Luka 19 - Zanniat Bible

Jesuh Le Zakia

¹ Jesuh tu Jericho ah hleng ai khuasong ah vak zianzo i.

² Ciata ah siahkhawltu upa pakhat, milian ngai, Zakia tihnak um i.

³ Jesuh tu aisu i, ti hmu nuam napui ani tu mi dung niam hlaiah mi tam ze manin hmu thil hrimhrim lo i.

⁴ Ciamanin misenpui hmaiah dawp ai ciata in a vaktu Jesuh hmu nuam in thaikung vumah kai i.

⁵ Jesuh cia hmun a hleng fangin a vum lam sik ai, “Zakia, rang ngai in tolh tu, tunnia na inn ah tlung tuh ing,” tiin ti i.

⁶ Zakia tu rang ngai in tolh ai Jesuh tu a inn ah ang ngai in tlungruai i.

⁷ Ciami a hmutu hmuahhmuah in phuncam tlang murhmo ai, “Hemi pa tu misual pa inn ah tlung nakhaw!” tiin ti tlang i.

⁸ Zakia tu ding ai Bawipa hnenah, “Bawipa, i ngai tu! I naihnak ai a hrek heh mifarahte pe tuh ing; cen i zawlhnak um lekhaw a let li in rul leh tuh ing,” tiin ti i.

⁹ Jesuh in a hnenah, “Tunnia he pa ai inn ah ohnak hleng zo i, zaimantifangin he pa khai Abraham ai tesinfa ve i.

¹⁰ Mi Fapa tu a paimi si tuh le o tuhin kawi i,” tiin ti i.

Sui Tangka Santehhnak

¹¹ Ciatih ai a relhnak ngaitu misenpui hnenah Jesuh in santehhnak pakhat rel i. Amah tu Jerusalem hleng dawn hang ai misenpui incen Pathian Ukhnak hleng dawn ihang tiin ruat tlang i.

¹² Ciamanin hetihin rel i: “Vaikhat ah bawi pakhat um ai ani tu ram hlapui ah feh in kumpibawi ah a cangruai hnuaah a inn ah tlung tum leh i.

¹³ Ciatihin a feh hlanah a hnenumte pahra ko ai sui tangka fangkhat ṭen in a pe hnuaah, ‘Hemi thawn sumpai tucuk ih; i let fangin zaizah ngah na i si maw, sik tuh ing,’ tiin ti i.

¹⁴ A ram song mite in ciami a bawipa heh hua tlang ai ciamanin ‘Hemi pa tu kumpibawi tuhin kin daih lo i,’ tiin a reltu tuhin palai hlat tlang i.

¹⁵ “Ciapa tu kumpibawi a cang hnuaah tlung leh i. A hleng sawng fangin sumsaw zaizah ngah i ti ling nuam in a hnenumte pahra heh a hnenah ko i.

¹⁶ Pakhat pa tu kawi ai, “Bawipa sui tangka fang hra na pehnak in sui tangka fanghra a miat ngah ing,’ tiin ti i.

¹⁷ A bawipa in, ‘Pha i, nang heh hnenum pha isi. Thil cikniu vumah rintlak na imanin khuapui pahra uktu tuhin na dah tuh ing,’ tiin ti i.

¹⁸ Pahnihhnak pa kawi ai, Bawipa, sui tangka fangkhat na pehnak in fang nga a miat ngah ing,’ tiin ti i.

¹⁹ Ciapa tu khuapui panga uktu ah na dah tuh ing,’ tiin ti i.

²⁰ “A dang hnenum pakhat kawi ai, ‘Bawipa, heta ah na sui tangka um i. Ponniu in tuam ai dah ing.

²¹ Nang tu mi ti fekfek na imanin na lau ing. Na nai lohnak khai lang de ai hlaici na vorh lohnak khai khawm de isi,’ tiin ti i.

²² Ciafangin a bawipa in, ‘Hnenum pha lo! Nangmah hnawlhnak tuhin nangmah ponghnak lala hmang tuh ing! Mi ti fekfek ing ti i ling isi, kaimah nai lohnak lang ai i vorh lohnak khai khawm ing ti ling isi.

²³ Ciatih ilekhaw zaimanin i tangka tu tangka dahhnak zung ah dah lo isi? Dah ta silai i let fangin tangka pung thawn ngah tuh napui ing! tiin ti i.

²⁴ Cen ciata ai a dingtute hnenah, ‘A sui tangka heh lang tu ilai sui tangka fang hra a naitu hnenum hnenah pe tu ih,’ tiin ti i.

²⁵ Ikhalselai anite in, ‘Bawipa, ani tu fanghra nai zo heh in! ti tlang i.

²⁶ A bawipa in, ‘Fiang ngai in ning rel ing” thil a naitu hnenah a dang khai belh tuh i; ikhalselai thil a nai lotu hnenin a naihsun tlawmniu khai lang sah tuhlai i.

²⁷ Cen a kumpibawi tuhin i daih lotu i ralte tu heta ah koih tu ilai i mithmuh ah rek tu ih,’ ti i,” tiin Jesuh in rel i.

Jerusalem Ah Songlawi Ngai In Lut I

²⁸ Jesuh in he thu a rel hnuaah amahte hmaiah Jerusalem ah feh i.

²⁹ Cen Olive mual ai Bethphage le Bethany khua hiang a hleng fangin a hmaiah a hnuahlunte pahnih khiah hlat ai,

³⁰ hetihin thucah i. “Ning hmai ai a umhnak khua songah lut tu ilai aisu inkhai a to awng lai lo laak niu pakhat ri in a khit khiah hmu tuh i si. A ri hawk tu ilai heta ah koih tu ih.

³¹ Aisu bang inkhai zaimanin hawk i si, tiin ning zawt lekhaw Bawipa in kul i tiin rel tu ih,” ti i.

³² Anite tu feh ai Jesuh ai relhnak bang rori in zaizongza hmu kawm i.

³³ Laak niu tu ri a hawk sah fangin a naitute in, “Zaimanin hawk i si?” tiin ti i.

³⁴ Anite in, “Bawipa in kul i,” tiin sawn kawm i.

³⁵ Cen laak niu heh Jesuh hnenah fehpui kawm i. Cen laak vumah pon dan tlang ai Jesuh toruai i.

³⁶ Laak to in feh ai a fehhnak lampui ai misenpui in amahte pon phah tlang diamdo i.

³⁷ Jerusalem khua hiang lampui Olive Mual in a zuksuk hmun a hleng fangin a hluntu misenpui in Pathian thangphat tlang ai, thil mak ngaingai tampui hmu manin amahte aw naih tawp in au tlang dekdo i.

³⁸ “Bawipa ai hming in a hlengtu kumpibawi vumah daphnak um tuseh!” tiin ti tlang i.

³⁹ Cen misenpui lakah a umtu Farasi mi hrekkhat in Jesuh tu, “Sayapa, na hnuahlunte heh dap niu in um tlang tuseh, rel tu!” tiin ti i.

⁴⁰ Jesuh in, “Fiang ngai in ning rel ing: Anite tu dap niu in um lekhaw he lungtote in au tuh dekdo i,” tiin ti i.

Jerusalem Manin Jesuh Kap I

⁴¹ Jerusalem khuapui nong betbo hang ai a hmu ngah fangin Jesuh kap i:

⁴² “Tunnia ah daphnak hrangah ziang kul ini, ti khiah ling silai maw! Ikhalselai ciami tu na hmu thil tuh loin a thuphnak i!

⁴³ Ning ralte in ning kulh tuh sio ai ning kham sio le khuahacang in ning hnen kawihnak can hleng tuh i.

⁴⁴ Ningmah ituseh, na ving dawlhnak songai a umtu na minungte ituseh, rek tuh sek i. Nangmah o tuhin Pathian a hleng can na ling lo manin lungto pakhat khai a thuan dun in a tangtu um tuh lo i!” tiin ti i.

Biakinn Ah Jesuh Feh I

⁴⁵ Cen Jesuh tu Biakinn songah feh ai thil zuartute khiah hnawt sek i.

⁴⁶ “Lai Thianghlim songah Pathian in i Biakinn tu sawngenhnak inn i, tiin ko tuh i ti i. Ikhalselai ning incen rukote relhhnak kua ah cangruai i si!” tiin hau i.

⁴⁷ Nisiar in Jesuh tu Biakinn songah thuzirh i. Suangbawi upate, Danthiam mite le hotute in Jesuh heh rek nuam tlang i.

⁴⁸ Ikhalselai rekthilhnak lampui si thil lo i, zaimantifangin mi zongzong in a thurelhnak ponkam pakhat khai pelh loin ngai nuam tlang i.