Marka 3 - Zanniat Bible

Kut Ze Pa

¹ Cen Jesuh tu synagogue ah feh lala ai ciata ah kut ze pa pakhat hmu i.

² Jesuh mawhhluk a nuamtute khai um tlang ai Sabbath nia ah cakruai tuh maw cakruai tuh lo tiin phatak niu in sik tlang i.

³ Jesuh in ciami pa tu, “Hmai lamah suak tucuk law,” tiin ti i.

⁴ Cen ciami pa tu, “Kin dan in Sabbath nia ah ziang bawn tuh kin hon pa? Mi bawm tuh maw harsahnak pe tuh kin hon i? Mi nunhnak o tuh maw siatsuah tuh sawn i?” tiin zawt i. Ikhalselai anite tu kamkhat khai pong ben tlang lo i.

⁵ Jesuh in a thinraw in sik zianzo ai amahte thinlung ruhdan a hmu fangin a lungsia ngai fawn i. Cen ciami pa tu, “Na ban dang tu,” ti i. A ban khiah dang ai cak peu zual i.

⁶ Ciafangin Farasite tu Synagogue in suak tlang ai Herod ai minungte thawn Jesuh rek thilhnak tuhin thu ruat khawm tlang i.

Tili Kamah Miburpui

⁷ Jesuh le a hnuahlunte tu Galilee Tili ah feh tlang i; miburpui in Jesuh hlun tlang i. Anite tu Galilee peng, Judea peng,

⁸ Jerusalem khua, Idumea peng, Jordan Runpui in nisuah lam ram, Tyre le Sidon hiangai ramte tianin a kawitute i. Jesuh ai thil bawnhnak tepawl a za tlang manin a kawitute i.

⁹ Minung a tam ze lawmlam manin cil dun dekdo pang fangin ti a lau manin hnuahlunte khiah khawm pakhat ralring in dahruai i.

¹⁰ Mi tampui cakruai ai miur hmuahhmuah in a dai ngah thil tuhin nor tlang dekdo i.

¹¹ Cen khuasia ai molh mite in a hmu fangin a hmaiah bok tlang ai, Nang tu Pathian ai Fapa isi,” tiin au tlang dekdo i.

¹² Jesuh in ciami khuasia molh mite tu amah heh aisu i, ti rel tuh loin thupe i.

Jesuh In Hnuahlunte Hlaihnih Ril I

¹³ Cen Jesuh tu mual vumah kai ai a hnenah a daihhnak mite ko i. A hnenah kawi tlang ai,

¹⁴ Minung hlaihnih ril ai ‘Nalangte,’ tiin ko i. “I hnenah um tuhin ning ril ing. Cen thurel tuhin ning hlat tuhai,

¹⁵ khuasia hnawtthilhnak thu khai nai tuh i si,” tiin ti i.

¹⁶ Hlaihnih a ril mite tu hetihin i. Simon (Peter ti ai hming a bawnhnak),

¹⁷ Zabedi ai fapa James le a naupa John (Jesuh in Boanerges tiin a hming bawn i, a sullam tu ‘Khuari Fa,’ tica i).,

¹⁸ Andrew, Philip, Bartholomeo, Matthew, Thomas, Alphaeus ai fapa James, Thaddaeus, Phunṭantu Simon le

¹⁹ Jesuh a zuartu Judas Iskariot tepawl i.

Jesuh Le Beelzabul

²⁰ Cen Jesuh tu a inn ah tlung i. A hmasa ai bangin mi tampui kawi tlang ai Jesuh le a hnuahlunte tu rong ai can rin nai tlang lo i.

²¹ Ciami thu tu a songkhatte in za fangin, “Jesuh tu voi zo i,” tiin mi in ti tlang fawn manin amah kilkhawl tuhin feh tlang i.

²² Jerusalem an a kawitu Danthiam mite hrekkhat in Jesuh tu ‘Beelzabul in pom ngah zo i. Khuasia uktu bawi ai huham in khuasiate hnawt ben i,” tiin ti tlang i.

²³ Ciamanin Jesuh in ko ai anite hnenah santehhnak thurel i. “Akontih in Satan in Satan lala tu hnawt thil tuh i?

²⁴ Ram pakhatkhat heh ram khan tampui in khan ai amahte le amahte tawng dun lekhaw cia ram heh piak tuh sek i.

²⁵ Innsang pakhat songah pakhat le pakhat tawng dun ai vit dun lekhaw ciami innsang heh piak tuh sek i.

²⁶ Ciabang pah in Satan in Satan lala hnawt lekhaw a khek tlang manin amahte ram heh a rai awk tuh lo ai siatral tuh i.

²⁷ “Mihat pa heh amah pen hmasa loin aisu inkhai a inn bal in a thilri lang sah thil tuh lo i.

²⁸ “Thutak ning rel ing: minung heh zaibang in sual ai pong siava tian a pong inkhai ngaithiam tuh i.

²⁹ Ikhalselai Rauhla Thianghlim a thangsiattu heh ngaithiamhnak ngah tuh lo i, zaimantifangin kumzangza ca sualhnak bawn i,” tiin ti i.

³⁰ Jesuh tu “Khuasia a songah lut i,” tiin ti tlang manin Jesuh in hetihin a ponghnak i.

Jesuh Nu Le A Naute

³¹ Cen Jesuh ai nu le a naute kawi tlang i. Sumpua ah ding tlang ai inn songah mi pakhat Jesuh ko tuhin ruai i.

³² A hiangah mi tampui to tlang ai anite in, “Sik tu, na nu le na naute le na farnute sumpua ah um tlang i, nangmah na poi i,” tiin ti tlang i.

³³ Jesuh in, “Aisu heh i nu i? I naute tu aisu i?” ti i.

³⁴ A hiangai a totu misenpui sik kongin, “Heta ah i nu le i unaute um hlen i.

³⁵ Aisu khai ituseh Pathian daihhnak a bawntu hmuahhmuah heh i unau, i farnu le i nute i,” tiin ti i.