a ur pan fangin multing thai ngai i; mai songah le ti songah khai sawn de i.

¹⁶ Na hnuahlunte hnenah koih napui cakruai ben tlang lo i,” tiin ti i.

¹⁷ Jesuh in, “Aw sanghnak nai lo le misual mikhelh pawl! Zaikom tian ning umpui tuhlai ini ing? Zaikom tian ning or tuhlai ini ing? Naupang pa tu i hnenah koih tu ih,” tiin ti i.

¹⁸ Jesuh in khuasia heh suak tuhin hau ai naupang pa songin khuasia ciah suak i; ciata ai panin naupang pa heh cak i.

¹⁹ Cen hnuahlunte tu aisu khai ling thai loin Jesuh hnenah kawi tlang ai, “Zaimanin kin cenin hnawt ben lo i ing? tiin zawt tlang i.

²⁰ Jesuh in, “Ning sanghnak a tlawm manin i. Fiang ngai in ning rel ing: pakap ci tia sanghnak nai le i sikhaw he mual heh ‘Heta in khiata ah thawn tu,’ ti le i sikhaw thawn tuh i.

²¹ Ikhalselai, sawngenhnak le rongulhnak lekin hebang heh hnawt thil i,” tiin ti i.

Jesuh In A Thihnak Thu Relhnak

²² Hnuahlunte tu amahte veksen in Galilee ah tawk dun tlang fangin Jesuh in anite hnenah, “Mi Fapa heh minung kut ah pe cing tuhai rek tuh i.

²³ Ikhalselai ni thum nia ah thoruai leh tuh i,” tiin rel i. Hnuahlunte tu lungsia tlang ngai i.

Biakinn Ngunkhuai Pehnak

²⁴ Jesuh le a hnuahlunte tu Kapernuam khua hleng fangin biakinn ngunkhuai khawltute Peter hnenah kawi tlang ai, “Ning saya pa in biakinn ngunkhuai pe awm?” tiin zawt i.

²⁵ Peter in, “Pe i,” tiin sawn i. Peter inn songah a tlum fangin Jesuh pong hmasa ai, “Simon, akontih in ruat isi? Hemi laivum kumpibawi hnenah aisu in ramdang in thil lutpui man, ihlahle ngunkhuai pe i? Ramsong mi in maw, ramdang mi sawn in i cangta?” tiin zawt i.

²⁶ Peter in, “Ramdangmi in,” tiin sawn i. Jesuh in, “Pha i, ciatih lekhaw ramsong mi in pe kul lo i tihnak i!

²⁷ Ikhalselai hemite thinrawtiar kin nuam lo i. Ciamanin tili ah feh tulai ngasio hla tucuk. Na awk hmasaberhnak nga ka songah nang le kai caah biakinn ngunkhuai pe tuhhnak tham in tangka hmu tuh isi. Ciami lang tulai pe tu,” tiin ti i.