Luka 12 - Zanniat Bible

Phalaktla Pawl Ralring Tu Ih

¹ Miburpui a thawngthawng in tawk dun ai fon dun murhmo laiah Jesuh in a hnuahlunte hnenah a hmasa ah hetihin rel i: “Farasite ai col heh ralring tu ih; phalaktlahnak col khiah!

² Zaizai khai ituseh khukhnak hmuahhmuah heh hong tuh sio ai thuthup hmuahhmuah phuang tuh sio i.

³ Ciatihin khuathim lakah ning relhnak thuthup hmuahhmuah khiah sun khuavar lakah lingruai tuh sio ai inn dawngkham khum in a thupniu ai ning relhnak heh inn vum luanglu in aupui tuh i,” tiin ti i.

Aisu Lau Tuh Um I

⁴ Jesuh in, “I rualte, ning rel ing: taksa pum ian rek thai ai ciatah in a roh deuh a bawn thil lotu heh kih mah ih.

⁵ Aisu kih tuh sawn ti ning rel tuh ing: a rek lek ilo in hell songah hlakthaihnak khai thu a naitu Pathian ian kih tu ih. Fiang ngai in ning rel ing: Ani tu ning kih tuh mi i!

⁶ Kawlva panga khiah pia hnih in zuar ilo im? Ikhalselai pakhat khai Pathian in hai lo i.

⁷ Ning lu vumai samfang rin siar sio i. Ciamanin ning thinlau mah ih; kawlva tam roh tahin ning songlawi sawn i.

Khrih Phuanghnak Le Hnawlhnak

⁸ “Hetihin ning rel ing: Aisu khai ituseh kaimah ai mi ihnak mi hmaiah a phuang ngamtu heh Mi Fapa in Pathian ai vancungmite hmaiah ciatih bangin phuang tuh ve i.

⁹ Ikhalselai mi hmaiah i hnawltu heh Mi Fapa in Pathian ai vancungmite hmaiah hnawl tuh ve i.

¹⁰ Aisu khai ituseh Mi Fapa a relsiattu heh ngaithiam tuh i; ikhalselai Rauhla Thianghlim a relsiattu cenin ngaithiam tuh lo i.

¹¹ “Synagogue ah ituseh, ram uktu ihlahle hotu bawi hmaiah ituseh ning fehpui fangin akontih in sawn tuhai akontih in pong tuh ing tiin thincawl mah ih.

¹² Zaimantifangin cia can ah ning pong tuh heh Rauhla Thianghlim in ning rel tuh i,” tiin ti i.

Milian Voi Pa Santehhnak

¹³ Mizapui lakah mi pakhat in, “Sayapa, i pa ai i hluphnak rothil i zem tuh ve in i upa i rel sah tu,” tiin Jesuh khiah ti i.

¹⁴ Ciafangin Jesuh in, “I rual, ning karlak ai thukhantu cang tuhin le ning rothil zemsahtu tuhin aisu in thu i pe i?” tiin sawn i.

¹⁵ Cen mizapui hnenah, “Duhhamhnak a phunphun heh ralring tu ilai fimkhur bik in um tu ih; zaimantifangin mi pakhat ai nunhnak taktak heh, zaitluk milian ita inkhai, a thilri naihnak ah um lo i,” tiin ti i.

¹⁶ Cia hnuaah Jesuh in he santehhnak heh rel i: “Vaikhat ah milian pakhat um ai a ram songin rong tampui suak i.

¹⁷ Ciafangin a thinlung niu in ‘I lo song suak rong dahhnak nai nawn lo ing. Ziang bawn inglai pha tuh ini?

¹⁸ Hetihin bawn tuh ing: I rong dahhnak innte bal tuhai kau deuh in sa tuh ing. Ciata ah i rong le i thilri hmuahhmuah dah tuh ing.

¹⁹ Cen kaimah veve, Mi bawngpha pa! Kum tampui song na kul tuhhnak thilri nai zo isi. Na nuamnuam in nung tu huahho, ai tu, ding tulai nuam roh in nung tu, ti dun tuh ing,’ tiin ruat i.

²⁰ Ikhalselai Pathian in a hnenah, ‘Mivoi pa! Tun zan rori ah na nunhnak bo tuh i; cen nangmah ca ai na pamciahnak na thilri hmuahhmuah heh aisu in co ni tur?’ ti i,” tiin rel i.

²¹ Cen Jesuh in, “Amahte ca thilri pam ai lian tlang roh napui Pathian mithmuh ah a lian lotu heh hemi pa bang pawl i,” tiin a tawphnak ah rel i.

Pathian Rinsan Tu Ih

²² Cia hnuaah Jesuh in a hnuahlunte hnenah, “Ciatih imanin ning aih tuh ca ituseh, ning silhfen tuh hnikpon caah ituseh, thincawl in um mah ih, tiin ning rel ing.

²³ Zaimantifangin nunhnak tu rong tahin thupui sawn ai taksapum tu hnikpon tahin thupui sawn i.

²⁴ Langak khiah sik tucuk ih; anite in hlaici cing lo ai rong khai khawm fawn lo i. Rong inn le ben khai nai lo i. Ikhalselai Pathian in cawm i. Ning khai ciami vaniu tahin a let tampui in ning songlawi i.

²⁵ Ningmah lakah aisu inkhai aihdin le silhfen thu a thincawlhnak in a nunhnak tlawmniu a sauruai bentu um aw i sim?

²⁶ Ciatluk thil cikniu rin bawn thil hlahle i sikhaw zaimanin thil dangdang thu ah thincawl hnelhno i si?

²⁷ Hampalak paparte khiah akontih in khang i, ti sik tu ih: naper lo i, silhfen tak tlang fawn lo i. Ikhalselai thungai in ning rel ing: Kumpibawi Solomon ai lianhnak le songlawihnak hmuahhmuah inrin he papar ai mawihnak heh tluk lo i.

²⁸ Tunnia ah um napui thangha ah um nawn lomi, mai songah paihhnak hampalak hampa rin a thuamtu heh Pathian i. Ningte tu ning thuam tuh amam lo im? Ning sanghnak a tlawm ze lawmlam i!

²⁹ “Aih le din tuhhnak ian ruat le thincawl ngio in nung mah ih.

³⁰ Zaimantifangin laivum lawki mite in ciabang thil heh ruat tlang ngiode i. Ning Pa in hebang thil ning kul i, ti ling i.

³¹ Ciamanin ning Pa ai Ukhnak khiah thintak in si tu sawn ilai thil dangte tu ning pe leh tuh i,” tiin ti i.

Vancung Ai Lianhnak

³² Tuurun niuniu tepawl, ning thinlau mah ih; zaimantifangin ning hnenah Ukhnak a pe heh ning Pathian ai lungawi zawng i.

³³ Ning naihnak thilrite zuar tusek ilai ning ngahhnak paisa heh mifarahte sum tu ih. A hnawm thil lo tangka bawm ning caah ngaisung tu ilai vancung ah ning sumsawte khawl tu ih. Ciata ah rukote in dai thil tuh lo ai kharkai thil fawn lo manin zaikom inkhai pairal tuh awng lo i.

³⁴ Zaimantifangin ning sumsaw umhnak ah ning thinlung khai um tuh ve i,” tiin ti i.

Ralringhnak A Naitu Hnenum

³⁵ Zaibang thil hleng khalselai ralring cia in um tu ilai ning maikhuat var in pai cia in um tu ih.

³⁶ Mopuai in a let tuh a bawipa a iangtu hnenumte bangin ralring ngai in um tu ih. A bawipa tu hleng ai dawngkham a ceuh fangin dawng kham khiah hon tuh vut i.

³⁷ A bawipa a let fangin mitmu loin ralring ngai in a umtu hnenumte tu zaitlukin angkul i. Thutak ning rel ing: a ralring hnuaah toruai tuhai amah rori in tuamhlawm tuh i.

³⁸ Zan seulai ah a hleng inkhai ituseh, ciahnak tahin hnuaah a hleng inkhai ituseh, ralringhnak nai in a hmu mite tu amahte caah zaitlukin angkul i!

³⁹ Cen hemi heh hih tu ngio ih: inn naitu pa in ruko hleng tuh can ling cia lekhaw a inn khiah bal sah tuh hrimhrim lo i.

⁴⁰ Ciatih bangin ning khai ralring in um tu ih, zaimantifangin hleng tuh i, tiin ning sang lo laiah Mi Fapa hleng tuh i,” ti i.

Rintlak Le Rintlak Lo Hnenum

⁴¹ Peter in, “Bawipa, he santehhnak tu kinmah caah na ti nuamhnak maw, ihlahle mizapui caah i?” tiin zawt i.

⁴² Bawipa in, “Aisu heh rinsantlak le a fimmi hnenum i? Rinsantlak le a fimmi hnenum tu a bawipa in a innpui kilkhawltu tuhin le a dang hnenumte heh a tikcucan niu in amahte covo rong pe tuhin a dah tuhhnak hnenum khiah i.

⁴³ A bawipa inn ah a tlung fangin naper a pertu hnenum tu zaitluk angkul i!

⁴⁴ Thutak ning rel ing: cia hnenum tu a bawipa in a thilri hmuahhmuah kilkhawltu ah dah tuh i.

⁴⁵ Ikhalselai cia hnenum pa in, ‘I bawipa tu rai tuhlai i,’ ti ai hnenum dang nupang ituseh pasal ituseh vit betbo in ai le ding ai ri in bah lekhaw,

⁴⁶ cia hnenum in hleng tuh i, tiin a sang lo can le a ling lo nia ah a bawipa hleng tuh i. A bawipa in a cip in sat tuhai thungai lo le rintlak lo mite lakah dah tuh i.

⁴⁷ A bawipa in bawnruai a nuamhnak ling napui a ralring lotu hnenum heh a roh ngai in vit tuar tuh i.

⁴⁸ Ikhalselai a bawipa in bawnruai a nuamhnak ling lo napui thil pakhatkhat a bawntu heh vit a tlak inkhai thuniu deuh in vit tuh i. Tampui a ngahtu hnenin tampui ngen leh tuh i. Tam roh pe mite hnenin tam roh ngen thun tuh ve i,” ti i.

Jesuh Tu Mi Kakhlaitu I

⁴⁹ Jesuh in, “Lailung vumah heh mai kangruai tuhin kawi ing; tunin ko hang selai i daih ihang!

⁵⁰ Baptisma lang tuh nai lai ai ciami bawn ben hlan tu i thin i cawl ze i.

⁵¹ laivum ah remhnak koih ing tiin i ruat i sim? I lo i, remhnak ilo in khekhnak sawn koih ing.

⁵² Tunai panin innsang pakhat ai mi panga a umtute tu khek dun tuh i; pathumte in a dang pahnihte ralcai tuhai pahnihte in pathumte ralcai tuh ve i.

⁵³ Pate in fapate ralcai tuhai fapate in pate ralcai tuh ve i. Nute in a fanute ralcai tuhai fanute in nute ralcai tuh ve i. Nite in a mote ralcai tuhai mote in nite ralcai tuh ve i,” ti i.

Can Lingthiamhnak

⁵⁴ Jesuh in mizapui hnenah, “Nitlak lamin khuanim a suak fangin cammalak in ‘Ruah si tuh i,’ ning tihnak bangin ruah si ngaingai i.

⁵⁵ Cen hlang lamin hli zuang ning ling fangin ‘Khuasa tuh i,’ ning tihnak bangin sa ngaingai i.

⁵⁶ Ning, phalaktla thiam pawl! Van le laipua sik in nikhua pha tuh le hnawm tuh rel thil i si! Ciatih ilekhaw zaimanin tun san ai thu umdan ling thil lo i si?” tiin ti i.

Ning Ral Thawn Rem Tu Ih

⁵⁷ Akontih in thil dik bawn tuhin ning thinlung khancat thil lo i si?

⁵⁸ Mi pakhat in zung ah ning hlenpui tum lekhaw zung na hlenpui ngah hlanah amah thawn remhnak bawn tuhin zuam tu. Ciatihin bawn hlahle sikhaw thukhantu hmai tian na duk tuhai thukhantu palik kut ah na pe tuhai ciatihin thawng ah na toh tuh i.

⁵⁹ Fiang ngai in ning rel ing: na kuan tuhhnak hnuataber pia khat tian na kuan sek hlanlo ciata in suak tuh hrimhrim lo i si,” tiin ti i.