Marka 10 - Zanniat Bible

Nupa Khekhnak Thu

¹ Cen Jesuh tu cia hmunin suak ai Judea peng ah feh ai Jordan Runpui tan i. Runpui ralkhat ah miburpui in a hnenah kawi tlang thotho ai a zirh kel bangin thuzirh i.

² Farasi mi hrekkhat in a sual si nuam in kawi tlang i; anite in, “Kin rel tucuk! Pasal in nupui ma tuhin kin dan in hlat awm?” tiin zawt tlang i.

³ Jesuh in, “Moses in zaibang dan ning pe awng i?” tiin zawt i.

⁴ Anite in, “Moses incen nupui mahnak lai ngan tu ilai ma thil tuh i si kin ti i,” tiin sawn tlang i.

⁵ Jesuh in anite hnenah, “Ning thinlung a kulul ze ai zirh thilh pawl ning ilo manin Moses in hebang dan a ning pehnak i.

⁶ Ikhalselai a hampan, lai le van a semsuah lai ahcen Lai Thianghlim in a relhnak bangin Pathian in mipa le minu bawn i.

⁷ Ciamanin mipa in a nu le a pa hlum tuhai a nupui thawn kom dun in pumkhat ah cang tuh i,’ tiin ti i.

⁸ Ciatih imanin anite tu pahnih i nawn lo i, pumkhat cang zo i.

⁹ Pathian ai kopmi tu aisu inkhai khan maseh,” tiin ti i.

¹⁰ Inn songah lut fangin a hnuahlunte in cia thu heh zawt tlang i.

¹¹ Jesuh in anite hnenah, “Mi pakhat in a nupui ma ai nupang dang hoi lekhaw a nupui kang songin nupang dang thawn kangkawm sualhnak bawn i.

¹² Ciabang thotho in nupang in a pasal zam ai pasal dang nai lekhaw kangkawm sualhnak bawn i,” tiin ti i.

Naupangte Hmuifu Pe I

¹³ Mi hrekkhat in a fate heh Jesuh in hmuifu pe tuhin koih tlang i. Ikhalselai ciamite tu hnuahlunte in hau i.

¹⁴ Cia thu heh Jesuh in a ling fangin a thinraw ai a hnuahlunte hnenah, “Naupangte tu i hnenah kawi tuseh, dawn mah ih. Zaimantifangin Pathian Ukhnak tu hebang naupangte caah i.

¹⁵ Thutak ning rel ing: aisu khai ituseh naupang bangin Pathian Ukhnak cosang hlah lekhaw ciami Pathian Ukhnak songah lut thil tuh lo i,” tiin ti i.

¹⁶ Cen naupangte heh cawi ai amahte vumah a kut suan ṭen ai hmuifu pe i.

Milianpa Thu

¹⁷ Jesuh tu khual tlawng tuhin a suak sawng fangin mi pakhat a hnenah a dawp in kawi ai a khuk caicin in, “Zirhtu Pha, kumkhua nunhnak i cothilhnak tuhin ziang bawn tuh ing?” tiin zawt i.

¹⁸ Jesuh in, “Zaimanin zirhtu pha iti isi? Pathian siar lo aisu khai mi pha um lo i.

¹⁹ Thupehnakte ling isi, ‘Mi rek mah; kangkawm sualhnak bawn mah; ruko mah; a dik loin midang sualpuh mah; mi zawl mah; na nu le na pa zul tu,’ tihnak khiah,” tiin ti i.

²⁰ Ciapa in, “Sayapa, he thupehnakte tu i naupang lai in hlun cia sio ing,” tiin ti i.

²¹ Jesuh in ciami pa heh ithnak thawn sik ai, “Thil pakhat na sam lai i. Feh tulai na naihnak hmuahhmuah zuar in tangka na ngahhnak heh mifarahte pe tulai vancung ah hlawnthil tampui nai tuh isi. Cia hnuaah i hlun tu,” tiin ti i.

²² Cia thu a za fangin mithmai sia ai lungsia in feh i; zaimantifangin ani tu milian bik i.

²³ Jesuh in a hnuahlunte heh sik zianzo ai, “Miliante ca Pathian Ukhnak songah lut tuh heh zaitlukin har tuh i!” tiin ti i.

²⁴ Ciami a za fangin hnuahlunte tu ngaihsunur tlang ngai i; ikhalselai Jesuh in rel bet ai, “I fate, Pathian Ukhnak song lut tuh zaitlukin har i!

²⁵ “Pathian Ukhnak songah milian pa a luthnak tahin khimhuk nabil songah kalauk lut bai tuh sawn i,” tiin ti i.

²⁶ Ciami thu a za fangin hnuahlunte tu khuaruahhar in um tlang amam ai, “Ciatih ilekhaw aisu bangin ohnak ngah tuh i?” tiin pakhat le pakhat ti dun i.

²⁷ Jesuh in a hnuahlunte khiah hmaicang in sik ai, “Hemi tu minung ca ahcen a cang thil lohnak i; Pathian ca ian ah cang thil i. Zaimantifangin Pathian ca ahcen a cang thil lohnak zaikhai um lo i,” tiin ti i.

²⁸ Ciafangin Peter in, “Ilekhaw kin tu zaizongza hlum in nangmah na hlun tlang zo i ing,” tiin ti i.

²⁹ Jesuh in, “I, thungai ing ning rel ing: aisu khai a inn ituseh, a lo ituseh, a unau ituseh, a farnu ituseh, a nu le a pa ituseh, a fate ituseh kaimah le Thuthangpha manin a hlumtu heh,

³⁰ tun san hrimhrim ah tam amam in ngah tuh i; cia hlaiah reemhnak khai ngah tuh ve i. Inn ituseh, lo ituseh, unau ituseh, farnu ituseh, nu ituseh, fate ituseh, a let zakhat in ngah tuh i. Cen a hleng tuhhnak san ah kumkhua nunhnak ngah tuh i.

³¹ Ikhalselai tunai a hmasaber mi tampui tu a hnuataber cang tuh i, cen tunai a hnuataber mi tampui tu hmasaber cang leh tuh i,” tiin ti i.

Jesuh In A Thi Tuh Rel Lehthio I

³² Jesuh le a hnuahlunte tu Jerusalem lam a feh tlang lakah Jesuh tu anite hmaiah feh i; a hnuahlunte tu thin nuam tlang lo i. Amahte khel lamin a hluntu midangte khai thin lau tlang ngai i. Hnuahlunte hlaihnih tu hmundang deuh ah fehpui ai a vumai a hleng tuhhnak thilte heh rel lehthio i.

³³ Ani in, “Ngai tucuk ih! Jerusalem khua hleng tlang tuhai ciata ah Mi Fapa heh suangbawi upate le Danthiam mite kut ah pehnak tuar tuh i. Anite in rek tuhin thu relcat tlang tuhai cia hnuaah Gentile mite kut ah hlengruai tuh i.

³⁴ Hnihciphnak ah hmang tlang tuh i, cil thuih tlang tuh i, vit tuhai rek tuh i. Ikhalselai ni thumhnak ah tho leh tuh i,” tiin ti i.

James Le John Ai Ngenhnak

³⁵ Cen Zebedee ai fapa James le John tu Jesuh hnenah kawi kawm ai, “Sayapa, thil pakhat kin bawn sah tuh hram in kin daih i,” tiin ti kawm i.

³⁶ Jesuh in, “Ziang ning daih i?” tiin zawt i.

³⁷ Anite in, “A songlawi na Ukhnak songai na bawi tohkham vumah na to fangin na hiangah kin to siang tu hram ve law; pakhat na kiahhan lamah, pakhat na kekeh lamah,” tiin ti kawm i.

³⁸ Jesuh in anite hnenah, “Ziang ngen i ing ti khiah ling kawm lo i si. I din tuh tuarhnak khuat heh ding ben tuh i sim? Baptisma i lang bangin lang ben tuh ve i sim?” tiin zawt i.

³⁹ Anite in, “Ding ben tuh i ing,” tiin sawn kawm i. Jesuh in anite hnenah, “I ding tuhhnak khuat heh ding ben kawm tuh napui baptisma i lang bangin lang ben kawm tuh ve i si.

⁴⁰ Ikhalselai i kiahhan lam le i kekeh lamai a totu tuh rilthilhnak tu i thu ilo i. Pathian in he mi hmun tu a rem sah cia mite hnenah pe tuh i,” tiin ti i.

⁴¹ Cia thu tu hnuahlunte pahra in a za tlang fangin James le John vumah thinraw tlang ngai i.

⁴² Ciamanin Jesuh in anite veksen in kokhawm tlang ai, “Laivum ram uktute tu amahte uk mite khiah lal ngai in uk tlang ai amahte hotute khai thu nai tlang ngai i, ti ling tlang i si.

⁴³ Ikhalselai ning lakah tu hebang i tuh lo i. Ningmah lakah pakhat in a lianber cang nuam lekhaw ning veksen ai naruaihtu cang tuseh.

⁴⁴ Ningmah lakah pakhathnak a cang a nuamtu in ning veksen ai sal cang tuseh.

⁴⁵ Ikhalselai Mi Fapa rin ruaihmi ilo in ruaihtu cang tuhin le mi tampui tlan ai a nunhnak pe tuhin kawi i,” tiin ti i.

Mitcawpa Bartimia Cakruai I

⁴⁶ Jesuh le a hnuahlunte le miburpui tu Jericho khua hleng tlang i. Cen Jericho khua in a suak tlang sawng fangin Timae ai fapa Bartimia tihnak mitcaw kutdawh pa tu lampui hiangah to i.

⁴⁷ Nazareth mi Jesuh i, ti a ling fangin, “David ai fapa Jesuh! Ning i hio tu hram law,” tiin au i.

⁴⁸ Mi tampui in hau ai, “Dapniu in um tu,” tiin ti tlang i. Ikhalselai dap nuam cuanglo i. “David ai fapa, ning i hio tu hram law,” tiin cawm amam in au i.

⁴⁹ Jesuh khai com ai, “Ko tucuk ih,” ti i. Mitcawpa tu ko tlang ai, “Na lungawi tu, tho tu, na ko na khaw,” tiin ti tlang i.

⁵⁰ A pon a sil laihnak khiah lon vut ai Jesuh hnenah dawk vurvo i.

⁵¹ “Ziang bawn sah tuh na daih heh i?” tiin Jesuh in zawt i. Mitcawpa in, “Sayapa, khua hmu thil leh i nuam i,” tiin ti i.

⁵² Jesuh in, “Feh tu, na sanghnak in na cakruai zo i,” tiin ti i. Cammalak ah khua hmu thil ai ciata in Jesuh hlun i.