Marka 1 - Zanniat Bible

Baptisma Petu John Thurelhnak

¹ Pathian Fapa Jesuh Khrih ai Thuthangpha tu hetihin i.

² A panhnak ah prophet Isaiah in: “Pathian in ‘Na hmaiah i nalang hlat tuh ing; Nangmah ca lampui seltu tuhin,’

³ Mi pakhat tu hampalak ramkhing ah au ai, ‘Bawipa caah lampui sel tu ih, A fehhnak tuh lampui khiah cangruai tu ih,’ ti i,” tiin ngan i.

⁴ Ciamanin John tu hampalak ramkhing in kawi ai baptisma pe ai thu khai rel kong betbo i. Mipui khiah, “Ning sual sir tu ilai baptisma lang tu ih. Ciatihin Pathian in ning sualhnak ning ngaithiam tuh i,” tiin ti i.

⁵ Judea peng le Jerusalem khuapui in mi tampui John ai thurelhnak ngai tuhin kawi tlang i. Amahte sualhnak phuang tlang ai Jordan runpui ah baptisma pe i.

⁶ John tu Kalauk hmul ai takhnak hnikpon sil ai a el ah savun elpen pen i. A rong aihnak tu khokhuak le hampalak khoitizu i.

⁷ Mipui hnenah, “I hnua ai a kawitu tuh pa tu kaimah tahin a thawm lian sawn i. Ut in a kedawl ri hawksahtu tuhin rin kai tu i tlak lo i.

⁸ Kai incen tidap in baptisma ning pe ing. Ikhalselai ani incen Rauhla Thianghlim in baptisma ning pe tuh i,” tiin ti i.

Baptisma Langhnak Le Sualsohnak

⁹ Ciahnua a rai hlanah Galilee peng Nazareth khua in Jesuh tu kawi ai Jordan runpui ah John in baptisma pe i.

¹⁰ Jesuh tu ti songin a suak sawng fangin van khiah hong ai Rauhla tu khuro bangin a vumah a khop khiah hmu i.

¹¹ Van in aw pakhat thang ai, “Nangmah heh i ithnak i Fapa isi. Na vumah lung i khim ngaingai i,” tiin ti i.

¹² Cia sawngpah in Jesuh tu ramkhing ah Rauhla in fehruai ai,

¹³ ciata ah ni sawmli um ai Satan in sualforh i. Ramsate thawn um tlang i. Ikhalselai vancungmite in tuamhlawm i.

Jesuh In Nga Pomtute Pali Ko I

¹⁴ John tu thawng ah a toh hnuaah Jesuh tu Galilee ah feh ai Pathian ai Thuthangpha rel i.

¹⁵ “Can khim zo ai Pathian ukhnak nong zo i. Ning sualhnakte sir tu ilai Thuthangpha sang tu ih,” tiin ti i.

¹⁶ Jesuh tu Galilee Tili kamah a vak teng fangin ngapomtute pahnih Simon le a nau Andrew khiah sur a vorh kawm hnelhno laitak hmu i.

¹⁷ Jesuh in anite hnenah, “I hlun kawm tu ilai minung pomtu ah ning bawn tuh ing,” ti i.

¹⁸ Cia sawngpah in amahte sur hlum ai ani tu hlun kawm i.

¹⁹ A hla deuh ah feh ai Zabedi ai fapate James le John unau hnihte hmu i. Anite tu amahte khawm songah um kawm ai sur tholh kawm phetpho i.

²⁰ Jesuh in a hmu sawng fangin anite pahnih ko i. Ciatihin a pa Zebedee le a hlawhfate tu khawm songah hlum tlang ai Jesuh khiah hlun kawm i.

Khuasia Molhmi

²¹ Jesuh le a hnuahlunte tu Capernaum ah feh tlang ai a thangha Sabbath nia ah Jesuh tu pumkhawmhnak inn synagogue ah feh ai thu zirh i.

²² A thuzirhdan a lingtute in ngaihtam tlang ngai i, zaimantifangin Danthiam mite bang ilo i, ani in thunai ngai in zirh i.

²³ Cia can ah khuasia ai molhmi pa pakhat tu synagogue ah kawi ai,

²⁴ “Nazareth mi Jesuh, nang thawn ziang seng dun ising? Kinmah siatsuah tuhin kawi isim? Aisu isi ti na ling ing: Pathian ai hlathnak Mi Thianghlim isi,” tiin au dekdo i.

²⁵ Jesuh in khuasia khiah, “Dapniu in um tu! Khia pa songin suak tu,” tiin thupe i.

²⁶ Khuasia in ciami pa tu a roh ngai in thing ai cawm ngai in a auruai hnuaah suak i.

²⁷ Mipui tu ngaihsunur tlang ngai ai pakhat le pakhat, “Zaibang thu ini? Zirhhnak thar phun khat ini im? Hemi pa tu khuasia vumah thu nai ai ‘Suak tu ih!’ a ti fangin suak tlang fawn i,” tiin ti dun i.

²⁸ Ciatihin Jesuh thula tu Galilee peng khuahacang ah rang ngai in thang i.

Jesuh In Mi Tampui Cakruai I

²⁹ Jesuh le a hnuahlunte tu James le John tel in, synagogue in feh ai Simon le Andrew inn lamah feh tlang i.

³⁰ Simon nupui ai nu khiah hlawng ur in ur ai tho ben lo i; Jesuh a hleng sawng fangin a urdan thula rel i.

³¹ Mi ur hnenah feh ai a kut awh in thoruai i. A hlawng ur lawm vut ai anite tuamhlawm ben i.

³² Ni tla ai zan lam hleng fangin mizapui in mi ur hmuahhmuah le khuasia ai molh mite khai Jesuh hnenah fehpui i.

³³ Cia khua ai mi zongzong ciami inn hmaiah taikhawm tlang sio i.

³⁴ Jesuh in amahte urhnak a phunphun khiah cakruai ai amahte songai khuasiate khai hnawt sek i. Khuasiate tu kamkhat khai pongruai lo i; zaimantifangin aisu i ti khiah ling tlang i.

Galilee Ah Jesuh Thurel I

³⁵ A thangha, zingniu in ni suak hlanah, Jesuh tu tho ai inn in suak i. Hnarpua ah suak ai mi um lohnak hmunah sawngen i.

³⁶ Ikhalselai Simon le a rualpuite tu amah si tuhin feh tlang ai,

³⁷ a hmu fangin a hnenah, “Mi zongzong in na si i,” tiin rel i.

³⁸ Ikhalselai Jesuh in, “Hemi hiangai khuate ahkhai feh tuh zianzo ing, anite hnenah thu rel tuh ve ing, zaimantifangin ciami heh i kawi sanhnak i,” tiin ti i.

³⁹ Ciamanin Galilee peng pumpuhluk ah tlawng in synagogue ah thurel zianzo ai khuasiate hnawt betbo i.

Jesuh In Mi Pakhat Cakruai I

⁴⁰ Phar ur in a urtu pa pakhat tu Jesuh hnenah kawi ai a khuk caicin in, “Na nuam lekhaw i thiangruai thai isi,” tiin bawmhnak ngen i.

⁴¹ Jesuh in ninghio ai a kut a san hnuaah dai ai, “Na thiangruai i nuam i, thiang tuhang,” tiin ti i.

⁴² Cia sawngpah in a phar ur in cak ai thiang i.

⁴³ Cen Jesuh in ciami pa tu fehruai ai, phatak niu in thu tiam i,

⁴⁴ “Ngai tu! Hemi thu heh aisu khai rel tuh lo isi. Suangbawi hnenah feh tu vurvo lai na sik tuseh; cen mi zongzong in cak ihang tiin na linghnak tuhin Moses ai thupeciahnak bangin hibawlhnak sel tu,” tiin phatak niu in tiam i.

⁴⁵ Ikhalselai ciami pa tu feh ai a cakhnak thu heh nuamhmuncang ah than betbo i. Cia thu a rel tam ze manin Jesuh tu khua songah mi mithmuh in vak thil nawn lo i. Hnarpua sawn ah amah lek um ai ciata ah hmun cangcang in a hnenah kawi tlang i.