Matthai 16 - Zanniat Bible

Ngaihsunurkul Bawn Ruai I

¹ Sadusi le Farasite hrekkhat khiah Jesuh hnenah kawi tlang ai, a sual si nuam in, “Pathian ai umpuihnak ilesikhaw ngaihsunurkul bawn tucuk law,” tiin ti tlang i.

² Ikhalselai Jesuh in, “Ni a tla fangin ‘Van san lekhaw nikhua pha tuh i,’ ti i si.

³ Cen zingniu ah ‘Van ham san ai dup lekhaw khua a nim manin ruah si tuh i,’ ti i si. Van sik in ni khua pha le sia tuh rel thiam i si, ikhalselai tun can ah hnikhnaihhnak heh lingthiam tlang fawn lo i si.

⁴ Tun san minung heh mi pha lo le Pathian zai nam lo pawl i! Ngaihsunurkul bawn i ruai i si, ikhalselai bawn tuh lo ing. Ning caah Jonah thu siar lo ngaihsunurkul dang um lo i,” tiin ti i. Ciatihin suak ai feh i.

Farasi Le Sadusite Ai Col

⁵ Hnuahlunte tu tili tan tlang ai khat lam ralah hleng i; anite in sang keng tuh hai tlang i.

⁶ Jesuh in anite hnenah, “Ngulsul mah ih! Farasi le Sadusite ai col heh ralring tu ih,” tiin ti i.

⁷ “Sang keng tlang lo manin hetihin rel i tuh i,” tiin pakhat le pakhat ti dun i.

⁸ Ciatihin a rel tlang murhmo khiah Jesuh in a za fangin, “Sang ning nai lo thu khiah zaimanin rel tlang murhmo i si? Ning sanghnak a tlawm zia heh!

⁹ Ling thil lai lo i sim? Mi thawng nga ca sang hlom nga i khanhnak khiah hih nawn lo i sim? A valhnak bawm zaizah khul tlang i si ti hih nawn lo i sim?

¹⁰ Mi thawng li caah sang hlom sarih heh hih aw lai i sim? A valhnak bawm zaizah khul ta i si?

¹¹ Ning hnenai i relhnak heh sang thu ilo i, ti zaimanin ling thil tlang lo i si? Farasi le Sadusite ai col heh ralring tu ih,” tiin ti i.

¹² Ciafangin a hnuahlunte in, “Ralring tu ih,” ti ai a tihnak tu sang ai roihhnak col i sawn loin Farasi le Sadusite ai zirhhnak col sawn i, ti khiah ling thiam tlang leh i.

Peter In Jesuh Thu A Phuanghnak

¹³ Jesuh tu Ceasarea Philipi peng ah feh ai ciata ah a hnuahlunte hnenah, “Mi in Mi Fapa heh aisu i tiin ti pa?” tiin zawt i.

¹⁴ Anite in, “Mi hrekkhat in baptisma petu John i na ti i, mi hrekkhat in Elijah i na ti i. A hrekkhat in Jeremiah, ihlahle prophet pakhatkhat i tuh i na ti i,” tiin sawn tlang i.

¹⁵ Jesuh in, “Ning in tang! Kai tu aisu i tiin iti pa i si?” tiin zawt i.

¹⁶ Simon Peter in, “Nang tu a nungmi Pathian ai Fapa Messiah isi,” tiin ti i.

¹⁷ Ciafangin Jesuh in, “John ai fapa Simon, mihmuifu i si! Zaimantifangin he thu tu minung hnenin na ngahhnak ilo i, vancung ai umtu i Pa in na hnenah a phuanghnak i.

¹⁸ Na rel ing Peter, nang tu lungto isi; he lungpui vum ahhen i pawlpui tungding tuhai thihhnak inrin neh ben tuh lo i.

¹⁹ Vancung ukhnak tawhfung na pe tuh ing laivum ai na khammi heh vancung ah kham tuh ve ai laivum ai na honmi heh vancung ahkhai hon tuh ve i,” tiin ti i.

²⁰ Cen Jesuh in a hnuahlunte khiah Messiah i ti aisu khai rel tuh loin thupe i.

Jesuh In A Thi Tuhhnak Thu Rel I

²¹ Cia can ai panin Jesuh in a hnuahlunte hnenah, “Jerusalem ah feh tuhai hotute, suangbawi upate le dan zirhtute ai kut ah harhnak tawk tuh ing. I rek tuh i, ikhalselai ni thumhnak ah i thoruai leh tuh i,” tiin fiang ngai in rel i.

²² Peter in Jesuh heh hmundang deuh ai hoi ai mawhhluk i. “Bawipa, Pathian in siang hram maseh. Hemi bangtluk tu na vumah hleng maseh,” tiin ti i.

²³ Jesuh khai her ai Peter hnenah, “Nang Satan, i hnenin tlan tu! I fehhnak lampui khamtu i si, zaimantifangin he bangtluk na ruathnak heh Pathian hnenin a hlenghnak ilo i, minung hnenin a hlenghnak i,” tiin ti i.

²⁴ Cen Jesuh in a hnuahlunte hnenah, “Aisu khai kaimah i hlun nuamtu heh a daihhnak zam in a thinglamteh phur in i hlun tuseh.

²⁵ Zaimantifangin aisu khai mah nunhnak a hup nuamtu in a nunhnak sung tuh i; ikhalselai kaimah manin a nunhnak a liamtu in a nunhnak hum ngah tuh i.

²⁶ Mi pakhat in laivum pumpuhluk co ngah khalselai a nunhnak sung lekhaw zai hnempuihnak um i? Zaikhai hnempui lo i! A nunhnak tu zai inkhai lai leh thil tuh nawn lo i.

²⁷ Mi Fapa tu a Pa ai songlawihnak le vancungmite thawn hleng cing tuhai mi zongzong khiah amahte bawnhnak bangin a man pe tuh i.

²⁸ Fiang ngai in ning rel ing: Mi Fapa heh kumpibawi bangin a kawi ning hmu hlanlo ningmah lakah a thi tuhlai lomi um i si,” tiin ti i.