Luka 7 - Zanniat Bible

Ralbawi Ai Hnenum Cakruai I

¹ Jesuh tu he thu hmuahhmuah a rel ben fangin Capernaum khua ah feh i.

² Ciata ah Rome ralbawi pakhat um ai hnenum pakhat nai i; ciami a hnenum heh daih ngai i; ikhalselai ur ai thi dawn ihang.

³ Cia ralbawipa in Jesuh thula a za fangin a hnenum cakruai tuh ngen tuhin Judah mi upate hlat i.

⁴ Jesuh hnenah hleng tlang ai thintak ngai in ngen tlang i. “Hemi pa tu nang in bawm na kul hrimhrim i.

⁵ Kin miphun a ittu i ai amah rori in kin caah synagogue sa i,” tiin ti tlang i.

⁶ Ciamanin Jesuh in anite heh hlun i. Ciami inn a nong betbo fangin ralbawi pa in a rualpuite hlat ai, “Bawipa, na har sek in kawi nuam mah. I inn heh na lut tuhin tlak lo i.

⁷ Cen na hnenah kaimah kawi tuh ing ti khai i tlak thotho lo i, tiin ruat ing. Ciamanin thupe tu sawn lai i hnenum pa tu cak tuh ngawn i.

⁸ Kaimah khai bawi upa kuthnia ah umtu ing ai kaimah ai kuthnia ahkhai ralkapte um i. Ralkap pakhatkhat heh ‘Feh tu,’ ti lengkhaw feh i; a dang pakhat heh ‘Kawi tu,’ ti lengkhaw kawi i. Cen i hnenum heh ‘Hemi bawn tu,’ ti lengkhaw bawn i,” tiin ti i.

⁹ Ciami heh Jesuh in a za fangin ciami pa ai sanghnak heh multing ngai i. A hluntu misenpui lamah her ai, “Thutak ning rel ing: Israel mi lakah rin he bangtluk sanghnak tawk awng lo ing!” tiin ti i.

¹⁰ A hlathnakte tu ralbawi pa inn ah let ai a hnenum pa tu a cak zo in hmu tlang i.

Hmaitongnu Ai Fapa Nungruaihnak

¹¹ Ciahnua a rai hlanah Jesuh tu Nain tihnak khua ah feh ai a hnuahlunte le mi tampui in hlun tlang i.

¹² Khuahnar a hleng fangin mithi phum tuhin miburpui suak tlang i. A thitu heh hmaitongnu ai fapa naihsun i ai khuasong mi tampui in a nu hlun tlang i.

¹³ Bawipa in cianu a hmu fangin ninghio ai, “Kap mahang,” tiin ti i.

¹⁴ Cen Jesuh tu feh ai mithi kuang heh dai i; cen a zawngtute tu ding tlang i. Jesuh in, “Tlangval pa, tho tu na ti ing!” tiin ti i.

¹⁵ Mithi pa tu tho ai pong ben i; cen Jesuh in a nu hnenah hoi i.

¹⁶ Anite veksen in thinlau tlang ai Pathian thangphat tlang i. “Kin lakah a thawmlian mi prophet suak i; a minungte o tuhin Pathian hleng zo i,” tiin ti tlang i.

¹⁷ Jesuh ai thula tu cia ram hmuahhmuah le a hiangah thang sio i.

John Ai Palaite

¹⁸ Cia thu hmuahhmuah John hnuahlunte in John hnenah rel tlang i. Cen John in a hnuahlunte pahnih ko ai,

¹⁹ “John in kawi tuh i, ti ai a tihnak mi isim, ihlahle a dang iang tuhlai i ing maw?” tiin Bawipa zawt tuhin hlat i.

²⁰ Jesuh hnen hleng fangin anite in, “Baptisma petu John in ‘hleng tuh i a tihnak mi tu nangmah isim,’ ihlahle midang iang tuhlai i ing maw?” tiin ti tlang i.

²¹ Cialak fangin Jesuh in mi tampui amahte cak lohnak le urhnak a phunphun cakruai ai khuasia molhmi khai cakruai ai mitcaw tampui khai khua hmuruai i.

²² Cia hnuaah Jesuh in John hnuahlunte tu, “Let tu ilai ning hmuhnak le ning linghnak heh John hnenah rel tu ih: mitcawte in khua hmu zo i, kebai mite phaniu in vak thil leh i, phar ur a urtute thiang leh i; naa ngongte khua za tlang i, mithite tho leh ai mifarahte hnenah thuthangpha rel zo i.

²³ Kaimah ai thu ah sangsamhnak a nai lotute tu mihmuifu i,” tiin sawn i.

²⁴ John ai a hlathnak palaite a let tlang hnuaah Jesuh in John ai thula tu mi tampui hnenah hetihin rel i: “Ramkhing ah ning vak fangin ziang hmu tuhin feh tlang i si? Hlivua in a hmut manin a hlin hnelhno hampa im?

²⁵ Ziang hmu nuam in feh tlang i si? hnikpon mankhung a siltu sik nuam in maw? Ciabang hnikpon mankhung sil ai nuam ngai in a umtute tu kumpibawi inn lek ah um tuh i.

²⁶ I rel tucuk ih: Ziang sik nuam in feh tlang i si? Prophet sik nuam in maw? I, prophet sik nuam in feh tlang peu i si; ikhalselai ning hmuhnak heh prophet tahin a thawmlian sawn i.

²⁷ Zaimantifangin John thula heh Lai Thianghlim songah, ‘Pathian in nang ca lampui seltu tuhin na hlanah i palai hlat tuh ing, ti i,’ tiin um i.

²⁸ Fiang ngai in ning rel ing: Minung ai tehnak hmuahhmuah lakah John tahin a lian sawn le a thawmlian sawn aisu khai um lo i. Ikhalselai Pathian Ukhnak songah mi nauta ber heh John tahin lian sawn i!” tiin ti i.

²⁹ Ciatihin a relhnak tu misenpui in za liang i. Anite le siahkhawltute tu Pathian ai dikcanghnak a pomtute i ai John ai baptisma langtute i.

³⁰ Ikhalselai Farasite le Danthiam mite in amahte caah Pathian tumtekhnak khiah pom tlang lo ai John ai baptisma a lang nuam lotute i.

³¹ Cen Jesuh in, “Tun san minungte heh ziang thawn santeh tuh ini ing? Ziang thawn bang i?

³² Dawr hmunai a totu naupangte bang i. Naupang burkhat in a dang burkhatte hnenah: ‘Mopuai la ning sak napui lam ning nuam tlang lo i; Mithi la ning sak napui kap ning nuam lawnsi lo i,’ a tiduntu naupangte bangtluk i.

³³ Baptisma petu John hleng ai rong ul le cabitti ding loin a um awng fangin ‘Ramhuai in molh i,’ ti tlang i si.

³⁴ Mi Fapa hleng ai a ai a ding fangin ningmah in ‘Hemi pa heh sik tu ih! Rong ham le cabit ham pa heh; siahkhawltute le misualte ai rualpui i!’ iti tlang i si.

³⁵ Ikhalselai Pathian fimhnak a dik zia heh a pomtute in larruai i,” tiin ti i.

Simon Inn Ah Jesuh Hleng I

³⁶ Farasi mi pakhat in Jesuh tu zanfak ai tuhin sawm i. Jesuh tu feh ai rong ai tuhin to i.

³⁷ Cia khua ah nunsual ai a nungmi nupang pakhat um i. Ciami nu in Jesuh tu Farasi pa inn ah rong ai tuh i, ti a za fangin alabaster tihnak lungto ai bawnhnak thawl pakhat in yihmui koih ai,

³⁸ Jesuh hnua lam, a keham ah ding ai kap kongin a mithli in Jesuh ke far manin beh i. Cen Jesuh ke heh a sam in nawt ai a thut hnuaah yihmui burh i.

³⁹ Ciami heh Farasi pa in hmu fangin a thinlung niu in, “Hemi pa tu prophet ngaingai lekhaw a daitu hnelhno nupang nu heh aisu i, ti ling tuhai zaibang nuncan sual in nung i, ti ling tuh i,” tiin ruat i.

⁴⁰ Jesuh in Simon hnenah, “Simon, thu i rel nuamhnak um i,” tiin ti i. Simon in, “Sayapa, i rel tu!” tiin ti i.

⁴¹ Jesuh in, “Tangka puttu pa hnenin tangka a putu mite pahnih um i. Pakhat pa in ngun tangka za nga pu ai a dang pakhat in sawmnga pu i.

⁴² Anite pahnih in rul ben kawm veve lo i. Ciamanin anite pahnih in map i. Ciamite pahnih lakah aisu deuh in tangka puttu it tuh deuh i?” tiin ti i.

⁴³ Simon in, “Tangka tam deuh a map mi pa in it tuh deuh i, tiin ruat ing,” tiin ti i. Ciafangin Jesuh in, “Dik i,” ti i.

⁴⁴ Cen nupang nu lamah a her hnuaah Simon hnenah, “Hemi nupang nu heh hmu aw sim? Na inn songah lut ing; nang in i ke somhnak ah ti i pe lo isi, ikhalselai he nu in i ke heh a mithli in som ai a sam in a hul tian nawt i.

⁴⁵ Nang incen thut in i hmuak lo isi, ikhalselai he nu incen i hleng sawngpah in catloin i ke thut i.

⁴⁶ Nang incen i lu ah pawh tuhin olive thau i pe lo isi, ikhalselai ani incen i ke heh yihmui in i mat i.

⁴⁷ Na rel ing: a mi ithnak lianpui a larruaihnak in a sualhnak tampui heh ngaithiam i, ti larruai zo i. Ikhalselai a sualhnak tlawmniu lek a ngaithiammi in ithnak a tlawmniu ian larruai ve i,” tiin ti i.

⁴⁸ Cen Jesuh in nupang nu hnenah, “Na sualhnakte tu ngaithiam zo ihang,” tiin ti i.

⁴⁹ Rong aihnak cabuai ai a totu midangte in amahte thinlung niu in, “Sualhnak rin a hlatthaitu he pa heh zaibang minung ini?” tiin ti tlang i.

⁵⁰ Ikhalselai Jesuh in nupang nu tu, “Na sanghnak in na o zo i; hlamuang niu in tlung tuhang law,” tiin ti i.