Marka 4 - Zanniat Bible

Hlaici Pawitu Santehhnak

¹ Jesuh in Galilee Tili kamah thu zirh lehthio i. A hiangah a khawmtu minungte tam ze lawmlam manin lawng songah lut ai to i. Lawng heh ti vum a hla thah ah um ai misenpui tu tili kam ti rong tianin ding tlang i.

² Santehhnak hmang in thu tampui zirh i.

³ Jesuh in, “Ngai tu ih: Vaikhat laiah mipa pakhat um ai hlaici pawi tuhin lo ah feh i.

⁴ Lo songah hlaici a pawi fangin a hrekkhat tu lam dunghlun ah tlok ai vaniu in khul sek i.

⁵ A hrekkhat tu laipua tlawmhnak lung lakah fu i. Lai a sah lo manin hlaici tu cammalak in po i.

⁶ Ikhalselai ni a sa fangin rong kung a po sawngniu pawl vumah sa i. A ham a thuk lo manin rong po heh ro sek i.

⁷ A hrekkhat tu hlingbur lakah tlok i; hlingkungte khang tlang ai rongpo heh det ai a vui le a thai nai thil loin um i.

⁸ Ikhalselai hlaici hrekkhat tu laipua phahnak ah tlok i, pha ngai in po ai khang ai a vui nai i. A hrek tu a let sawmthum, a hrek tu a let sawmruk, a hrek tu a let zakhat tianin rong thar suak i,” tiin rel i.

⁹ A tawphnak ah, “Ngaihnak bil a naitu in za tu ih,” tiin ti i.

Hemi Santehhnak Ai Tumtekhnak

¹⁰ Jesuh tu amah lek a um fangin a thurelhnak a za awngtu hrekkhat le hnuahlunte hlaihnih a hnenah kawi tlang ai a santehhnakte relfiang tuhin ngen tlang i.

¹¹ Jesuh in, “Pathian Ukhnak thuthup heh ning hnenah ning pe zo i. Ikhalselai pualam ai a umtute tu santehhnak ian in rel i;

¹² Ciamanin, ‘Sik tlang tuh hnelhno napui hmu tuh lo i; Ngai tlang tuh thliahthlo napui za tuh lo i. Zaimantifangin anite in hmu thil ai za thil lekhaw, Pathian hnenah amahte khiah let tuhai amahte sualhnak ngaithiam tuh i,” tiin ti i.

Hlaici Pawi Santehhnak Relfiang I

¹³ Cen Jesuh in, “Hemi hlaici pawi santehhnak heh ling thil lo i sim? Ciatih ilekhaw akontih in a dang santehhnakte khai ling thil tuh i si?

¹⁴ Hlaici pawitu in Pathian thu pawi i.

¹⁵ Mi hrekkhat tu lampui tluan ai a tlokhnak hlaici bang i. Pathian thu tu za tlang i, ikhalselai a za sawng fangin Satan kawi ai amahte songai pawihnak thu heh lang sah i.

¹⁶ Mi hrekkhat tu lungrual lakai a tlokhnak hlaici bang i. Pathian thu a za sawng fangin lungawi ngai in pom tlang i.

¹⁷ Ikhalselai amahte songah a thukpui in phum lo manin a raipui rai lo i. Ciamanin Pathian thu manin harsahnak le cawhhnak a hleng fangin cammalak niu in let tlang leh i.

¹⁸ Mi hrekkhat tu hlingbur lakai a tlokhnak hlaici bang i. Pathian thu tu za ngah tlang i,

¹⁹ ikhalselai he laivum nunhnak thu ai donharhnak, lian nuamhnak le daihhnak a dang le panhlahhnak dangdang in pen meng ai khuk meng manin a thai nai thil lo i.

²⁰ Midang tu laipua pha ai a tlokhnak hlaici bang i. Pathian thu tu za tlang i, kho ngai in pom ai a thai nai tlang i. Let sawmthum, let sawmruk le let zakhat tianin thai tlang i,” tiin ti i.

Kho Hnia Ai Maikhuat

²¹ Jesuh in, “Aisu tal in maikhuat heh kho hniaah ituseh, khuahluan hniaah ituseh dah awng aw isim? Maikhuat varhnak tung vumah dah de ilo i sim?

²² A ningnawi ai thuphnakte heh misenpui hmuh ah larruai tuhai a thupruk ai bawnhnak khiah phuang tuh sio i.

²³ Ngaihnak bil a naitu in za tu ih,” tiin ti i.

²⁴ Jesuh in anite hnenah, “Ning zahnak khiah phatak niu in ruat tu ih. Midang tehhnak ai ning hmanghnak khiah Pathian in ningmah tehhnak ah hmang tuh ve i, ciatah in a roh sawn inrin hmang tuh i.

²⁵ A naitu heh bet tuhai a nai lotu heh a naihsun rin lang sah tuh i,” tiin ti i.

A Khangmi Hlaici Santehhnak

²⁶ Jesuh in, “Pathian Ukhnak tu hebang i. Mi pakhat in a lo ah hlaici pawi i.

²⁷ Zan ah mitmu ai, zing fangin tho ai sun fangin naper i, cia songah hlaici po ai khang i. Ikhalselai akontih in ciatihin cang i, ti ling lo i.

²⁸ Lai in hlaici po heh khangruai ai a thai nairuai i, a hmasaber ah a hnah dawn suak i, cia hnuaah a vui nai ai a hnuataber ah a mu um i.

²⁹ A mu a cu fangin napertu pa in fang at can a cu manin fang athnak vangkawn in at i,” tiin ti i.

Pakap Ci Santehhnak

³⁰ Jesuh in, “Pathian Ukhnak tu zaibang i, tiin ti tuh ini sing? Relfianghnak ah ziang santehhnak lang tuh ini sing?”

³¹ Pakap ci bang i. Mi pakhat in laivum ai hlaici a cik ber pakap ci lang ai laipua ah vorh i.

³² A rai hlanah po ai a dang rongkungte tahin a lianber ah cang i. A kak lian puipui khai nai ai vaniute khai a hnah hnem ah bu khai sa tlang i,” tiin ti i.

³³ Hemi bang santehhnak dangdang khai hmang ai amahte hnenah a ling thil thai tawp in thurel i.

³⁴ Santehhnak hmang loin amahte hnenah thurel awng lo i. Ikhalselai a hnuahlunte thawn amahte lek a um tlang fangin zaizongza fiang ngai in rel i.

Jesuh In Khuahu Dapruai I

³⁵ Cia nia zan lam fangin Jesuh in a hnuahlunte heh, “Tili ai khat lam ralah feh tuh ising,” tiin ti i.

³⁶ Ciamanin misenpui heh hlum ai hnuahlunte tu lawng songah lut tlang i. Ciami lawng songah Jesuh tu to zo ai lawng in fehpui i. Ciata ah a dang lawngte khai um i.

³⁷ Mangrin loin khuahu a roh ngai in zuang ai tilep tho khiah lawng songah lut diamdo ai ti in dim dawn ihang.

³⁸ Jesuh tu lawng mai lamah um ai tohkham vumah mitmu i. Hnuahlunte in phawr ai, “Sayapa, kin thi tuh sek heh poi ti lo isim?” tiin ti tlang i.

³⁹ Jesuh tu tho ai khuahu heh, “Zuang nawn mah!” tiin thupe ai tilep khiah, “Dap tu!” tiin ti i. Ciafangin khuahu tu zuang nawn loin um ai tilep khai dapkhep i.

⁴⁰ Jesuh in a hnuahlunte hnenah, “Zaimanin ciatih lawmlam in ning lau tlang i? Sanghnak nai lo i sim?” tiin ti i.

⁴¹ Ciafangin ngaihsunur tlang ai pakhat le pakhat, “Hemi pa tu aisu ber ini? Khuahu le tilep inrin a thu ngai i!” tiin ti dun tlang murhmo i.