Luka 17 - Zanniat Bible

Sualhnak

¹ Jesuh in a hnuahlunte hnenah, ‘Sualhnak songah mi a tlokruaitu thil heh hleng tuh ṭiode i; ikhalselai cia thil a hlengruaitu caah tihikkul i.

² Hemi naupang pakhatkhat a sualruai tahin a hawng ah fang rialhnak lungtum pui khaih in tifingriat songah lon selai amah caah pha sawn i.

³ Ciamanin thil ning bawnhnak ah ralring tu ih. Ning unau sual lekhaw nunthutiam tu ih; sir lekhaw ngaithiam tu.

⁴ Na vumah ni khat songah vel sarih tian sual khalselai na hnenah kawi in ‘I sual sir ing,’ ti lekhaw ngaithiam tu,” tiin ti i.

Sanghnak

⁵ Hnuahlunte in, “Kin sanghnak heh khangruai tu amam law,” tiin Bawipa hnenah ti tlang i.

⁶ Bawipa in, “Ning in pakap ci tia sanghnak nai le i sikhaw thohmui kung heh ‘Na ham in phai tulai tifingriat songah bir dun tu,’ ti thil tuhai ning tihnak bangin cang tuh ngaingai i.

Hnenum Ai Ṭuanvo

⁷ “Santehhnak ah ningmah lakah pakhatkhat in hnenum pakhat nai i, ti bang selai, cia hnenum heh lovai, ihlahle tuukhal i ti selai, inn ah a tlung fangin ‘Rang tulai na rong ai tu,’ ti tuh i sim?

⁸ Ti tuh lo i si! Ciahnak tahin ani tu ‘Kaimah ca zanfak i suan tu; cen na rong suanghnak thuam sil tulai rong i ai lak i kil tu; ciahnua fang ian ah nang tu rong ai thil tuh isi,’ ti tuh i si.

⁹ Hnenum pa tu thu ning pehnak a bawn sio manin anghnak ponkam a vumah pong ning nuam awm?

¹⁰ Ciabang thotho in ningmah vum ahkhai i ve i; bawn tu ih, ti ai tihnak ning bawn ben fangin ‘Kinmah heh lawm tlak lo hnenum menma i ing. Kin ṭuanvo a bawntu ian i ing,” tiin ti tu ih,” tiin rel i.

Jesuh In Mi Sawmkhat Cakruai I

¹¹ Jesuh tu Jerusalem lam a feh fangin Samaria le Galilee ramri in feh zianzo i.

¹² Khua pakhat a hleng fangin ciami khua songah phar ur ai a urtute pahra in tawk tlang i. Lam hla thah ah ding tlang ai,

¹³ “Aw Jesuh, Bawipa, ning kin hio tu hram law,” tiin au tlang i.

¹⁴ Jesuh in hmu ai a hnenah, “Feh tu ilai suangbawite in ning sik tuseh,” tiin ti i. Anite a feh lakah cak tlang sio i.

¹⁵ Anite lakai pakhat pa in i cak zo i, ti a hmu dun fangin let ai aw cawm ngai in Pathian thangphat i.

¹⁶ Cammalak in Jesuh keham lai lakah bok ai Jesuh hnenah anghnak thu rel i. Ciapa tu Samaria mi i.

¹⁷ Jesuh in, “Cakhnak a ngahtute tu mi pahra i. Pakuate tang akonah i?

¹⁸ Zaimanin he ramdang mi pakhat ian Pathian hnenah anghnak pe tuhin kawi i?” ti i.

¹⁹ Cen Jesuh in, “Tho tulai feh tu. Na sanghnak in na cakruai zo i,” tiin ti i.

Pathian Ukhnak A Hlenghnak

²⁰ Farasi mi pakhat in, “Zaikom fangin Pathian Ukhnak hleng tuh i?” tiin Jesuh zawt i. Jesuh in, “Pathian Ukhnak tu mithmuh in hleng lo i.

²¹ Aisu inkhai ‘Sik tu ih! Heta ah um i! Khiata ah um i! tiin ning ti tuh lo i. Zaimantifangin Pathian Ukhnak tu ning songah um i,” tiin ti i.

²² Cen a hnuahlunte hnenah, “Mi Fapa ai nun lai can ni khat tal hmu thil ve selai tiin ning hiam can hleng tuh i, ikhalselai hmu thil tuh lo i si.

²³ Ning hnenah ‘Sik tu ih! Khiata ah um i!’ ihlahle ‘Sik tu ih! Heta ah um i!’ tiin ning titu um tuh i. Ikhalselai sik tuhin feh mah ih.

²⁴ Vantlingtleleuh in van khat lam tong in khat lam tian a tleu sio bangin Mi Fapa heh amah ai nia ahcen i tuh ve i.

²⁵ Ikhalselai hmasaber ah amah in tuarhnak harsa ngai tawk tuhai tun san minungte in hnawl tuh i.

²⁶ Noah san laiah a cang awng zo bangin Mi Fapa san ahkhai cang tuh ve i.

²⁷ Noah tu a lawng songah lut ai tilawi tlung fangin mi zongzong thi sek hlan tian mizapui tu nuam tlang ai ai le ding in hoi dun thliahthlo lai i.

²⁸ Lot san ah a cang awng zo bangin cang tuh ve i. Aisusu khai zu ding, sa ai; thil lai, thil zuar; hlaici cing ai inn sa tlang i.

²⁹ Lot in Sodom a tlansan nia ah van in mai le kat ruah bangin si ai mi zongzong thi sek i.

³⁰ Mi Fapa a lar nia ahcen ciatih bangin i tuh ve i.

³¹ Cia nia ahcen a inn diphun vumai a umtu in a inn songai umhnak thilri lang tuhin tolh maseh. Ciabang thotho in lo ai umtute khai inn ah tlung maseh.

³² Lot ai nupui heh hih lai aw i sim?

³³ Aisu khai amah ai nunhnak hup a tumtu in a nunhnak sung tuh i; a nunhnak a liamtu cenin a nunhnak ngah tuh i.

³⁴ Thutak ning rel ing: cia zan ah khuahluan pakhat ah mi pahnih it kawm tuh i; pakhat tu lang tuhai pakhat tu zam tuh i.

³⁵ Nupangte pahnih sum ruan dun tuh i; pakhat tu lang tuhai pakhat tu zam tuh i,” tiin ti i.

³⁶ (“Mi pahnih lo ah naper kawm tuh i: pakhat tu lang tuhai pakhat tu zam tuh i,” tiin ti i).

³⁷ Hnuahlunte in, “Bawipa, a konteng ah?” tiin zawt tlang i. Jesuh in, “Mithi luang umhnak hmunah langtarte khawm tlang tuh i,” tiin ti i.