Matthai 15 - Zanniat Bible

Pupate Ai Thuzirhhnak

¹ Cen Farasi hrekkhat le Danthiam hrekkhat tu, Jerusalem an Jesuh hnenah kawi tlang ai,

² “Zaimanin na hnuahlunte in kin pupate ai thuzirhhnak dan bal tlang i? Rong a ai hlanah a dan bangin kut som tlang lo i,” tiin ti i.

³ Jesuh in, “Cia lekhaw zaimanin ning tang ningmah ai thuzirhhnak ian hlun ai Pathian thukham sawn bal tlang i si?

⁴ Pathian in ‘Ning nu le ning pa zul tu ih,’ ti i. ‘A nu ituseh a pa ituseh a cukcamtu heh rekhnak tuar tuh i,’ tiin ti i.

⁵ Ikhalselai ning zirhhnak tu: mi pakhatkhat in a nu maw, a pa maw bawmhnak tuhin thil a naihnak khiah, ‘Hemi tu Pathian ai i,’ ti lekhaw,

⁶ a nu ituseh, a pa ituseh bawm kul nawn lo i, tiin ti i si. Ciatih bangin ning thuzirhhnak sawn hlun tlang ai Pathian thukham sawn zaikhai siar lo i si.

⁷ Ning mi phalaktla pawl! Prophet Isaiah in ningmah thula a relciahnak heh a dik ze lawmlam i! Isaiah in,

⁸ “Hemite in a ka lekin i upat tlang ai amahte thinlung ngaingai incen kaimah thawn hla ngai i.

⁹ Minung ai bawn fawmhnak dan heh, Pathian ai pehnak dan bangin zirh manin, Kaimah i biahnak khai Hnempuihnak zaikhai nai lo i, tiin Pathian in ti i,’ tiin rel i,” ti i.

Minung Ningrimruaitu Thil

¹⁰ Cen Jesuh in mi tampui a hnenah ko ai, anite hnenah, “Ngai tu ilai ling tu ih!

¹¹ Minung ningrimruaitu heh ka in a luthnak thil ilo i, ka ai suakhnak in mi rimruai sawn i,” tiin ti i.

¹² Cen a hnuahlunte a hnenah kawi tlang ai, “Na ponghnak in Farasite thin urruai i ti khiah ling aw sim?” tiin ti tlang i.

¹³ Jesuh in, “Vancung ai a umtu i Pa ai bir lohnak thingkung tu phai tuh i.

¹⁴ Amahte manin ning thin hnaihnok maseh! Anite tu hotu mitcawte i; mitcaw in mitcaw a hoi fangin tu anite pahnih in khur songah tlok kawm tuh i,” ti i.

¹⁵ Peter in, “Ciami na ponghnak tu a fiang ngai in kin rel tu,” tiin ti i.

¹⁶ Jesuh in anite hnenah, “Midangte tahin ning fim cuanglo im?

¹⁷ Ling ben lo i sim? Ka songai a luthnak tu a pum songah hleng ai ciatihin a pualam ah suak lan i.

¹⁸ Ikhalselai a ka in a suakhnak tu a thinlung songin a suakhnak imanin ciami in minung rimruai i.

¹⁹ Zaimantifangin mi a rekruaitu, kangkawm sualhnak a bawnruaitu, nupa sualhnak a bawnruaitu, ru a koruaitu, thudon a relruaitu, le mi a thangsiaruaitu ruathnak siava hmuahhmuah heh a thinlung songin suakhnak i.

²⁰ Hemite in minung heh rimruai i. Ikhalselai rong ai hlanah kut som loin mi rimruai lo i,” tiin ti i.

Nupang Nu Ai Sanghnak

²¹ Jesuh tu ciata in suak ai Tyre le Sidon khua hiangah feh i.

²² Cia ramai a umtu Canaan nupang nu pakhat in Jesuh hnenah kawi ai, “Aw David fapa, ning i hio tu. I fanu heh khuasia in molh ai vansang in um ing,” tiin a kap kongin ti i.

²³ Ikhalselai Jesuh in a hnenah kamkhat bang khai sawn lo i. A hnuahlunte kawi tlang ai, “Hemi nu heh hnawt tu teu! Kin hlun hnelhno ai kin auh dekdo i,” tiin Jesuh ngen tlang i.

²⁴ Ciafangin Jesuh in, “Israel a paimi tuute ca ian ah a hlathnak mi ing,” tiin ti i.

²⁵ Ciafangin ciami nupang nu tu Jesuh keham ah bok ai, “Bawipa, ngaih i har tu belbo law!” tiin ti i.

²⁶ Jesuh in, “Nau rong lang in uico paih heh a dik lo i,” tiin sawn i.

²⁷ Nupang nu in, “I, Bawipa, na tihnak tu a dik i. Ikhalselai bawite ai cabuai in a tlokhnak rong theh heh uicote inkhai ai de ngawn i,” tiin sawn i.

²⁸ Ciafangin Jesuh in, “Minu, na sanghnak tu a lian ze i. Na daihhnak heh na bawn sah tuh i,” tiin ti i. Cialak fangin a fanu heh cak i.

Jesuh In Mi Tampui Cakruai I

²⁹ Jesuh khai ciata in suak ai Galilee Tili kam ah feh i. Tlang vumah kai ai ciata ah to i.

³⁰ Mi tampui a hnenah kawi tlang i. Kebai, mitcaw, mize, pong thil lo le miur tampui Jesuh keham ah koih tlang i. Jesuh in anite veksen in cakruai i.

³¹ Pong thil lote pong thil i, mizete cak i, kebai mite phatak niu in vak thil ai mitcawte khai khuahmu tlang leh khiah misenpui in a hmu fangin khuaruahhar tlang ngai ai Israel ai Pathian thangphat tlang i.

Jesuh In Mi Thawng Li Rongdo I

³² Jesuh in a hnuahlunte tu a hnenah ko ai, “Hemi miburpui heh i hnenah ni thum song um zo ai rong ai tuh zaikhai nai lo manin ning i hio ze i. Rong do ta loin tlungruai tuh i nuam lo i, lampui ah lamrat tlang tuh sek i,” tiin ti i.

³³ Hnuahlunte in, “Minung hezah do tuhin hampalak ah a konteng ai rong lang tuh i ing?” ti tlang i.

³⁴ Jesuh in, “Sanghlom zaizah nai i si?” tiin zawt i. Anite in, “Sang hlom sarih le nga cik niuniu a tlawmniu ian um i,” tiin ti tlang i.

³⁵ Jesuh in misenpui tu laipua lakah toruai i.

³⁶ Cen sanghlom sarih le nga tlawmniu heh lang ai Pathian hnenah anghnak thu a rel hnuaah khan ai a hnuahlunte pe i. Hnuahlunte in mizapui hnenah zem i.

³⁷ Mi veksen in a ai fangin kham tlang ngai i. Cen a valhnak khai hnuahlunte in khul tlang ai bawm sarih dim i.

³⁸ A aitute tu nupang le naupang siarcih loin pasalpui ciang thawng li i.

³⁹ Cia hnuaah Jesuh in misenpui khiah tlungruai ai amah tu khawm songah lut ai Magadan peng ah feh i.