Luka 9 - Zanniat Bible

Hnuahlunte Hlaihnih Hlat I

¹ Jesuh in a hnuahlunte hlaihnih khiah hmunkhat ah ko ai khuasia hnawt thil le urhnak a phunphun cakruai thilhnak huham pe i.

² Cen Pathian Ukhnak thurel tuh le miur cakruai tuhin hlat i.

³ Anite hnenah, “Khual ning tlawng fangin zaikhai keng mah ih: faikiang ituseh, dip ituseh, rong ituseh, tangka ituseh, angki hlai khai keng mah ih.

⁴ Ning tlun inn ah hmundang ning feh leh hlanlo cam tu ih.

⁵ Ning khirhtu khua tu hlum tu ilai anite ralring pehnak in ning keborh thin tu ih,” tiin ti i.

⁶ Hnuahlunte tu feh tlang ai khuatenau ah tlawng zianzo i; Thuthangpha rel ai khuahacang ah miur cakruai betbo i.

Herod Awloksonghnak

⁷ Galilee ram uktu bawi Herod in ciatih bangin thil cang a za fangin awloksong roh i, zaimantifangin baptisma petu John nung leh i tiin mi hrekkhat in ti i.

⁸ Midang in, ‘Elijah lar ihang,’ ti tlang ai midang hrekkhat in khuahlan lai ai prophet pakhatkhat nung leh i, ti tlang i.

⁹ Herod in, “John lu tanruai zo ing; ikhalselai a thula i zahnak hnelhno hemi pa tu aisu ini? tiin ti i. Cen Jesuh heh hmu tuh rori in tum i.

Jesuh In Mi Thawng Nga Rong Do I

¹⁰ A hnuahlunte tu let ai amahte bawnhnak hmuahhmuah Jesuh rel tlang i. Cen fehpui ai Bethsaida tihnak khua ah amahte lek feh tlang i.

¹¹ Cia thu tu mizapui in ling fangin hlun tlang i. Jesuh in hnuksat ai anite hnenah Pathian Ukhnak thu rel ai cakhnak a kul mite cakruai i.

¹² Ni tla dawn fangin a hnuahlunte hlaihnih tu a hnenah kawi tlang ai, “Heta heh ramkhing i; ciamanin misenpui heh fehruai tu, khua le lo lakah feh tu selai rong le zancam hmun khai si tlang tuseh,” tiin ti i.

¹³ Ikhalselai Jesuh in, “Ningmah in rong aih tuh pe tu ih,” tiin ti i. Anite in, “Kin naihnak hmuahhmuah a veksen in sang hlom nga le nga pahnih ian i. Minung hezah ca rong lai cawk tuh i ing maw?” tiin ti tlang i.

¹⁴ Ciata ah pasal lek thawng nga zolo um tlang i. Jesuh in, “Miburpui heh sawmnga bur ṭen in toruai tu ih,” tiin a hnuahlunte rel i.

¹⁵ Ciatihin hnuahlunte in a bawn hnuaah,

¹⁶ Jesuh in sang hlom nga le nga pahnih lang ai van lam sik in Pathian hnenah anghnak thawn saw a ngen hnuaah khan ai mizapui zem tuhin hnuahlunte hnenah pe i.

¹⁷ Amahte veksen in ai tlang ai a kham hnuaah a valhnak a hnuahlunte in rut tlang ai bawm hlaihnih khim i.

Peter In Jesuh Ihnak Phuang I

¹⁸ Nikhat ah Jesuh tu amah lek saw a ngen lakah hnuahlunte kawi tlang ai, “Mipui in aisu iti i?” tiin zawt i.

¹⁹ Anite in, ‘Mihrekkhat in baptisma petu John isi, na ti i. Hrekkhat in Elijah i, na ti i. Cen midang in khuahlan lai ai prophet pakhatkhat nung leh i, na ti i,” tiin ti tlang i.

²⁰ Jesuh in, “Ning in tang! Aisu i tiin i ruat i si?” tiin zawt i. Peter in, “Nang tu Pathian ai Messiah isi,” tiin ti i.

A Tuar Le A Thi Tuh Relhnak

²¹ Cia thu tu aisu khai rel tuh loin tiam i.

²² Cen amahte hnenah, “Mi Fapa heh a roh ngai in tuar tuhai upate, suangbawi upate le Danthiam mite in hnawl tuh i. Ani tu rek tuh i; ikhalselai ni thumhnak ah thoruai leh tuh i,” tiin ti i.

²³ Cen anite veksen hnenah, “Aisu khai ituseh i hlun nuam lekhaw amah daihhnak khiah hlum tu selai nisiar in a thinglamteh phur in i hlun tuseh.

²⁴ Zaimantifangin aisu khai ituseh a nunhnak a hup nuamtu in a nunhnak sung tuh i; ikhalselai kaimah caah a nunhnak a sungtu in a nunhnak hup ngah tuh i.

²⁵ Mi pakhat in he laivum pumpui co khalselai amah nunhnak sung i, ihlahle pairal lekhaw zai hnempui i? Hnempuihnak zaikhai nai lo i.

²⁶ Mi pakhat in kaimah le i thuzirhhnak zakthipui lekhaw Mi Fapa inkhai a songlawihnak le a Pa le vancung mithiangte ai songlawihnak thawn a hleng leh fangin zakthipui tuh ve i.

²⁷ Fiang ngai in ning rel ing: heta ah a umtu lakah hen, Pathian Ukhnak a hleng ning hmu hlanlo, a thi lomi um tuh i si,” tiin rel i.

Jesuh Hmuihmel Thlenghnak

²⁸ Hemi thute a rel hnua zarh khat ah Jesuh in Peter, John le James ko ai sawngen tuhin mual vumah kai tlang i.

²⁹ Saw a ngen laitak in Jesuh tu a hmel pianzia thleng dun ai a hnikpon tu a ngo ze in a tleu in tleu i.

³⁰ Rinlopui in mite pahnih lar kawm ai pon dun i. Ciami mite pahnih tu Moses le Elijah i.

³¹ Vancung songlawihnak thawn lar ai Jerusalem khua ai a thihnak in Pathian ai tumtekhnak a khimruai tuh thu khiah Jesuh thawn rel tlang i.

³² Peter le a rualpuite tu mitmu ur roh in mitmu i; ikhalselai phawk ai Jesuh ai songlawihnak le Jesuh thawn a dingtute pahnih khiah hmu tlang i.

³³ Ciamite pahnih in Jesuh a fehsan sawng fangin Peter in, “Bawipa, heta ah kin um heh a pha ngai i! Buk pathum in sa tuh ising; nangmah ca pakhat, Moses ca pakhat, Elijah ca pakhat,” tiin ti i. (Amah incen ziang pong ngah ing tikhai ling cuam lo i).

³⁴ Ciatih ai a pong hnelhno lakah mairo zam ai khuk liang i; ciatihin mairo in tuam liang manin hnuahlunte tu lau tlang ngai i.

³⁵ Cen mairo songin aw pakhat in, “Hemi pa tu i ril cia zomi i Fapa i, a thu ngai tu ih,” tiin ti i.

³⁶ Cia aw a dap fangin Jesuh amah lek hmu tlang i. Hnuahlunte tu dapthen in um tlang i; amahte hmuhnak heh cia can ah aisu hnen ahkhai rel tlang lo i.

Khuasia Molhmi Naupang Pa Cakruai I

³⁷ A thangha ah Jesuh le a hnuahlunte pathum tu mual vuman tolh tlang ai mibur tam roh in Jesuh hmuak tlang i.

³⁸ Cen miburpui lakin mi pakhat au ai, “Sayapa, i fapa naihsun heh i sik sah tu hram law,” tiin ngen i.

³⁹ “Khuasia in pom ai mangrinlo in au dekde ai tlu de i; a ka in cilbuan suak ai har bikraw in bawn i, hlat nuam hrimhrim lo i!

⁴⁰ Khuasia hnawtsuak tuhin na hnuahlunte ngen thliahthlo napui ti ben tlang lo i,” tiin ti i.

⁴¹ Jesuh in, “Ningte tu zaitluk sanghnak nai lo le misualral phun i si! Zaikom tian ning hnenah um tuhlai ing? Zaikom tian ning tuar tuhlai ing?” tiin ti i. Cen mipa hnenah, “Na fapa heta ah koih tu,” tiin ti i.

⁴² Ciatihin Jesuh hnenah naupang pa a koih laiah Khuasia in laipua lakah naupang pa heh lon ai zaikhai ling loin a caih dekdo i. Jesuh in khuasia heh hau ai naupang pa khiah cakruai i; cen naupang pa tu a pa hnenah pe i.

⁴³ Pathian hathnak huham hmu tlang fangin mizapui tu multing tlang roh i. Jesuh ai thil bawnhnak hmuahhmuah hmu fangin mizapui in ngaihtam tlang roh i; ciatihin a um tlang laitak ah a hnuahlunte hnenah,

⁴⁴ “Thu ning rel tuhai ciami tu zaikom inkhai hai tuh lo i si. Mi Fapa tu anite in engsan tuhai thunaitu kut ah pehnak tuar tuh i,” tiin ti i.

⁴⁵ Ikhalselai a hnuahlunte in a relhnak a sullam ling thil lo i. Ling thil tuh loin thuphnak imanin ling thil lo ai zawt khai ngam tlang lawnsi lo i.

Aisu Lianber I

⁴⁶ Hnuahlunte in amahte lakah aisu lianber i, tihnak thu el dun i.

⁴⁷ Amahte ruathnak khiah Jesuh in ling manin naupang niu pakhat koih ai a hiangah dingruai i.

⁴⁸ Cen anite hnenah, “I hming in naupang niu a cosangtu in kaimah i cosang i; kaimah i cosangtu in i hlattu a cosangtu i. Zaimantifangin ningmah lakah mi nauta ber heh a lianber i,” tiin ti i.

Engsan Lotu Heh Bawmtu I

⁴⁹ John in, “Bawipa, mi pakhat in ramhuaite a hnawt hnelhno hmu ai kham i ing; zaimantifangin kin bu songtel ilo i,” tiin ti i.

⁵⁰ Jesuh in, “Kham mah ih, zaimantifangin aisu khai ituseh ning engsan lotute heh ning bawmtute i,” tiin John le hnuahlunte hnenah ti i.

Samaria Khua In Jesuh Daih Lo I

⁵¹ Jesuh vancung ah a lang tuh can nong cuahco fangin Jerusalem ah feh tuh hrimhrim in ruatcat ai feh i.

⁵² A hmaiah palai hlat cia ai ciamite tu zaizongza bawn ciatu tuhin Samaria khua pakhat ah lut tlang i.

⁵³ Ikhalselai cia khuasong mite in daih tlang lo i, zaimantifangin Jerusalem khua ah lan tuh i ti ling fiang tlang manin i.

⁵⁴ Ciami heh a hnuahluntu James le John in a hmu kawm fangin Jesuh hnenah, “Bawipa, hemite heh hnawmral tuhin vancung in maiko tlaruai selai na daih lo im?” tiin ti kawm i.

⁵⁵ Jesuh tu anite lamah her ai hau i.

⁵⁶ Cia hnuaah Jesuh le a hnuahlunte tu khua dang ah feh tlang i.

Jesuh Hlun Nuamtute

⁵⁷ Ciatihin a feh laitak in mi pakhat in Jesuh tu, “Na feh hmuncang ah na hlun tuh ing,” ti i.

⁵⁸ Jesuh in, “Mehlengte in kua nai i, vaniute in bu nai i; ikhalselai Mi Fapa in zan riahbuk le lu hngaihngam hmun khai nai lo i,” tiin ti i.

⁵⁹ Mi pakhat hnenah Jesuh in, “I hlun tu,” ti i. Ikhalselai ciami pa in, “Bawipa, i pa phum hmasa rih tuh ing,” tiin ti i.

⁶⁰ Jesuh in, “Mithi tu mithite in phum tu ngawn seh. Nang tu feh tulai Pathian Ukhnak thu phuang tu sawn,” ti i.

⁶¹ A dang pakhat in, “Bawipa, na hlun tuh ing; ikhalselai hmasaber ah i songkhatte pon rih tuh ing,” ti i.

⁶² Jesuh in a hnenah, “Aisu khai hnua lam her kong in lo vaitu khiah Pathian Ukhnak caah santlai lo i,” tiin ti i.