Luka 18 - Zanniat Bible

Hmaitongnu Le Thukhantu Santehhnak

¹ Jesuh in a hnuahlunte heh thinnau loin sawngen a kuldan zirh nuam in santehhnak pakhat rel i.

² Amahte hnenah, “Khua pakhat ah Pathian kih lo ai minung khai hmaizah lomi thukhantu pakhat um i.

³ Cia khua thotho ah hmaitongnu pakhat um ve ai hmaitongnu in, ‘I raltu thawn thu kin naihnak ahhen i bawm tu hram law,’ tiin tun le tunin ngen leklo de i.

⁴ Thukhantu in cia thu heh can raipui rel sah nuam loin um i; ikhalselai hnuavai fangin ‘Kaimah in Pathian kih lo ai minung khai hmaizah lo napui,

⁵ he hmaitongnu in hnai i hnok ṭiode manin tun tu rel sah tuh ing. Rel sah hlah lengkhaw awlcom loin kawi tuh leklo ai a tawphnak ahcen kaimah lehlam thincawl in i bawn tuh i,’ tiin ruat i,” tiin rel i.

⁶ Cen Bawipa in anite hnenah, “Hemi a dik lomi thukhantu ai ponkam heh ling tlang i si!

⁷ “Ciatih ilekhaw Pathian in amah ai bawmhnak ngen in sun le zan a autu hnelhno a minungte tu thukhan sah loin um tuh im?

⁸ Fiang ngai in ning rel ing: rang ngai in rel sah tuhai thudik coruai tuh i. Ikhalselai minung fapa heh laivum ah a hleng fangin sanghnak naitu hmu ni ngai maw?” tiin ti i.

Farasi Le Siahkhawltu Santehhnak

⁹ Jesuh in he santehhnak tu, mipha ngaingai ai a ruatduntu le midang hmuahhmuah a zohsuamtute hnenah a relhnak i.

¹⁰ “Vaikhat ah mite pahnih tu sawngen tuhin Biakinn ah feh kawm i. Pakhat tu farasi i ai pakhat tu siahkhawltu i.

¹¹ Farasi pa tu a hla thah ah a mah lek ding ai hetihin sawngen i. ‘Aw Pathian, kai tu midang bangin duhham lo ing, thudonrel lo ai kangkawm sualhnak bawn lo manin thang na phat ing. Khiata ai a umtu siahkhawltu bang ilo manin na thang na phat ing.

¹² Zarh khat ah vel hnih rong ul ing, i ngahhnak hmuahhmuah songin sawm ah pakhat na pe ing,’ ti i.

¹³ Ikhalselai siahkhawltu pa tu a hla thah ah ding ai van lam rin sik ngam loin a kang cum ai ‘Aw Pathian, ning i hio tu hram law; kai tu misual ing,’ tiin ti i.

¹⁴ Fiang ngai in ning rel ing: Farasi mi pa ilo in siahkhawltu pa sawn heh inn ah a tlung fangin Pathian hmaiah thudik cotu i. Zaimantifangin aisu khai amah veve a khaisangduntu in nemhnak tuar tuhai thinnem mi tu khaisang tuh i,” tiin ti i.

Jesuh In Naupang Hmuifu Pe I

¹⁵ Mi hrekkhat in amahte fate vumah Jesuh in kut suan tuseh ti daih in Jesuh hnenah heh koih tlang i. Ciatihin a bawn khiah a hnuahlunte in hmu fangin hau tlang i.

¹⁶ Ikhalselai Jesuh in naupangte heh ko ai, “Naupangte tu i hnenah kawi tlang tuseh, kham mah ih, zaimantifangin Pathian Ukhnak tu hebang mite ai i.

¹⁷ Hemi heh hih tu ngio ih! Aisu inkhai Pathian Ukhnak heh naupangte ai sang bangin a sang lotu heh cia ukhnak songah lut thil tuh lo i,” tiin ti i.

Milian Pa

¹⁸ Judah mi hotu pakhat in Jesuh hnenah, “Zirhtu pha, kumkhua nunhnak co tuhin ziang bawn tuh ing?” tiin zawt i.

¹⁹ Jesuh in, “Zaimanin mipha, tiin i ti isi? Pathian pakhat siar lo mipha dang um lo i.

²⁰ Thupehnakte ling hlen ilo isim: kang kawm sualhnak bawn mah, mi rek mah, ruko mah; thudonrel mah; na nu le na pa upat tu,’ tihnakte khiah!” tiin sawn i.

²¹ Ciapa in, “I naupangniu lai pahin he thupehnakte tu hlun zo sek ing,” tiin ti i.

²² Ciami heh Jesuh in a za fangin a hnenah, “Na bawn kulhnak pakhat um lai i. Na naihnak hmuahhmuah zuar tusek lai na ngahhnak tangka heh mifarahte pe tu; cen vancung ah sumsaw nai tuh isi. Cia hnuaah kawi tulai i hlun tu,” tiin ti i.

²³ Ikhalselai cia thu heh ciapa in a za fangin a lungsia i, zaimantifangin ani tu milian ngai i.

²⁴ Jesuh in a lungsia hmu fangin hetihin rel i: “Milian ca ahcen Pathian Ukhnak songah lut heh zaitlukin har i!

²⁵ Milian pakhat Pathian Ukhnak songah lut tahin kalauk pakhat khimhuk nabil songah lut bai sawn i,” tiin ti i.

²⁶ Ciami heh misenpui in za tlang fangin, “Ciatih ilekhaw aisu heh ohnak co thil tuh i?” tiin zawt tlang i.

²⁷ Jesuh in, “Minung ca cang thil lo tihnak tu Pathian ca ahcen cang thil i,” tiin ti i.

²⁸ Cen Peter in, “Sik tu! Kin innsang zam in nangmah na hlun tlang i ing,” tiin ti i.

²⁹ Jesuh in, “I, na relhnak heh dik i; Fiang ngai in ning rel ing: aisu khai a inn ituseh, a nupui ituseh, a unau ituseh, a nu le a pa ituseh, a fate ituseh, Pathian Ukhnak hrangah hlum lekhaw,

³⁰ tun san ah a let tampui in ngahhnak nai tuhai a hleng tuh san ah kumkhua nunhnak ngah tuh i,” tiin rel i.

Jesuh In A Thi Tuh Rel Thumkhimhnak

³¹ Jesuh in a hnuahlunte hlaihnih khiah hmundang ah fehpui ai anite hnenah, “Ngai tu ih! Kinmah heh Jerusalem ah feh tlang tuhai Mi Fapa ai thu, prophette ai relciahnak hmuahhmuah khiah khim tuh i.

³² Gentile mite kut ah hlengruai tuhai anite in hnihsarelhnak ah hmang tlang tuh i, zohsuam tuhai cil thuih tlang tuh i.

³³ Vit tuhai rek tlang tuh i, ikhalselai nithumhnak nia ah tho leh tuh i,” tiin ti i.

³⁴ Ikhalselai ciami thu tu a hnuahlunte in ling thil tlang lo i; a ponghnak ai sullam khiah thup sah imanin Jesuh ai ponghnak khiah a sullam ling thil tlang lo i.

Mitcaw Kutdawh Cakruai I

³⁵ Jesuh tu Jericho khua lamah feh ai a hleng dawn fangin mitcaw pakhat lam hiangah kut dawh in to i.

³⁶ A hiang in mi tampui lan khiah a za fangin, “Ziang heh ini?” tiin ruat i.

³⁷ Anite in, “Nazareth mi Jesuh kawi i,” tiin rel tlang i.

³⁸ Ciapa in, “Aw David ai fapa Jesuh, ning i hio tu hram law,” tiin au dekdo i.

³⁹ A hmaiah a umtu mizapui in hau ai dap niu in um tuhin rel i. Ikhalselai ani incen, “David ai fapa, ning i hio tu hram law,” tiin au amam i.

⁴⁰ Ciamanin Jesuh tu ding ai, “Mitcaw pa heta ah koih tu ih,” tiin thupe i. A hnenah a hleng fangin Jesuh in,

⁴¹ “Ziang bawn sah tuh na daih i?” tiin zawt i. “Bawipa, khua hmu thil leh inglai i nuam i,” ti i.

⁴² Jesuh in a hnenah, “Ciatih ilekhaw khua hmu tu! Na sanghnak in na cakruai zo i,” tiin ti i.

⁴³ Cammalak in khua hmu thil ai Jesuh hlun kongin Pathian thangphat betbo i. Ciami heh mizapui in a hmu fangin amahte veksen in Pathian thangphat tlang i.