Matthai 12 - Zanniat Bible

Sabbath Thuzawthnak

¹ Cia hnua a rai hlan Sabbath nia ah Jesuh tu sangvut lo lakin vak i. A hnuahlunte rikam tlang manin sangvut zut ai a fang ai tlang i.

² Ciami heh Farasite in a hmu fangin Jesuh hnenah, “Sik tu, na hnuahlunte in Sabbath nia ah hetih ai a bawn heh dan bal tlang i,” tiin ti tlang i.

³ Jesuh in, “David le a rualpuite rikam fangin ziang bawn tlang i ti khiah siar awng lo i sim?

⁴ David tu Pathian inn songah lut ai Pathian hnenah selhnak sang a rualpuite thawn ai tlang bang e! Ciatihin a ai heh dan ai daih lohnak i, zaimantifangin cia sang heh suangbawite ian in a ai thil sang i.

⁵ Ciahlaiah Sabbath nia cangcang fangin Biakinn songah suangbawite in Sabbath dan bal tlang de i ti heh Moses dan songin siar awng lo i sim? Ikhalselai misual in ruat awng lo i.

⁶ Thutak ning rel ing; Heta ah biakinn tahin lian sawn um i.

⁷ Lai Thianghlim in, ‘Sumhnam thawn hibawlhnak sel ilo in mi ninghiohnak sawn i daih i,’ tiin a tihnak tu a sullam ling isilai a sual lotu heh ning sual i, tiin ti tuh lo i si.

⁸ Zaimantifangin Mi Fapa tu sabbath vumai Bawi i, tiin ti i.

Kut Ze Pa

⁹ Ciata in Jesuh tu feh ai synagogue songah lut i.

¹⁰ Ciata ah kut ze pa pakhat um i. Jesuh sualpuh a nuamtute khai um tlang ve ai, “Sabbath nia ai mi cakruai heh kin dan in a daihhnak im?” tiin Jesuh heh zawt tlang i.

¹¹ Ciafangin Jesuh in, “Santehhnak ah ningmah lakah mi pakhat in a tuu Sabbath nia ah khur thukpui songah tlok selai suah loin um nitur im?

¹² Minung tu tuu tahin a let tampui in songlawi sawn i. Ciamanin Sabbath nia ah thil pha bawn heh kin dan in a daihhnak i,” tiin ti i.

¹³ Cen kut ze pa hnenah, “Na kut dang tu,” tiin ti i. A kut dang ai a kut khatta bangin cak leh i.

¹⁴ Cen Farasite tu feh ai Jesuh rek tuhin thu sawm tlang i.

Pathian Ai Rilmi Cengfa

¹⁵ A engsan tumhnak thu heh Jesuh in a za fangin ciata in suak i. Cen miburpui in hlun tlang tluamtlo i. Miur hmuahhmuah cakruai ai,

¹⁶ amah ai thula heh midang aisu hnen ahkhai phuang tuh loin kham i.

¹⁷ Hetih ai a tihnak tu prophet Isaiah ka in Pathian in:

¹⁸ “I rilmi i umhlawh tu heta ah um i; I ithnak mi i ai a vumah lung i awi i. A vumah i rauhla dah tuhai, I thukhanhnak tu miphun hmuahhmuah hnenah than tuh i.

¹⁹ Mi thu eltu i tuh lo ai au tuh dekdo fawn lo i. Lampui ah cawm ngai in thurel tuh lo i.

²⁰ Mi hlinhli pawl hnenah a thinlung nem tuhai, Bawmtu nai lo hnenah ninghiohnak nai tuh i. Dikcanghnak heh nehtu a cangruai hlanlo zuam tuh i.

²¹ Cen a vumah mi zongzong in umlamhnak nai tlang tuh i,” ti ai a tihnak khimruai tuhin i.

Jesuh Le Beelzabul

²² Cen Jesuh hnenah khuasia in molh manin a mit a cawmi le a pong thil lomi pa pakhat koih tlang i. Jesuh in cakruai ai pong thil leh ai khua khai hmu thil leh i.

²³ Ciafangin misenpui in ngaihtam tlang ai, “Hemi pa tu David ai fapa ngaingai ini im? tiin ti tlang i.

²⁴ Ciami khiah Farasite in ling fangin, “Khuasia a hnawt benhnak tu khuasia bawi Beelzabul in huham a pe manin i,” ti tlang i.

²⁵ Amahte thinlung in a ruathnak tu Jesuh in ling ai amahte hnenah, “Kon ram khai ituseh khek dun ai mah le mah a tawngduntu heh a raipui awk tuh lo i. Cen khua ituseh, innsang ituseh, khek dun in mah le mah a tawngduntu heh piak tuh sio i.

²⁶ Ciabang thotho in Satan in Satan lala hnawt lekhaw mah le mah tawng dun imanin akontih in a ram tu kho thil tuh i?

²⁷ Ningmah in, ‘Khuasia a hnawtthilhnak tu Beelzabul in huham a pe manin i,’ tiin iti tlang i si. Ciatih ilekhaw ning hluntute hnenah khuasia hnawt benhnak huham heh aisu in pe ini? Ningmah ning hluntute ai bawnhnak lala in ning sual i tiheh larruai i.

²⁸ Pathian ai pehnak Rauhla thawn kaimah in khuasia hnawt ben manin Pathian Ukhnak tu ning hnenah hleng zo i tihnak i.

²⁹ “Mi hat ngai pa tu amah pen hmasa loin aisu inkhai a inn bal in a thilri lang sah ben tuh lo i. Amah a pen ngah hnua fang ian in a thilri rok sah thil tuh i.

³⁰ “Kaimah hnenah a ṭang lotu heh i raltute i. I khawmpui lotu heh a piakruai tu i.

³¹ Fiang ngai in ning rel ing: minung in zaibang sualhnak bawn ai zaibang pong siava a pong inkhai ngaithiam thil i. Ikhalselai Rauhla Thianghlim a thangsiattu heh ngaithiam tuh lo i.

³² Mi Fapa a relsiatu heh ngaithiam thil tuh i. Ikhalselai Rauhla Thianghlim a relsiatu heh tun san ah ituseh, hmai lam san ah ituseh, ngaithiam tuh lo i.

Thingkung Le A Thai

³³ Thingthai pha nai tuhin thingkung pha nai kul i. Thingkung hnawm nai lesikhaw a thai hnawm tuh i. Thingkung tu a thai in ling thil i.

³⁴ Rul hinte! Mi siava i si ai akontih in pong pha pong thil tuh i si? Ka in thinlung songai a umhnak pong i.

³⁵ Mipha in thil pha a khawlhnak songin thil pha suakruai ai hrokhrawl mite in thil sual a khawlhnak songin thil sual suakruai i.

³⁶ “Thutak ning rel ing: aisu khai ituseh ralring loin a ponghnak heh Thukhanhnak Nia ah zaimanin ciatihin pong ing ti relfiang kul leh tuh i.

³⁷ Na pongkam lala heh na mawh le mawh lo thukhanhnak ah hmang tuh i,” tiin ti i.

Ngaihsunurkul Bawn Ruaihnak

³⁸ Cen Danthiam hrekkhat le Farasi hrekkhat in, “Sayapa, ngaihsunurkul pakhatkhat kin mithmuh ah bawn silai kin daih i,” tiin ti tlang i.

³⁹ Ciafangin Jesuh in, “Tun san minung tu mi pha lo le Pathian kihzah lotute i si! Ngaihsunurkul bawn tuhin i ruai i sim? Bawn tuh lo ing. Prophet Jonah ai ngaihsunurkul siar lo ngaihsunurkul dang hmu tlang tuh lo i si.

⁴⁰ Jonah tu ngapui pum songah ni thum le zan thum a um bangin Minung Fapa khai laipua songah ni thum le zan thum um tuh ve i.

⁴¹ Thukhanhnak Nia ah Nineveh khua mite ding tlang tuhai mawh ning hluk tuh i, zaimantifangin Jonah thurelhnak za fangin amahte sualsir tlang i. Thutak ning rel ing: Jonah tahin a lian sawn heta ah um i.

⁴² Thukhanhnak Nia ah Sheba Kumpibawi nu ding tuhai mawh ning hluk tuh i, zaimantifangin Kumpibawi Solomon fimhnak ling nuam in lamhlapui in hleng i. Fiang ngai in ning rel ing: Solomon tahin lian sawn heta ah um i.

Rauhla Thiang Lo Let I

⁴³ “Rauhla thiang lo heh mi pakhat songin a suak fangin ramkhing ah com hmun si in vak phetpho i. Ikhalselai com hmun a hmu lo fangin,

⁴⁴ ‘I zamhnak inn ah tlung leh tuh ing,’ tiin ruat i. Ciatihin let ngaingai ai a inn tu a lawng niu in ciang ngai in a phiak liang khiah hmu i.

⁴⁵ Cen suak leh ai amah tahin a siava sawn rauhlate pasarih sawm ai ciami inn ah um tlang i; ciatihin a hlan tahin ciami pa tu roh amam i. Cia bangpah in tun san mipha lo pawl vum ahhen hleng tuh i,” tiin ti i.

Jesuh Nu Le A Naute

⁴⁶ Jesuh tu misenpui hnenah a pong hnelhno laiah a nu le a naute kawi tlang i. Amah tawk nuam in sumpua ah ding tlang i.

⁴⁷ Ciata ai um ve tu mi pakhat in, “Na nu le na naute sumpua ah ding tlang i, nangmah na pon nuam i,” tiin rel i.

⁴⁸ Ciafangin Jesuh in, “Aisu heh i nu i? Aisu heh i naute i?” a ti hnuaah,

⁴⁹ a hnuahlunte khiah kawk ai, “Sik tu ih! Heta ah i nu le i naute um i.

⁵⁰ Aisu khai ituseh vancung ai umtu i Pa ai daihhnak a bawntu hmuahhmuah heh i unau, i farnu le i nute ihang,” tiin ti i.