Luka 24 - Zanniat Bible

Jesuh Tholehhnak

¹ Nipui nia zingniu in nupangte tu bawnciahnak rimhmuite keng in hlan ah feh tlang i.

² Hlan khamhnak lungtleppui a thawn zo khiah hmu i;

³ ciamanin lut tlang i, ikhalselai Bawipa Jesuh ai luang tu hmu lo i.

⁴ Ngaihsunur roh ai ding i; ciata ai ding teng ah rin lopui in hnikpon tleu ngai a siltu mi pahnih amahte hiangah ding kawm i.

⁵ Lau tlang roh ai laipua ah bok tlang i; ciafangin mite pahnih in, “Zaimanin a thimi lakah a nungmi si i si?

⁶ Heta ah um nawn lo i; tho leh zo i. Galilee ah a um laiah ning hnenah a relhnak khiah hih nawn lo i sim?

⁷ ‘Mi Fapa tu misualte kut songah pe in um tuh i; Thinglamteh vumah khen tuhai nithumhnak nia ah tho leh tuh i,’ a tihnak khiah!” tiin ti kawm i.

⁸ Cen nupangte in a ponghnak khiah hih tlang leh ai,

⁹ Hlan in lel leh hnuaah hnuahlunte hlaikhat le midangte hnenah rel i.

¹⁰ Nupangte tu Mary Magdalene, Joana le James ai nu Mary i. Anite le nupang dang amahte hnenah a teltute in hnuahlunte khiah rel tlang i.

¹¹ Ikhalselai a hnuahlunte in nupangte ai relhnak heh thulovang ah ruat ai sang tlang lo i.

¹² Ikhalselai Peter tu tho ai hlan ah dawp i. Ut in a kian fangin luang tuamhnak pon nemniu ian hmu i; a dang zaikhai hmu lo i. Cen ciatihin a canghnak heh ngaihsunur kongin inn ah tlung i.

Emmaus Ah Feh I

¹³ Cia nia thotho ah Jesuh a hlun awngtu mite pahnih tu Jerusalem an peng sarih dung a hlahnak Emmaus tihnak khua ah feh kawm i.

¹⁴ Cen tunbai niu ai thil canghnakte rel kawm hnelhno i.

¹⁵ Ciatihin pong ai a rel kawm laitak ah Jesuh amah rori in man ai vak tlang i.

¹⁶ Ani tu hmu napui lingthiam kawm lo i.

¹⁷ Jesuh in anite hnenah, “Ning vak kongin ziang thu rel kawm hnelhno i si?” tiin zawt i. Cen lungsia mithmai thawn ding kawm i.

¹⁸ Pakhat sawn, Cleopas tihnak pa in, “Jerusalem khua a tlawngtu mi zongzong lakah nangmah ian heh tun ni thum songah Jerusalem khua songai thil canghnakte a ling lotu isi?” tiin ti i.

¹⁹ Ani in, “Ziang thil maw?” tiin zawt i. Anite in, “Nazareth Jesuh vumai thil a canghnakte!” tiin sawn kawm i. “Hemi pa tu Pathian hmai le misenpui hmaiah aisusu inkhai prophet i ai a ponghnak ituseh, a bawnhnak ituseh, huham nai roh i, tiin amahte in ruat sio i.

²⁰ Kin suangbawi upate le kin hotute in a thihhnak rel tuhin mi kut ah pe ai ciatihin thinglamteh vumah rek tlang i.

²¹ Cen ani tu Israel mi tlantu tuh i, tiin umlamhnak a nai awng ngai mi i. Ciahlaiah ciabang thil a cang hnua tunnia heh a nithumhnak nia i.

²² Kin lakai nupang hrekkhat in ngaihsun kin urruai fawn i; tun ninghla zingniu in hlan ah feh tlang i;

²³ ikhalselai a luang hmu tlang lo i. Let tlang ai ‘Kinmah in vancungmi hmu ai Ani tu nung leh zo i, tiin kin rel i,’ tiin ti kawm i.

²⁴ “Kinmah lakai mi hrekkhat hlanah feh tlang ai nupangte relhnak bang rori in hmu tlang ve i; ikhalselai ani tu hmu tlang thotho lo i,” tiin ti kawm i.

²⁵ Cen Jesuh in anite hnenah, “Ning tu ning voi ze i! Prophette ai relciahnak sang ning har ze i!

²⁶ Messiah ca he thilte hmuahhmuah heh a tuar ta sio hnuaah a songlawihnak songah lut kul tuh lo im?” tiin ti i.

²⁷ Cen Jesuh in Lai Thianghlim song Moses laibute ai panin prophette ai nganhnak tian, amah ai thu a nganhnak hmuahhmuah khiah anite hnenah relfiang i.

²⁸ Amahte feh tumhnak khua hleng dawn fangin Jesuh tu a feh tuhlai bangin um khel i.

²⁹ Ikhalselai anite in, “Kin hnenah zancam tu ve! Khuahnua zo ai khua thim ihang,” tiin sawm kawm i. Ciamanin a hnenah cam tuhin hlun i.

³⁰ A hnenah to ai rong ai tlang i. Sang khiah lang ai saw a ngen hnuaah khan ai anite khai zem i.

³¹ Ciafangin a mit var sungso ai Amah i, ti khiah ling kawm i; ikhalselai anite mithmuh ah pai leh lio i.

³² Amahte veve tu, “Lampui ah kin vak tlang lakah kin hnenai a ponghnak le Lai Thianghlim a relfiang hnelhno laiah kin songah maikang bangin kin um tho lo im maw?” tiin ti dun i.

³³ Cammalak in Jerusalem ah let kawm ai hnuahluntu hlaikhat le a dangte taikhawm tlang khiah hmu kawm ai,

³⁴ “Bawipa tu tho leh taktak i! Simon hnenah lar i!” ti ai a rel tlang hnelhno khiah za kawm i.

³⁵ Anite pahnih inkhai lam lakai thil a canghnak thu le sang a khan sawng fangin Bawipa i, ti khiah a lingthiamhnak thute rel kawm ve i.

Hnuahlunte Hnenah Jesuh Lar I

³⁶ Anite pahnih in lampui ai thil a canghnak thute khiah hnuahlunte hnenah a rel kawm laitak ah cammalak in anite lakah Bawipa heh ding ai, “Ning hnenah daphnak um tuseh,” tiin ti i.

³⁷ Mirauhla hmu ising tiin ruat ai lau tlang roh i.

³⁸ Ikhalselai ani in, “Zaimanin thin ning lau i? Zaimanin ning thinlung songah sangsamhnak um dekdo i?

³⁹ I kut le i kete heh sik tu ih! Kaimah ing! I dai tu ilai ling tuh i si; zaimantifangin mirauhla in ruh le taksa nai lo i, kai tu nai ing ti i hmu i si!” tiin ti i.

⁴⁰ Ciatihin rel ai a kut le a kete hmuh i.

⁴¹ Anite in sang thil thotho lo i; ang roh ai mangbang tlang roh fawn i. Ciamanin anite tu, “Heta ah ai pha zaital nai aw i sim? tiin zawt i.

⁴² Anite in nga pakhat suang cia pe ai,

⁴³ lang ai amahte mithmuh ah ai i.

⁴⁴ Cen anite hnenah, “Ning hnenah i um laiah i relhnak awng hnelhno khiah he thilte nakhaw: Moses ai dan laibu song, prophette ai nganhnak laibu song le Saam labu songai kaimah ai thu nganciahnak tepawl tu khim kul sio i,” tiin ti i.

⁴⁵ Cen a thinlung mit varruai ai Lai Thianghlim ai nganhnak khiah lingthiam tlang i.

⁴⁶ Anite hnenah, “A nganciahnak tu hetihin i: Messiah tu tuar tuhai a thi hnua nithumhnak ah tho leh tuh i.

⁴⁷ Cen Jerusalem khua ai panin miphun hmuahhmuah hnenah amah hming in sualsirhnak le sualngaithiamhnak thuthang heh phuang in um tuh i.

⁴⁸ Ning tu he thil canghnakte ai thulingtute i si.

⁴⁹ Cen Pa ai ning thukhamhnak khiah kaimah rori in ning vumah hlat tuh ing. Ikhalselai vum lamin huham ning hnenah a hleng hlanlo khuapui songin iang tu ih,” tiin ti i.

Jesuh Vancung Ah Kai I

⁵⁰ Cen khuapui songin suakpui ai Bethany khua tian feh tlang i; Ciata ah a ban pharh ai hmuifu pe i.

⁵¹ Ciatihin hmuifu a pe laitak ah amahte hnenin suak ai vancung ah kai i.

⁵² Ani tu bia tlang ai Jerusalem ah lungawi ngai in let tlang i.

⁵³ A can hmuahhmuah Biakinn songah Pathian thangphathnak ah hmang tlang i.