Matthai 10 - Zanniat Bible

A Nalangte Hlaihnih

¹ Jesuh in a nalangte hlaihnih khiah hmun khat ah ko ai rauhla pha lo hnawt thilhnak le urhnak a phunphun cakruai thilhnak huham pe i.

² A nalangte hlaihnih ai hmingte tu, hmasaber ah Simon (Peter tihnak) le a nau Andrew; Zabedi ai fapa James le a nau John;

³ Philip le Bartholomeo, Thomas le siahkhawltu Matthew, Alphaeus ai fapa James le Thaddaeus;

⁴ Phunṭantu Simon le Jesuh a zuartu Judas Iskariot tepawl i.

A Nalangte Hlaihnih Thucahhnak

⁵ Hemite hlaihnih tu Jesuh in hlat ai phatak niu in thucah i, “Gentile ramah feh mah ilai Samaria khua songah lut mah ih.

⁶ Ciahnak tahin a paimi tuurual Israel mite hnenah feh tu sawn ih.

⁷ Feh tu ilai, “Vancung ukhnak nong zo i,’ tiin rel tu ih.

⁸ Miurte cakruai tu ih, mithite thoruai tu ih, mipharte cianghlimruai tu ilai khuasiate hnawt tusek ih. Man loin ning ngahhnak khiah man loin pe tu ve ih.

⁹ Ning angki dip ah sui tangka ituseh, ngun tangka le dar tangka ituseh, pai mah ih.

¹⁰ Ning khualtlawnhnak lampui caah rongngenhnak tuhin dip ituseh, angki hlai ituseh, kedawl le faikiang ituseh, keng mah ih. Napertu pa tu a samhnak hmuahhmuah pe in um tuh i.

¹¹ Khuapui ituseh, khuatenau ituseh ning hleng fangin ang ngai in tlun inn ning hontu inn ah lut tu ilai ning feh leh hlan tian cia inn ah cam tu ih.

¹² Inn songah ning lut fangin ‘Ning hnenah daphnak um tu hram seh,’ tiin ti tu ih.

¹³ Ciami inntute in tlun inn ning hon lekhaw daphnak hrang hmuifu ning pehnak heh ciami inn ah um tuseh. Ikhalselai tlun inn ning hon hlah lekhaw daphnak hmuifu ning pehnak heh lang leh tu ih.

¹⁴ Cen aisu inkhai tlun inn ning hon lo ai ning thu khai ngai nuam tlang hlah lekhaw cia hmun heh zam tu ilai ning keborh thin tu ih.

¹⁵ Thutak ning rel ing. Thukhanhnak nia ah Pathian in cia khua mite tahin Sodom le Gomorrah khua mite vumah ninghiohnak tam deuh nai tuh sawn i,” tiin rel i.

A Hleng Tuhlai Reemhnak

¹⁶ Ngai tu ih! mehleng puar rual lakah tuu hlathnak bangin ning hlat ing. Ciamanin rul bangin fim tu ilai khuro bangin ning nunnem tu ih.

¹⁷ Ralring tu ih, zaimantifangin ningmah ning pomtu tuhin minungte suak tuh i; zung ah ning hlenpui tuhai synagogue ah ning vit tuh i.

¹⁸ Kaimah manin uktu le kumpibawite hmaiah ning hlen tuhai amahte le Gentile mite hnenah i thu hlengruaitu ning cang tuh i.

¹⁹ Thukhanhnak hmunah ning hlen fangin ziang rel tuh i ing tiin le zaitin rel tuh i ing, tiin ning donhar mah ih. A can a khim fangin ning rel tuhhnak tu ning lingruai leh tuh i.

²⁰ Zaimantifangin a pongtu tuh heh ningmah ilo i si. Ning Pa ai Rauhla in ningmah hmangin pong tuh i.

²¹ “Mi in amahte unau lala khiah rek tuhin midang kut ah hlengruai tuh i. Pate inkhai amahte fate vumah cia bang thotho in bawn tlang tuh i. Fate inkhai amahte pate ral can tuhai midang kut ah hlen tuh i.

²² Kaimah hming manin mi zongzong in ning cim tuh i. Ikhalselai a tawphnak nia tian a kang bentu incen ohnak ngah tuh i.

²³ Khua pakhat ah ning cawh lekhaw a dang pakhat ah thawn tu ih. Fiang ngai in ning rel ing: Minung Fapa a hleng hlanah Israel ram song khua hmuahhmuah ai ning naṭuan ben man tuh lo i si.

²⁴ “Tlawngta in a saya khiah hlaih awng lo i. A bawipa tahin a lian sawn sal aisu khai um lo i.

²⁵ Ciamanin tlawngta pakhat khiah a saya tluk lekhaw lungkhim tuhhnak i; sal khai a bawipa tluk lekhaw lungkhim tuhhnak i. Innsang ai a luber khiah khuasia bawi Beelzabul tiin ko lekhaw innsang song um midangte tu cia tahin hmingsia deuh in ko tuhhnak i.

Aisu Kih Tuh Um I?

²⁶ Ciamanin minung kih mah ih. Tunai a thuphnak heh hong tuh sio ai thuthup hmuahhmuah khai phuang leh tuh sio i.

²⁷ Khuathim lakah i relhnak heh sun khuavar ah rel leh tu ilai a thup ai ning linghnak heh innphu vuman phuang tu ih.

²⁸ Taksapum rek ben napui rauhla rek ben lotute tu kih mah ih. Taksa le rauhla a pahnih in hell songah a rekthaitu Pathian kih tu sawn ih.

²⁹ Paisa fangkhat in kawlva pahnih lai thil ilo i sim? Ikhalselai ciami kawlva pakhat rin ning Pa ai thu loin laipua lakah tlok lo i.

³⁰ Ningmah amam tu ning samfang rin siar sio i.

³¹ Ciamanin ning thinlau mah ih. Kawlva tampui tahin ning man khung sawn i.

Mi Hmaiah Khrih Ṭanhnak

³² “Mi pakhat in misenpui hmaiah i minung a ihnak khiah i ṭan ngam lekhaw vancung i Pa hmaiah amah ṭanpui tuh ve ing.

³³ Ikhalselai misenpui hmaiah i hnawltu heh vancung i Pa hmaiah hnawl tuh ve ing.

Remhnak lo, Ralvang Sawn

³⁴ “Laivum ah remhnak hlengruaitu tuhin kawi ing tiin i ruat mah ih. Remhnak bawn tuhin kawi lo ing, ralvang awh in kawi sawn ing.

³⁵ Pa le fapa, nu le fanu, ni le a monu, ral dun tuhin kawi ing.

³⁶ Mi pakhat ai a kihkulber ral heh amah ai innsang mi i tuh i.

³⁷ Aisu khai ituseh, kaimah tahin a nu le a pa a it sawntu heh i hluntu tuhin tlak lo i. Kaimah tahin a fanu ituseh, a fapa ituseh, daih sawn lekhaw i hluntu tuhin tlak lo i.

³⁸ Aisu khai ituseh, amah thinglamteh phur kongin i hnua i hlun lotu khiah i minung cang tuhin tlak lo i.

³⁹ Amah ai nunhnak hup a tumtu heh a nunhnak sung tuh i, ikhalselai kaimah manin a nunhnak a liamtu heh a nunhnak hup ngah tuh i.

Phatman Ngah Tuh I

⁴⁰ Ningmah tlun inn ning hontu heh kaimah tlun inn i hontu ve i; kaimah tlun inn i hontu in i hlattu khai hon ve i.

⁴¹ Pathian thureltu tlun inn a hontu heh Pathian thu phurtu tlun inn a hon manin a thurelhnak phatman zarto tuh ve i. Mi pha pakhat tu mi pha a imanin tlun inn a hontu heh cia mipha pa ai phatman hlawm tuh ve i.

⁴² Fiang ngai in ning rel ing; i hnuahlunte lakah a nauta ber heh i hnuahluntu a imanin tidap khuat khat a petu khiah phatman ngah tuh tengteng i,” tiin ti i.