Marka 9 - Zanniat Bible

¹ Thutak ning rel ing; heta ai a umtu mi hrekkhat heh Pathian Ukhnak huham thawn a hleng hmu tlang hlanlo thi tuh lo i,” tiin ti i.

Jesuh Hmuihmel Thlenghnak

² Ni ruk hnuaah Jesuh in Peter le James le John heh fehpui ai mual vumah amahte lek kaipui i. Anite mithmuh ah Jesuh tu a hmuihmel thleng dun i;

³ a hnikpon tu a tleu in tleu ai minung in zaitlukin sawp khalselai ciatluk in tu tleu tuh awng lo i.

⁴ Cen hnuahlunte pathum incen Elijah le Moses thawn Jesuh tu a pon dun hnelhno in hmu i.

⁵ Peter in Jesuh hnenah, “Sayapa, heta ah kin um heh a pha ngai i! Hlam pathum in sa ngasing; nangmah caah pakhat, Moses caah pakhat, cen Elijah caah pakhat” tiin ti i.

⁶ Zaimantifangin Peter le a rualpuite tu thinlau tlang ze ai zai pong tuh pha ling tlang lo manin i.

⁷ Cia hnuaah mairo zam ai amahte vuman khuk sio i, cen mairo songin, “Hemi tu i ithnak i Fapa i, a thu ngai tu ih,” tiin ti i.

⁸ A hnuahlunte pathum tu amahte hiang sik tlang hnelhno napui aisu khai hmu lo i; Jesuh ian amahte hiangah um khiah hmu i.

⁹ Mual vuman a tolh laitak ah Jesuh in, “Mi Fapa heh thihhnak in a tho leh hlan tu ning hmuhnak heh aisu khai rel tuh lo i si!” tiin thupe i.

¹⁰ Ciami a thupehnak khiah hlun tlang i; ikhalselai, “Thihhnak in tho leh,” tihnak tu ziang heh ini? tiin pakhat le pakhat zawt dun hnelhno i.

¹¹ Cen Jesuh tu, “Zaimanin Danthiam mite in Elijah kawi hmasa tuh i, ti tlang ini?” tiin zawt tlang i.

¹² Jesuh in, “Zaizongza ralring tuhin Elijah tu kawi tuh rori i. Ikhalselai zaimanin Lai Thianghlim in ‘Mi Fapa tu a roh ngai in tuar tuhai hnawl khai hnawl tlang tuh i,’ tiin ti ini?

¹³ Thungai ning rel ing; Elijah tu hleng zo ai, Lai Thianghlim in a relciahnak bangin minung in amahte nuamnuam in bawn zo i,” tiin ti i.

Ramhuai Molhmi Naupang Cakruai

¹⁴ A hnuahlunte hnen a hleng fangin a hiang cingkim ah miburpui in kulh tlang ai Danthiam mite hrekkhat le hnuahlunte tu thu el dun tlang hnelhno khiah hmu i.

¹⁵ Mizapui in Jesuh tu a hmu fangin mangbang tlang ngai ai a hmuak tuhin dawp murhmo i.

¹⁶ Jesuh in a hnuahlunte khiah, “Anite thawn ziang el dun hnelhno i si?” tiin zawt i.

¹⁷ Mizapui lakai mi pakhat in, “Sayapa, i fapa na hnenah koih nangkhaw; zaimantifangin ramhuai in molh ai pong khai pong thil lo i.

¹⁸ Ramhuai in a molh fangin tu, laipua lakah leu dekde ai a cilbuan khai suak ai a kamriat in a pumpuhluk khai khang meng de i. Cia ramhuai hnawtsuak tuhin na hnuahlunte rel napui zaikhai ti ben tlang lo i,” tiin ti i.

¹⁹ Jesuh in anite hnenah, “Aw sanghnak nai lo minungte! Ning hnenah zaikom tian um tuhlai ing? Zaikom tian ning or tuhlai ing? Naupang pa khiah i hnenah koih tu ih,” tiin ti ai,

²⁰ Jesuh hnenah koih tlang i. Ramhuai in Jesuh a hmu sawng fangin naupang pa tu khang meng ai laipua lakah tlu i, leu hnelhno ai a ka in cilbuan suak diamdo i.

²¹ Jesuh in, “Hetih ai a canghnak heh rai aw hang im?” tiin a pa zawt i. A pa in, “A sen lai in cang zo i.

²² Vel tampui ramhuai in rek tuhin mai song le ti songah paih de i. Na bawn thilhnak lekhaw ning i hio tulai i bawm tu hram law,” tiin ti i.

²³ Jesuh in, “Na bawn thilhnak lekhaw, ti isi. I, sanghnak naitu ca ahcen zaizongza cang thil i,” ti i.

²⁴ Ciapa in cia sawngpah in, “Sang ing; i sang samhnak i bawn tu,” tiin au dekdo i.

²⁵ Jesuh in mizapui heh a hiangah kawi tlang betbo ti a hmu fangin ramhuai khiah thupe ai, “Na ngong le pongthiam lo rauhla sia, he naupang pa songin suak tulai lut leh nawn mah, tiin thu na pe ing,” tiin ti i.

²⁶ Ramhuai tu au hiangho ai naupang pa khang meng in tluruai hnuaah a songin suak i. Naupang pa khiah mithi bang cang ai mi tampui in, “Thi zo i,” tiin ti tlang i.

²⁷ Ikhalselai Jesuh in naupang pa khiah a kut in duk ai ding i.

²⁸ Jesuh tu inn songah lut ai hnuahlunte in a thupniu in, “Zaimanin kin in tu hnawt ben lo i ing?” tiin zawt tlang i.

²⁹ Jesuh in, “Sawngenhnak ti siar lo, thil dang zai inkhai hebang heh hnawt thil tuh lo i,” tiin rel i.

A Thi Tuh Rel Lehthio I

³⁰ Jesuh le a hnuahlunte tu ciata in suak tlang ai Galilee peng tan kongin feh tlang i. Jesuh in a hnuahlunte thuzirh kong betbo manin aisu inkhai amahte umhnak ling tuh daih tlang lo i.

³¹ Zaitin zirh i tifangin: “Mi Fapa heh mi kut ah hleng tuhai rek tuh i. Ikhalselai ni thumhnak ah tho leh tuh i,” tiin ti i.

³² Ikhalselai ciatih ai a zirhhnak heh ling thil tlang lo i. A zawt tuh le ngam tlang lawnsi lo i.

Aisu Lianber I?

³³ Capernaum khua hleng ai inn songah a lut tlang hnuaah Jesuh in a hnuahlunte khiah, “Lam lakah ziang thu el dun tlang hnelhno i si?” tiin zawt i.

³⁴ A thu zawthnak tu aisu inkhai sawn lo i, zaimantifangin lam lakai amahte eldunhnak tu amahte lakah aisu lianber i, tihnak i.

³⁵ Jesuh tu to ai hnuahlunte hlaihnih ko ai anite hnenah, “A lianber a cang nuamtu heh mi nauta cang hmasa tuhai mi zongzong naruaihtu i tuh i,” tiin ti i.

³⁶ Cen naupang pakhat ko ai anite hmaiah a dingruai hnuaah,

³⁷ “Aisu khai ituseh i hming in hebang naupang a cosangtu in kaimah i cosang i; cen kaimah i cosangtu in i hlattu khai cosang i,” tiin ti i.

I Engsanlotu Heh Kin Lam Ṭang I

³⁸ John in, “Sayapa, na hming in khuasia a hnawttu mi pakhat hmu ai kin lakah a teltu ve ilo manin kham tlang i ing,” tiin ti i.

³⁹ Jesuh in, “Kham mah ih! Zaimantifangin i hming in ngaihsunurkul a bawntu in i relsia tuh lo i.

⁴⁰ Zaimantifangin i engsan lotu heh kinmah lam a ṭangtu i.

⁴¹ Thutak ning rel ing: I minung ning imanin ti khuat khat ning petu heh phatman ngah tuh tengteng i,” tiin ti i.

Sualforhhnak Thu

⁴² Jesuh in, “Aisu khai ituseh hebang naupangte pakhatkhat kaimah i rinsanhnak in a pialruaitu heh a hawng ah fang rialhnak lungrial orh in tifingriat songah hla heh amah caah pha sawn i.

⁴³ Ciamanin na kut in na sanghnak na pialruai lekhaw na kut cem tu! Na kut pahnih thawn a hmit awng lo hell maipui songah na tlok tahin kut pakhat lek thawn nunhnak songah lut silai na pha sawn i.

⁴⁴ Amah a aitu zang tu thi awng lo ai a kangtu maiko khai a dit awng lo i.

⁴⁵ Cen na ke in na sanghnak na pialruai lekhaw na ke heh cem tu. Na ke pahnih thawn hell songah na tlok tahin ke pakhat lek thawn nunhnak songah na lut khiah pha sawn i.

⁴⁶ Cia hmunah amahte a aitu zang tu thi awng lo ai amahte a kangtu mai tu hmit awng lo i.

⁴⁷ Cen na mit in na sanghnak na pialruai lekhaw na mit heh phorh tu. Mit pahnih thawn hell songah na tlok tahin mit pakhat lek thawn Pathian Ukhnak songah na lut khiah pha sawn i.

⁴⁸ Ciata ah ‘Amahte a aitu zangte tu thi awng lo ai amahte kangtu maipui khai a dit awng lo i.’

⁴⁹ “Hibawlhnak sa tu ci in a ciangfairuai bangin mi zongzong maipui in ciangfairuai tuh sio ve i.

⁵⁰ “Ci tu a pha i. Ikhalselai a alhnak pai lekhaw akontih in alruai thil leh tuh isi? “Ci bangin a phami pawlkomhnak nai tu ilai pakhat le pakhat rualrem niu in um tu ih,” tiin ti i.