Luka 15 - Zanniat Bible

A Paimi Tuu

¹ Vaikhat ah siahkhawltute le misual ti ai hnawl mite tampui in Jesuh thurelhnak ngai tuhin a hnenah kawi tlang i.

² Ciafangin Farasi le Danthiam mite tu phuncam tlang ai, “Hemi pa in hnawlmi misualte khai kom ai amahte hnenah rong khai ai i!” tiin ti tlang i.

³ Ciamanin Jesuh in a hnia lamai santehhnak rel i.

⁴ “Santehhnak ah ningmah lakah mi pakhat in tuu zakhat nai ai tuu pakhat pai bang selai ziang bawn ni tur? Tuu sawmkua le pakuate khiah hampalak ah hlum tuhai a paimi a hmu hlanlo si tuh dekdo i.

⁵ A tawk fangin a ang ze in a ko ah phur ai,

⁶ Inn ah tlunpui i. Cen a rualpui le a innhnente kokhawm ai ‘A paimi i tuu hmu leh ai i ang ze i. Ciamanin ang ngai in puai bawn tuh ising,’ tiin ti i.

⁷ Ciatih bangin sualsirhnak a kul lomi mipha sawmkua le pakuate tahin a sirtu misual pakhat ca vancung ah anghnak tam sawn i,” tiin ti i.

A Paimi Tangka

⁸ “Cia hlahle, nupang pakhat in tangka fang hra nai selai fangkhat paitiar lekhaw ziang bawn ni tur? Maikhuat var in a inn khiah phiak ai a hmu leh hlanlo a ningnawi tianin si sio i.

⁹ A tawk leh fangin a rualpuite le a innhnente ko ai, ‘I paitiarhnak tangka tawk leh zo ing; ciamanin i angpui tu ih,’ tiin ti tuh i.

¹⁰ Ciatih bangin sualsirhnak a naitu misual pakhat caah Pathian ai vancungmite ang tlang tuh roh i,” tiin ti i.

A Paimi Fapa

¹¹ Jesuh in hetihin rel i. “Vaikhat ah mi pakhat um ai fapate pahnih nai i.

¹² A nauta sawn in a pa hnenah, ‘I pa, i co tuhhnak rothil tunin i pe tu,’ tiin ngen i. Ciamanin a pa in a rothil hmuahhmuah heh khan ai a fapate pahnih zem i.

¹³ Ni a rai hlanah fapa nauta sawn in a cohnak thilri heh zuar sek ai a ngahhnak tangka thawn inn in suak i. Ram hlapui ah feh ai pamhmaihhnak zaikhai nai loin a tangka heh a nuamnuam in hmang sek i.

¹⁴ A naihnak hmuahhmuah heh hmangral sek i. Cen cia ram songah rian tlung ai zaikhai nai nawn lo i.

¹⁵ Ciamanin cia ramai mi pakhat hnenah a na per sah tuhin feh ai vok khal tuhin a lo ah fehruai i.

¹⁶ Vokfak bekawng khiah kham roh in ai selai duhngat ngai napui aisu inkhai ai tuh zaikhai pe fawn lo i.

¹⁷ A hnuataber ah a lungfim ai, “I pa ai hlawhfate tu ai cawk loin aih pha nai tlang i; ikhalselai kai tu heta ah aih tuh nai loin i thi cuahco ihang!

¹⁸ Tho tuhai i pa hnenah tlung tuh ing. I pa, Pathian vumah le na vumah i sual zo i.

¹⁹ Na fapa tuhin i tlak nawn lo i; na napertu na sal pakhat ah i bawn tu hram law, tiin ti tuh ing,’ tiin ruat i.

²⁰ Ciamanin a pa hnenah tlung tuhin feh i. “Lamhlapui in a tlung phetpho khiah inn in a pa in hlir ai hmu i. A ninghio ze manin dawp ai a fapa heh kuah ai thut i.

²¹ A fapa in, ‘I pa, Pathian vumah le na vumah i sual zo i. Na fa tiin ko tuh khai i tlak nawn lo i,’ tiin ti i.

²² Ikhalselai a pa in a hnenumte ko ai, ‘Rang ngai in kawi tu ih! Hnikpon pha ber koih tu ilai silh tu ih. A kut ah kutruk ruk tu ilai a ke ah kedawl dawl sah tu ih.

²³ Cen kawlpaw faniu a thau ber ro tu ilai anghnak puai bawn tuh ising!

²⁴ Zaimantifangin he i fapa heh thi zo napui nung leh i; pai zo napui hmu leh zo i,’ tiin ti i. Ciatihin anghnak puai bawn tlang i.

²⁵ “Cialak fangin fapa upa sawn heh lo ah feh i. Lo in tlung ai inn hiang a hleng fangin la sa thawm le lamhnak thawm za i.

²⁶ Ciamanin hnenum pakhat ko ai ‘Ziang bawn tlang dekdo i?” tiin zawt i.

²⁷ Ciami hnenum in, ‘Na naupa tlung leh zo i, cak le himniu in let manin na pa in kawlpaw faniu a thau ber roh i,’ tiin ti i.

²⁸ A fapa upa sawn heh a thinraw roh ai inn song ahkhai lut nuam lo i. Ciamanin a pa suak ai inn songah lut tuhin leem i.

²⁹ Ikhalselai a fapa in, ‘Ruat tucuk! Kum hezah liangluang sal bangin na naper per ai na thu vel khat bangkhai na el awng lo ing. Ziang i pe isi? I rualpuite thawn nunnuamhnak puai bawnhnak tuhin me lu khat bangkhai i pe awng lo isi!

³⁰ Ikhalselai he na fapa tu hlotlaute thawn nuamhnak ah na thilri hmuahhmuah momrul in hmang ai na hnenah a let fangin kawlpaw faniu a thau ber roh isi!’ tiin a pa heh ti i.

³¹ A pa in, ‘I fapa, nang tu i hnenah um ngio ai i naihnak thil hmuahhmuah heh nangmah ai i.

³² Ikhalselai na naupa tu thi ai tunin nung leh i; pai zo napui tunin hmu leh ing; ciamanin lungawi aipuang in puai bawt tlak hrimhrim i,’ ti i,” tiin Jesuh in rel i.