Luka 5 - Zanniat Bible

A Ko Hmasaber Hnuahlunte

¹ Vaikhat ah Jesuh tu Gennesaret Tili kamah ding ai cialai ah Pathian thu a relhnak ngai nuam in misenpui in amah nong tuh cuh tlang murhmo i.

² Cialai ah Jesuh in ti kamah lawng pahnih a henhnak khiah hmu i. Ngapomtute tu lawng songin suak tlang ai surte som tlang thliahthlo i.

³ Jesuh tu a khatta lawng songah lut i; cia lawng heh Simon ai i; cen lawng heh ti kamin a hla deuh ah thawn tuhin ruai i. Cia lawng songah Jesuh tu to ai mi senpui thuzirh i.

⁴ Thurel a ben fangin Simon hnenah, “Ti thukhnak lamah na lawng thawn tulai na rualpuite thawn ning sur heh vorh tucuk ih,” tiin ti i.

⁵ Simon in, “Bawipa, zuam ngai in zankhuavar vorh hnelhno napui zaikhai awk lo i. Ikhalselai vorh tu ih, kin ti lesikhaw vorh tuh i ing,” tiin ti i.

⁶ Sur khiah vorh tlang ai nga tam roh awk bial ai sur tianin zik tum sek i.

⁷ Ciafangin lawng dang ai a rualpuite khiah, “Kin bawm tu i law,” tiin kut zap tlang i. Kawi tlang ai amahte lawng pahnih heh nga a dim in dah ai lawng tu pil dawn lio i.

⁸ Ciami heh Simon in hmu fangin Jesuh hmaiah a khuk caicin ai Jesuh hnenah, “Bawipa, i hnenin a hlapui ah feh tu; zaimantifangin kaimah heh misual ing!” tiin ti i.

⁹ Amah le a rualpuite tu nga tampui awk bial manin multing tlang ngai i.

¹⁰ Ciabang thotho in amah thawn nga a pomtu Zabedi ai fapa James le John khai mangbang kawm ve i. Jesuh in Simon tu, “Na thinlau mah; tunai panin minung pomtu tuh isi,” tiin ti i.

¹¹ Lawngte tu ti kamah comruai ai amahte thil hmuahhmuah hlum ai Jesuh hlun tlang i.

Jesuh In Mipa Cakruai I

¹² Vaikhat ah Jesuh tu phar ur a tuartu pa pakhat umhnak khua ah hleng i. Ciapa in Jesuh a hmu fangin a hmaiah bok ai, “Bawipa, na nuam lekhaw i cakruai thai isi,” tiin ngen i.

¹³ Jesuh in a kut a dai hnuaah, “Na thiangruai i nuam i, thiang tuhang,” tiin ti i. Cammalak in a urhnak lawm i.

¹⁴ Jesuh in, “Aisu khai rel mah, ikhalselai feh tu vurvo lai suangbawi in na sik tuseh; cen na cak zo i, ti khiah mi zongzong in na hmu thilhnak tuhin Moses dan bangin hibawlhnak sel tu,” tiin ti i.

¹⁵ Ikhalselai Jesuh thula heh hmun cangcang ah thang amam i, mi in ben amam ai a thurelhnak ngai tlang i; cen amahte urhnak khai cakruai i.

¹⁶ Cia hnuaah mizapui hnenin feh ai a dap hmunah amah lekin sawngen de i.

Jesuh In Mi Ze Pa Cakruai I

¹⁷ Nikhat ah Jesuh in thu a zirh laitak ah Jerusalem khua le Judea ram le Galilee ramai khua cangcang in a hlengtu Farasi le Danthiam mite hrekkhat khai to tlang ve i. Miur cakruai thilhnak Bawipa ai huham tu Jesuh vumah um i.

¹⁸ Cialai ah mi ze pa pakhat tu a ihphah thawn laang in zawng tlang ai Jesuh hmaiah dah tuhin inn songah lutpui tum tlang i.

¹⁹ Ikhalselai mi tam ze manin a fehpui thilhnak lampui um lo i. Ciamanin inn vumah kaipui ai innphu a bal hnuaah misenpui lakah Jesuh hmai rori ah a ihphah thawn hla tlang i.

²⁰ Amahte ai sanghnak naidan heh Jesuh in a hmu fangin mi ze pa hnenah, “I rual, na sualhnak tu ngaithiam in um zo i,” tiin ti i.

²¹ Danthiam mite le Farasite in, “Pathian thangsiathnak hebang a pongtu minung heh zaibang minung ini tur? Pathian pakhat ian sualngaithiamtu i,” tiin pakhat le pakhat ti dun i.

²² Jesuh in anite ruathnak ling ai anite hnenah, “Hemi bangin zaimanin ruat i si?

²³ “Na sualhnak ngaithiam zo i,’ ti maw, ihlahle ‘Tho tulai feh tu,’ ti bai sawn pa?

²⁴ Mi Fapa in laivum ahhen sualhnak ngaithiam thai i, ti ning hnenah larruai tuh ing,” tiin ti i. Cen mi ze pa tu, “Na rel ing: Tho tu! Na ihphah lang tulai na inn ah tlung tu,” tiin ti i.

²⁵ Camkhatniu ah mi ze pa tu mizapui hmaiah tho ai a ihphah lang ai Pathian thangphat kongin a inn ah tlung i.

²⁶ Mipui te mangbang tlang ngai i! Lau kongin Pathian thangphat tlang ai, “Tun nia ai khuaruahhar thil kin hmuhnak tu zaibang thil khiah ipa!” tiin rel tlang dekdo i.

Jesuh In Levi Kohnak

²⁷ Cia hnuaah Jesuh tu feh ai siahkhawltu Levi tihnak pa a zungkhan songai a to khiah hmu i. Jesuh in a hnenah, “I hlun tu,” tiin ti i.

²⁸ Levi tu tho ai zaizongza zam in Jesuh hlun i.

²⁹ Cen Levi in a inn ah rong aihnak puai lianpui Jesuh ca bawn ai a sawm mite lakah siahkhawltute le midang tampui tel tlang i

³⁰ Farasi mi hrekkhat le Danthiam hrekkhat amah bu songtelte tu Jesuh hnuahlunte hnenah phuncam tlang murhmo i. “Akontih in siahkhawltu le misualte thawn rong ai tlang i si?” tiin zawt i.

³¹ Jesuh in, “A cak mite in sibawi kul lo i, a miurte ian in kul i.

³² Midikcangte ko tuhin kawi lo ing; misualte sual sirruai tuhin kawi ing,” tiin ti i.

Rongul Thu

³³ Mi hrekkhat in Jesuh hnenah, “John ai hnuahlunte tu rong ul de ai saw khai ngen tlang de i; cen Farasite ai hnuahlunte inkhai ciatih bangin bawn ve de i. Ikhalselai na hnuahlunte tu amahte nuamnuam in ai tlang i,” tiin ti i.

³⁴ Jesuh in, “Mopuai a simtute tu mohoitu pa amahte hnenai a um songah rong loin um tlang tuh im?” tiin zawt i. “Um tlang tuh lo i!

³⁵ Ikhalselai mohoitu pa amahte hnenin a lang leh can hleng tuhai ciafangin rong ul tlang leh tuh i,” tiin ti i.

³⁶ Cia hnuaah Jesuh in anite hnenah hetihin santehhnak rel i, “Aisu khai hnikpon hlun dathnak tuhin hnikpon thar zik awng kel lo i. Zik lekhaw hnikpon thar heh zik tuh laklawh ai hnikpon hlun ah a dat fangin kaih tuh fawn lo i.

³⁷ Cen aisu inkhai cabitti thar heh savun thawl hlun songah thun tuh lo i, zaimantifangin cabitti thar in thawl hlun heh khoiruai tuhai cabitti tu bua tuh zel ai thawl khai hnawm tuh sek i.

³⁸ Ciahnak tahin cabitti thar khiah savun thawl thar songah thun tuh sawnhnak i.

³⁹ Cen cabitti hlun a ding hnuaah aisu inkhai cabitti thar ding nuam tlang tuh lo i. ‘A hlun pha sawn i,’ ti tlang i,” tiin rel i.