Marka 14 - Zanniat Bible

Jesuh Zuarhnak Tawlrel I

¹ Kansuak Puai le Col tello sang puai a khimhnak tuh ni hnih ian sam ihang. Suangbawi upate le Danthiam mite in Jesuh tu a thupniu in pom in rek thilhnak lampui si tlang i.

² Ikhalselai, “Puai can laiah tu bawn tuh lo ising, mizapui in hnaihnokhnak suakruai pang fangin,” tiin ti tlang i.

Bethany Ah Thau Pawh Tlang I

³ Jesuh tu Bethany khua, phar ur a tuartu Simon inn ah um ai rong a ai lakah nupang nu in alabaster thawl pakhat in a mankhung rimhmui a dim in keng i. Cia thawl heh seu ai rimhmui khiah Jesuh lu ah burh i.

⁴ Ciata ai a umtu mi hrekkhat tu thinraw tlang ai, “Pamhmaih kul ze aw!

⁵ Rimhmui tu ngun tangka za thum tahin tam ah zuar in ciami tangka in mifarah bawm selai pha sawn lo im?” tiin pakhat le pakhat ti dun ai cia nu heh mawhhluk tlang murhmo i.

⁶ Ciafangin Jesuh in, “Zaikhai ti mah ih! Zaimanin hnoksak hnelhno i si? Hemi nu in thil pha le thil mawi bawn i.

⁷ Mifarahte tu kumzangza in ning hnenah um tuhai ning nuam lekhaw zaikom inkhai bawm thil i si. Ikhalselai kai tu ning hnenah um tuh ngio lo ing.

⁸ A bawn thil tawk in bawn zo i. I taksa pum vumah rimhmui a burhhnak heh kaimah vuihnak tuhin hlanvom in a pai cia i.

⁹ Fiang ngai in ning rel ing: Laivum pumpuhluk Thuthangpha relhnak hmuncang ah a bawnhnak heh amah hihhnak ah rel tlang tuh ṭiode i,” tiin ti i.

Judas In Jesuh Zuar I

¹⁰ Cen hnuahlunte hlaihnih lakai pakhat Judas Iskariot tu Jesuh zuar tuhin suangbawi upate hnenah feh i.

¹¹ Anite hnenah a ponghnak tepawl za fangin lungawi ngai ai tangka pe tuhin thukham tlang i. Cen Judas in Jesuh a zuar ngah ai amahte kut song a hlengruai thilhnak tuhin can pha bawh i.

Hnuahlunte Thawn Zanfak Ai I

¹² Col tello Sang Puai ni khathnak nia, Kansuak Puai rongdohnak hrang tuu faniute a ro nia ah hnuahlunte in, “Akon ah Kansuak Puai zanfak na bawn sah cia tuhin na daih i? tiin Jesuh zawt tlang i.

¹³ Cen Jesuh in mi pahnih hlat ai hetihin thucah i, “Khuasong ah feh tu ilai tithawl in ti a phurtu pa thawn tawk dun tuh i si. Ani tu hlun tu ilai,

¹⁴ a luthnak inn ai inn naitu pa hnenah ‘Sayapa in amah le a hnuahlunte Kansuak Puai zanfak a aithilhnak tuhin inn khan akonmi i? tiin zawt tu ih,’ kin ti i,” ti kawm tu ih.

¹⁵ Cen ani in vumta khan lianpui ning hmuh tuh i. Zaizongza phatak niu in le a khimliang in a paiciahnak khan i tuhai ciata ah zanfak aihnak tuh bawn tu ih,” tiin ti i.

¹⁶ Hnuahlunte tu feh tlang ai khuasong a hleng fangin Jesuh ai relciahnak bangin zaizongza hmu i. Ciata ah Kansuak Puai zanfak bawn tlang i.

¹⁷ Zan lam fangin Jesuh tu a hnuahlunte hlaihnih thawn kawi tlang i.

¹⁸ Cabuai ah rong a ai laitak ah Jesuh in, “Fiang ngai in ning rel ing: Ningmah lakah pakhat, kaimah thawn rong a aitu pa in i zuar tuh i,” tiin ti i.

¹⁹ Hnuahlunte tu thinnuam lo ai pakhat hnua pakhat in, “Na ti nuamhnak heh kaimah ing maw?,” tiin ti ṭen i.

²⁰ Jesuh in, “Ningmah hlaihnih lakah a teltu, kaimah thawn hleng khat songai sang a nimtu pa i tuh i.

²¹ Mi Fapa tu thihhnak tuar tuh i, tiin Lai Thianghlim ai a tihnak bangin thi tuh i. Ikhalselai he Mi Fapa a zuartu ca ahcen a hmai lam pit i! Te lo lawlaw in um ta selai amah ca ahcen pha sawn tuh napui i!” tiin ti i.

Bawipa Ai Zanfak

²² Zanfak a ai tlang laitak ah Jesuh in sang lang ai saw a ngen hnuaah sang heh khan ai a hnuahlunte hnenah pe i. “Hemi heh i taksa i; lang tu ilai ai tu ih,” tiin ti i.

²³ Cia hnuaah khuat lang ai Pathian hnenah anghnak saw a ngen hnuaah anite hnenah pe ai a veksen in ding tlang i.

²⁴ Jesuh in, “Hemi heh mi tampui caah i luangruaihnak i thisan i; Pathian thukhamhnak a khoruaitu i thisan i.

²⁵ Fiang ngai in ning rel ing: Pathian Ukhnak songah cabit thar i ding hlanlo he cabit heh ding tuh nawn lo ing,” tiin ti i.

²⁶ Cen la sa tlang hnuaah suak ai Olive Mual ah feh tlang i.

Peter Ai El Tuh Relciahnak

²⁷ Jesuh in anite hnenah, “Ning veksen in i zam tuhai tlan tuh sek i si’ Zaimantifangin Lai Thianghlim songah ‘Pathian in tuukhaltu heh rek tuhai tuute piak tuh sek i,’ tiin ngan cia in um i.

²⁸ Ikhalselai thihhnak in i thoruai leh hnuaah ning hmaiah Galilee ah feh tuh ing,” tiin ti i.

²⁹ Peter in, “Midang in na zam khalselai kai incen na zam tuh hrimhrim lo ing,” tiin ti i.

³⁰ Jesuh in Peter heh, “Fiang ngai na rel ing: tun zan ar vel hnih a khuang hlanah vel thum tian ‘Ling lo ing,’ tiin i el tuh isi,” ti i.

³¹ Peter in roh amam in, “Na hnenah thi ve tuhin rin ciatihin tu pong tuh hrimhrim lo ing,” tiin ti i. A dang hnuahlunte inkhai ciatihin ti tlang ṭen i.

Gethsemane Ah Sawngen I

³² Gethsemane tihnak vuandum hleng tlang fangin Jesuh in a hnuahlunte hnenah, “I sawngen lak he hmunah um tu ih,” tiin ti i.

³³ Peter, James, le John fehpui i. Thinnau le thinhar in um tlang ai,

³⁴ anite hnenah, “I thinlung heh lungsiahnak in a dim ze manin a khoi tuh sek bang i. Heta ah um tu ilai mitmu loin i iang tu ih,” tiin ti i.

³⁵ Hmai ah tlawmniu feh ai laipua ah bok in sawngen i. Cang thil lekhaw ciami harsahnak heh tawk tuh loin ngen i.

³⁶ “Abba, I Pa! Nangmah ca ahcen zaizongza cang thil sio i. Hemi tuarhnak khuat heh i hnenin lang tu hram law. Ikhalselai i diahhnak bang ilo in, na daihhnak bang ituseh,” tiin ti i.

³⁷ Cen let ai hnuahlunte pathum mitmu tlang khiah hmu i. Peter hnenah, “Simon, mitmu isim? Nazi pakhat song rin mitmu loin i iang ben hrimhrim lo isim?” tiin ti i.

³⁸ Cen anite hnenah, “Mitmu loin iang tu ilai sualforhhnak songah tlok tuh loin sawngen tu ih. Thinlung incen nuam napui ning taksa tu a thazang tlawm i,” tiin ti i.

³⁹ Jesuh tu feh lehsal ai a hmasa bangin sawngen lala i.

⁴⁰ Cen let lehthio ai hnuahlunte mitmu tlang sio khiah hmu i; mitthak ben tlang tau lo i. Akontih in sawn tuh ti khai ling tlang lo i.

⁴¹ A vel thumhnak a let fangin anite hnenah, “Mitmu tlang lai thotho i sim? Cawlum thil tlang lai i sim? Ca zo i! A can hleng zo i! Sik tu ih! Mi Fapa khiah misualte kut songah pehnak tuar tuh ihang!

⁴² Tho tu ilai feh ngasing! Sik tu ih! i zuartu pa hleng ihang!” tiin ti i.

Jesuh Pom I

⁴³ Jesuh a pong hnelhno lakah hnuahlunte hlaihnih lakai a teltu ve Judas hleng i. Judas thawn hmunkhat ah, suangbawi upate, Danthiam mite le Judah mi upate ai hlathnak miburpui tu ralvang le tumbelte awh in kawi tlang i.

⁴⁴ Mizuartu pa in mizapui tu hnikhnaihhnak pe cia zo ai, “I thutmi pa tu ning pom nuammi pa i tuh i. Ani tu pom tu ilai phatak niu in kil in fehpui tu ih,” tiin ti i.

⁴⁵ Judas tu a hleng sawng fangin Jesuh hnenah kawi ai, “Sayapa!” tiin ti ai thut i.

⁴⁶ Ciatihin Jesuh heh pom ai kho ngai in khit tlang i.

⁴⁷ Cialai ah a hiangai a dingtu pakhat in a ralvang phok ai Suangbawi Sang hnenum pa ai bil hnah sat ai tawng lio i.

⁴⁸ Cen Jesuh in, “Kai tu ruko ing maw, ralvang le tumbelte thawn kawi tlang bang lianglo i si?

⁴⁹ Nisiar in Biakinn ah thu ning zirh de laiah aisu inkhai i pom awng bang hlah i si. I, Lai Thianghlim songai thu khim kul i,” tiin ti i.

⁵⁰ Cen a hnuahlunte hmuahhmuah in zam sek i.

⁵¹ Mino pakhat, pon paniu ian a siltu pa in Jesuh hlun i. Amah khai pom tum tlang ve i;

⁵² ikhalselai a pon zam ai a kawngkolh in tlan teu i.

Thurelhnak Hmun Ah Hlengpui

⁵³ Jesuh tu Suangbawi Sang inn ah fehpui ai ciata ah suangbawi upate, a dang upate le Danthiam mite taikhawm tlang i.

⁵⁴ A hla thah in Peter in hlun ai Suangbawi Sang ai tualvan ah lut i. Tualvan ah ralviltute hnenah to ai mai aai i.

⁵⁵ Suangbawi upate le thukhantu Council upate in Jesuh tu a rek nuam in sual si napui hmu thil tlang lo i.

⁵⁶ Mi tampui in thudonrel in Jesuh heh sualpuh tlang i, ikhalselai amahte thu bang dun lo i.

⁵⁷ Cen Mi hrekkhat ding tlang ai,

⁵⁸ “Hemi pa in ‘Minung ai sahnak he Biakinn heh bal tuhai ni thum songah minung ai bawn lohnak Biakinn sa tuh ing,’ ti, ling tlang i ing,” tiin Jesuh heh thudon hluk tlang i.

⁵⁹ Ikhalselai anite khai a thu bang dun thil cuanglo i.

⁶⁰ Amahte veksen hmaiah Suangbawi Sang ding ai Jesuh heh thu zawt i. “Amahte in sual na hluk heh sawn ben lo isim?” tiin ti i.

⁶¹ Ikhalselai Jesuh tu dapthen in um ai pong kamkhat khai sawn lo i. Cen Suangbawi Sang in, “Songloih mi Pathian ai Fapa Messiah i aw sim?” tiin zawt lala i.

⁶² Jesuh in, “Ing! Mi Fapa heh Cungnungber ai kiahhan lamah to in vancung mairo thawn a hleng khai hmu tlang leh tuh i si,” tiin ti i.

⁶³ Ciafangin Suangbawi Sang in a pon zik ai, “Thulingtu kin kul nawn lo i.

⁶⁴ Pathian a nautat zia heh za zo sio i si! Akontih in ruat pa i si?” tiin ti i. Anite veksen in Jesuh tu misual i ai rek tlak i, tiin lungkhim tlang sio i.

⁶⁵ Mi hrekkhat in Jesuh tu cil thuih tlang i; a mit hup ai vit tlang i. “Na vittu heh aisu i, rel tucuk!” tiin ti tlang i. Cen ralkapte in fehpui ai beng kong betbo i.

Peter In Jesuh Phehsan I

⁶⁶ Peter tu Suangbawi Sang ai tualvan ah a um laitak ah Suangbawi Sang ai hnenum nu pakhat kawi i.

⁶⁷ Peter mai aai khiah a hmu fangin hmaicang in sik ai, “Nangmah khai he Nazareth mi Jesuh thawn a umtu isi,” tiin ti i.

⁶⁸ Ikhalselai Peter in el ai, “Ling lo ing. Ziang thu pong isi, ti ling lo ing,” tiin ti i. Cen kotka lamah thawn i. Cia sawng fangin ar khuang i.

⁶⁹ Hnenum nu in hmu lala ai a hiangai mite hnenah, “Hemi pa khai amahte lakah tel nakhaw!” tiin rel lala i.

⁷⁰ Ikhalselai Peter in el thotho i. A rai hlanah a hiangai a dingtute in Peter heh, “Nangmah khai amahte lakai a teltu i hrimhrim isi, zaimantifangin Galilee mi isi!” tiin ti tlang i.

⁷¹ Cen Peter in, “Cukcam in thukham ai, “Ning tihnak pa heh aisu i, ti ling hrimhrim lo ing,” tiin ti lehthio i.

⁷² Cia sawng fangin a vel hnihhnak ar khuang ai Peter in Jesuh ai, “Ar vel hnih khuang hlanah vel thum tian ‘Ling lo ing,’ tiin i el tuh isi,” a ticiahnak khiah hih ai a rohpui in kap i.