Luka 8 - Zanniat Bible

Jesuh Hluntu Nupangte

¹ Cia hnuaah Jesuh tu Pathian Ukhnak Thuthangpha rel in khuapui le khuatenau ah tlawng zianzo i. Hnuahlunte hlaihnih khai tel tlang i.

² Cen urhnak a phunphun le khuasia ai molh mite songin a cakruai mi nupangte khai tel ve i: a songin ramhuai pasarih a hnawtsuakmi Mary (Magdalene ti inkhai komi),

³ Herod zung ah bawi a ṭuantu Khuza ai nupui Joanna, Suzanna le amahte naihnak thilri thawn Jesuh le a hnuahlunte a bawmtu nupangte khai tel tlang i.

Hlaici Vorhtu Santehhnak

⁴ Khua khat hnua khua khat Jesuh hnenah mi kawi tlang i; mi tampui a hnenah a kawi tlang fangin hetihin santehhnak rel i.

⁵ Vaikhat ah mi pakhat tu hlaici pawi tuhin feh i. Lo songah hlaici pawi fangin a hrekkhat tu lampui tluanah tlok ai ciamite tu mi in fon i, vaniu in khul sio i.

⁶ A hrekkhat tu lungtlep vumah tlok ai hlaici tu po napui laipua hnum lo manin ro sek i.

⁷ Hlaici hrekkhat tu hlingbur lakah tlok ai hlingkung thawn khang tlang ai hlingkung in det berh i.

⁸ Cen hrekkhat tu laipua pha ah tlok ai po le a vui nai ai let zakhat in a thai nai i. Ngaihnak bil a naitu hmuahhmuah in za tu ih,” tiin ti i.

Ciami Santehhnak Ai A Sullam

⁹ Ciami santehhnak ai a sullam tu ziang ini, tiin a hnuahlunte in Jesuh zawt tlang i.

¹⁰ Jesuh in, “Pathian Ukhnak ai thuthup lingthilhnak heh ning hnenah ning pe zo i; ikhalselai midang hnenah tu santehhnak ian in rel tuh i. Ciamanin sik tuh hnelhno napui hmu thil tuh lo i, ngai tuh hnelhno napui ling thiam tlang tuh lo i.

Hlaici Pawi Santehhnak Ai A Sullam

¹¹ “Hemi santehhnak ai a sullam tu hetihin i: hlaici tu Pathian ai ponkam i.

¹² Lampui tluan ai tlokhnak hlaici tu Pathian ponkam za tlang napui Satan kawi ai sang tuh loin le omi a cang thil tuh lohnak in amahte thinlung songin Pathian ai thu a lang sah mite i.

¹³ Lungtlep vumai a tlokhnak hlaici tu Pathian ponkam heh za ai lungawi ngai in pom tlang i. Ikhalselai amahte thinlung runruh ah lut lo i. Can comniu song sang ai sualsawmhnak can a hleng fangin a tlu lehtute i.

¹⁴ Hlingbur lakai a tlokhnak hlaici tu Pathian ponkam tu za tlang i; ikhalselai laipua vum donharhnak, lian nuamhnak le taksa nuamhnak in khuk ai zaikom inkhai a thai hmin thil lo pawl i.

¹⁵ Lai pha vumai a tlokhnak hlaici tu Pathian ponkam za tlang ai thinlung pha le thungai in a bo tian thai nai tuh rori in kho ngai in a pomtute i.

Kho Ai Khumhnak Maikhuat

¹⁶ Cen Jesuh in, “Aisu inkhai maikhuat var fangin kho in khum awng kel lo i, Khuahluan hnia ahkhai dah awng kel lo i. Inn songah mi a lut fangin tleuhnak hmufiang thil tuhin maikhuat varhnak tungkhuam vumah dah de i.

¹⁷ “A thupruk in thuphnak hmuahhmuah larruai leh tuh sio ai khukhnak thil hmuahhmuah khuatleu ah suakruai leh tuh sio i.

¹⁸ “Ciamanin thu ning ngaidan ahhen ralring tu ih; zaimantifangin thil cateng a naitu heh pe tuh amam ai zaikhai a nai lotu heh a naihnak lam niu khai lang sah tuh i,” tiin ti i.

Jesuh Ai Nu Le Unaute

¹⁹ Jesuh ai nu le a naute tu a hnenah kawi tlang i, ikhalselai mi a tam ze manin tawk thil lo i.

²⁰ Mi pakhat in Jesuh hnenah, “Na nu le na naute innka ah ding ai na tawk nuam tlang i,” tiin ti i.

²¹ Jesuh in mizapui hnenah, “I nu le i naute tu Pathian thu za ai a hluntute i,” tiin ti i.

Jesuh In Khuahu Lawmruai I

²² Vaikhat ah Jesuh tu a hnuahlunte thawn lawng songah lut ai anite hnenah, “Tili khat lam ralah feh ngasing,” tiin ti i. A tihnak bangin feh tlang i.

²³ Lawng in a feh laitak ah Jesuh tu mitmu i! Mangrin loin khuahu zuang dekdo i; lawng songah ti lut ai a dim dawn fangin thinlau tlang ngai i.

²⁴ A Hnuahlunte in Jesuh phawr tlang ai, “Bawipa, Bawipa! Kin thi dawn hang nakhaw,” tiin ti tlang i. Jesuh tu tho ai khuahu le tilep heh thupe i. Khuahu khiah lawm ai zaikhai pau loin dap sek i.

²⁵ Cen a hnuahlunte tu, “Ning sanghnak akonah i?” tiin ti i. Ikhalselai anite tu mangbang ai lau tlang roh i; cen pakhat le pakhat, “Hemi pa tu aisu i? Khuahu le tilep khai thupe ai a thu ngai ang!” tiin ti dun i.

Khuasia molhmi Jesuh In Cakruai I

²⁶ Jesuh le a hnuahlunte tu lawng in Galilee tili ralkhat Gerasene tihnak peng ah hleng tlang i.

²⁷ Jesuh tu varkam ah a suak sawng fangin khuasiate in molhmi pakhat in tawk i. Ciapa tu can raipui inn ah um loin le hnikpon sil loin vak hnelhno ai mithi phumhnak khukua songah um sawn de i.

²⁸ Jesuh a hmu fangin roh ngai in au ai Jesuh keham ah bok ai cawm ngai in, “Jesuh, Cungnungber Pathian ai Fapa! Nang le kai ziang kin seng dun i? I cawh hram malaw, tiin na ngen ing, tiin au i.

²⁹ Zaimanin ciatihin au i, tifangin Jesuh in khuasia khiah ciami pa songin suak tuhin tuh a pe manin i. Vel tampui tu khuasia in a bawn fangin thawnginn ah a kut a ke thir cikcin in pen khalselai thir cikcin heh catruai sek de ai khuasia in ramkhing ah pairuai lio de i.

³⁰ Jesuh in, “Na hming aisu isi?” tiin zawt i. Ani in, “I hming tu burpui ing,” tiin sawn i. Zaimantifangin khuasia burpui a songah a um manin i.

³¹ Khuasiate in Jesuh tu, “Khur thukpui songah i hlak hram malaw,” tiin ngen i.

³² Ciami hiang mual vumah vokrual tampui um tlang murhmo i. Khuasiate in Jesuh tu, “Vok songah kin lut siang tu hram law,” tiin ngen tlang ai amahte ngenhnak bangin vok songah lutruai i.

³³ Ciapa songin suak ai vokrual songah lut tlang i. Ciami vokrual heh liang sangpui in dawp ai tili songah pil ai thi sek i.

³⁴ Ciami vokrual a khaltute in ziang cang i ti khiah hmu sio ai rang ngai in dawp tlang ai cia thu heh khuasong le lo lakah than dekdo i.

³⁵ Ziang cang i, ti sik tuhin mi tampui feh tlang i. Jesuh hnen hleng fangin a songin khuasia suakmi pa tu Jesuh keham ah to ai hnikpon sil in le thinlung fim ngai in hmu ai lau tlang ngai i.

³⁶ Akontih in cak i, ti a hmutute in a thula rel tlang i.

³⁷ Cia ram songai a umtu hmuahhmuah in lau tlang ngai ai amahte veksen in Jesuh tu hmundang ah feh tuhin ngen tlang i. Ciamanin Jesuh tu lawng songah lut ai feh i.

³⁸ A songai khuasia tampui a hnawtmi pa in, “Na hnenah i fehruai tu ve law,” tiin ngen dekdo i. Ikhalselai Jesuh in,

³⁹ “Na inn ah tlung tulai, Pathian in nangmah ca a bawnhnak thu heh rel tu,” tiin ti ai tlungruai i. Ciapa tu khuasong ah tlung ai Jesuh in amah ca a bawnhnak heh mi hnenah rel dekdo i.

Jairus Fanu Le Jesuh Pon A Daitu

⁴⁰ Jesuh tu tili ralkhat lam a hleng fangin mi tampui in hmuak tlang i, zaimantifangin can raipui iang tlang zo i.

⁴¹ Cen Jairus tihnak pa hleng i. Jairus tu synagogue uktu i. Jesuh keham ah bok ai a inn ah kawi tuhin ngen i.

⁴² Zaimantifangin a fanu naihsun, kum hlaihnih a khimmi nu heh ur ai a thi dawn ihang. Jesuh tu feh ai ciatihin a vak laitak ah miburpui in a hiang cingkim in kawi ai hlun tlang thlurhthlo i.

⁴³ Ciami lakah nupang pakhat, kum hlaihnih song thisuak urhnak a tuartu tel ve i. A naihnak hmuahhmuah bo sek tian sibawite hnenah bawl napui aisu inkhai cakruai ben lo i.

⁴⁴ Mizapui lakah Jesuh hnua lamin kawi ai Jesuh ai a ponpar niu khiah dai i; cen a thisuakhnak heh cammalak in lawm i.

⁴⁵ Jesuh in, “I daitu aisu i?” tiin zawt ai, “Aisu inkhai na dai lo i ing,” ti tlang i. Cen Peter in, “Bawipa, ‘Na cingkim in miburpui in na kulh ai na khing, na tet tlang murhmo i ing!” tiin ti i.

⁴⁶ Ikhalselai Jesuh in, “Mi pakhatkhat in i dai i, zaimantifangin i songin huham a suak ling ing, tiin ti i.

⁴⁷ Nupang nu in kaimah ing ti i ling zo i, tiin hlawng kongin kawi ai Jesuh keham ah bok i. Ciata ah mizapui hmuh ah zaimanin Jesuh dai ai akontih in i cak i tihnak thu khai rel sio i.

⁴⁸ Jesuh in, “I fanu, na sanghnak in na cakruai zo i, muang niu in tlung ta tuhang,” tiin ti i.

⁴⁹ Ciatih ai Jesuh a pong laitak ah Jairus inn in mi pakhat a hlatmi hleng ai Jairus khiah, “Na fanu thi zo i; Sayapa tu hnaihnok nawn mahang,” tiin ti i.

⁵⁰ Jesuh in ciami a za fangin Jairus hnenah, “Na thin lau mah! Sang tu ngio law; cen na fanu tu cak tuh ngawn i,” tiin ti i.

⁵¹ Jesuh tu Jairus inn a hleng fangin Peter, John, James le naupang nu ai nu le pa siar lo aisu khai inn songah lutruai lo i.

⁵² Ciata mithi inn ai a umtute hmuahhmuah lungsia in kap tlang thliahthlo i. Jesuh in, “Kap mah ih; he naupang nu heh thi lo i, a mitmu i,” tiin ti i.

⁵³ Naupang nu a thi ti khiah aisusu inkhai ling manin Jesuh heh hnihsan tlang i.

⁵⁴ Ikhalselai Jesuh in a kut in awh ai, “I fanu, tho tuhang,” tiin ti i.

⁵⁵ Nung leh ai cammalak in tho i. “Rong aih tuh pe tu ih,” tiin Jesuh in ti i.

⁵⁶ A nu le a pate tu ngaihsunur kawm roh i. Jesuh in cia thu heh aisu khai rel tuh loin tiam i.