Luka 11 - Zanniat Bible

Jesuh In Zirhhnak Sawngen

¹ Ni khat ah Jesuh tu hmun pakhat ah sawngen i. A ben fangin a hnuahlunte lakai pakhat in, “Bawipa, John in a hnuahlunte sawngen a zirh bangin sawngen kin zirh tu ve,” tiin ti i.

² Jesuh in anite hnenah, “Saw ning ngen fangin hetihin ngen tuh i si: “Kin Pa, Na hming thianghlim upat in um tuseh, Na ukhnak hleng tu hram seh.

³ Ni siar kin kulhnak rong kin pe tu law.

⁴ Kin vumah sualhnak a bawntute kin ngaithiam bangin, Kin sualhnak kin ngaithiam tu ve law. A harmi sualsawmhnak ah kin hlengruai malaw,’ tiin ngen tuh i si,” tiin ti i.

⁵ Cen Jesuh in a hnuahlunte hnenah, “Santehhnak ah ningmah lakah mi pakhat in na rualpui inn ah zan seulai ah feh in ‘I rual, sang hlom thum in i put tu hram.

⁶ I rualpui pakhat a khual tlawnghnak in i inn ah hleng ai rong pe tuh zaikhai nai lo ing,’ tiin ti i si.

⁷ Cen santehhnak ah a inn songai na rualpui in ‘Hnai i hnok mah, dawngkham kham zo ing ai i fate thawn it zo i ing; thil pe tuhin i zuam nawn lo i,’ tiin ti bang selai,

⁸ akontih in bawn tur i si? Thutak ning rel ing: a rualpui na imanin tho in na ngenhnak sang heh na pe vut lo khalselai zakthi loin ngen bel lesikhaw tho tuhai na kulhnak tu na pe tuh hlen i.

⁹ “Ciamanin hetihin ning rel ing: ngen tu ih, ngah tuh i si; si tu ih hmu tuh i si; ceuh tu ih, ning caah dawngkham ning hon tuh i.

¹⁰ Zaimantifangin a ngentu in ngah tuh i, a situ in tawk tuhai a ceuhtu caah dawngkham hon tuh i.

¹¹ Ning, pate lakah na fapa in nga sa ning ngen selai rul a petu um ni i sim?

¹² Ihlahle arti ning ngen fangin kaikuam a petu um tur i sim?

¹³ Mi pha lo inapui i sikhaw ning fate hnenah thil pha pe thiam le i sikhaw vancung ning Pa in zaitlukin a ngentu hnenah Rauhla Thianghlim heh ning pe tuh amam i!” tiin ti i.

Jesuh Le Beelzabul

¹⁴ Jesuh in pong thil lo pa hnenin ramhuai pakhat hnawtsuak i; ciatihin a hnawtsuak hnuaah a molhmi pa tu pong thil i. Cen mizapui tu aican tlang ngai i.

¹⁵ Ikhalselai mi hrekkhat in, “Hetih ai ramhuaite a hnawtthilhnak tu ramhuai uktu bawi Beelzabul in huham a pe manin i,” tiin ti tlang i.

¹⁶ Midangte in Jesuh sualhnak si nuam ve i; ciamanin, “Pathian ai lungkhimhnak na i le ilo linghnak ah ngaihsunurkul bawn tu,” tiin ruai i.

¹⁷ Ikhalselai Jesuh in amahte ruathnak khiah ling ai anite hnenah, “Ram pakhatkhat khan tampui in khan tlang ai khankhat le khankhat a tawngduntu ram heh a rai awk tuh lo i; a rem dun lo innsang tu piak tuh sek i.

¹⁸ Ciabang thotho in Satan ukhnak songah khai bu tampui um ai bukhat le bukhat tawng dun lekhaw akontih in Satan ukhnak tu a rai kho thil tuh i? ‘Beelzabul in huham pe manin ramhuai hnawt ben i,’ tiin iti i si.

¹⁹ ciatih bang in Beelzabul manin ramhuai hnawt thil ing ti bang selai, ningmah ning hluntute in tang akontih in ramhuai hnawt thil ini tur? Ning hluntute lala heh ningmah vumah thukhantute i tuh i.

²⁰ Ikhalselai kai incen Pathian hathnak huham thawn ramhuai i hnawt thil sawnhnak i; ciatih imanin Pathian Ukhnak tu ning hnenah hleng zo i, ti lar i.

²¹ “Mi hat ngai pakhat in a ralthuam naihnak hmuahhmuah thawn a inn kilkhawl lekhaw a thilrite heh him i.

²² Ikhalselai a hat deuh sawn pa in ciami pa heh tawng ai neh lekhaw a rinsanhnak ralthuamte khiah sut sek ai a suthnak thilrite tu mi zem sek i.

²³ “Kaimah i ṭan lotu hmuahhmuah i tawngcaitu i; a khawm i bawm lotu hmuahhmuah a piakruaitute sawn i.

Rauhla Siava Let Leh I

²⁴ “Rauhla pakhat tu mi pakhat songin a suak fangin cawlum hmun si in ramcar le ramkhing ah vak zianzo i. Cawlum hmun a tawk lo fangin ‘I hlum cia i inn ah let tuh ing,’ tiin amah niu in ruat i.

²⁵ Ciatihin a let ngaingai fangin a inn tu ciang liang le umhnak tuhin a daih hiamkul ngai in hmu i.

²⁶ Cia hnuaah feh ai amah tahin a siava deuh ramhuaite pasarih sawm ai ciata ah um tlang i. Cen a tawphnak fangin ciami pa tu a hlan tahin roh amam i,” tiin ti i

Hmuifu Taktak

²⁷ Jesuh in thu a rel ben fangin mizapui lakai nupang nu pakhat in Jesuh tu, “Na cawi tu le na tuamhlawmtu nupang heh mihmuifu i!” tiin ti i.

²⁸ Jesuh in, “Pathian tu ling ai a hlun taktak mite heh mihmuifu sawn i,” tiin ti i.

Ngaihsunurkul Bawn Tuhin Ngen I

²⁹ Mi tampui Jesuh hnenah kawi ai ben murhmo lakah Jesuh in, “Tun lai minungte tu zaitlukin pha lo i! Ngaihsunurkul bawn sah tuh ngen tlang i, ikhalselai Jonah ngaihsunurkul siar lo ngaihsunurkul dang zaikhai bawn sah tuh lo i.

³⁰ Prophet Jonah tu Nineveh minungte caah ngaihsunurkul a cang awng bangin Mi Fapa heh tun san minungte caah ngaihsunurkul i tuh ve i.

³¹ Thukhan Nia ah kumpibawinu Sheba tho tuhai tun san minungte heh mawhhluk tuh i, zaimantifangin kumpibawi Solomon fimhnak thuzirh ngai tuhin lamhlapui in hleng i; ikhalselai thungai in ning rel ing: Solomon tahin lian sawn heta ah um i.

³² Thukhan Nia ah Nineveh khuasong mite tho tlang tuhai mawh ning hluk tuh i, zaimantifangin Jonah in amahte hnenah thu a rel laiah sual sir tlang i; thungai in ning rel ing: Jonah tahin lian sawn heta ah um i.

Taksapum Tleuhnak

³³ “Aisu inkhai maikhuat var ta ve ai thup awng lo i, ihlahle kho in khum awng kel lo i; maikhuat varhnak tung vumah dah ai ciatihin a luttute in phatak niu in khuahmu thil i.

³⁴ Ning mitte tu ning pum caah maikhuat bang i. Mit ning fim lekhaw ning pumpuhluk in tleu tuh i, ikhalselai mit ning pha hlah lekhaw ning pumpuhluk in thim tuh i.

³⁵ Ciatih imanin ning songai tleuhnak heh thimhnak cang leh tuh loin ralring tu ih.

³⁶ Ning taksa pumpuhluk heh tlawmniu bangkhai thimhnak songah um loin tleu sio lekhaw maikhuat in ning taksa a det bangin tleu tuh ngai i,” tiin ti i.

Farasi Le Danthiam Pawl Mawhhluk I

³⁷ Thu a rel ben fangin Jesuh tu Farasi mi pakhat in rong ai tuhin sawm i; ciamanin Jesuh tu feh ai rong ai tuhin to i.

³⁸ Jesuh tu rong a ai hlanah a kut som lo khiah Farasi pa in a hmu fangin a multing i.

³⁹ Ciafangin Bawipa in a hnenah, “Ningmah, Farasite in tu ning khuat le pakante a pualam ian somciang de i si, ikhalselai ning songlam tu pamhaphnak le phatlohnak in dimruai i si.

⁴⁰ Mivoite! a pualam bawntu pa in a songlam khai bawn ilo im?

⁴¹ Ciamanin ning khuat le ning pakante songai a umhnak khiah mifarahte pe tu ilai zaizongza ning caah cianghlim tuh i.

⁴² Farasite, ning hmai lam a pit ze i! Thinghnah thingthai songin patina le remhmui le aithing le a dangdang khai seuhra seukhat pe napui i sikhaw dikcanghnak le Pathian it tuh tu ngulsul tlang i si. A dang khai ngulsul cuang loin hemite tu ning bawn tuhhnak i.

⁴³ Farasite, ning hmai lam a pit ze i! Synagogue ah tohkham khawisahhnak vumah to heh ning hiam bikraw ai sumdawrhnak tluan ai upat pehnak khai sunsak roh i si.

⁴⁴ Ning hmai lam a pit ze i! Ning tu hnikhnaihhnak a nai lomi hlan, mi in ling thiam lo manin a fonhnak hlan bang i si,” tiin ti i.

⁴⁵ Ciafangin Danthiam pakhat in, “Sayapa, hetihin na pong fangin kin khai zoh kin suam ve isi!” tiin ti i.

⁴⁶ Jesuh in, “Danthiam mite, ning ca ahkhai ning hmai lam a pit ze i! Amahte phur ben tuh lo thilrit khiah mi ai zangkhun vumah phurh ai ningmah incen phur bawm tuhin ning kutzung hmur niu rin suah ning zuam lo i.

⁴⁷ Ning hmai lam a pit ze i! Ning pupate ai rek awng mi prophette caah hlan phapha bawn tlang i si.

⁴⁸ Ciatihin ning pupate in thil bawnhnak tu lungkhimpui i si ti larruai tlang i si; anite in prophette rek tlang ai ning in a hlan bawn i si.

⁴⁹ Ciamanin Pathian ai fimhnak in ‘Amahte hnenah prophet le nalangte hlat tuh ing; hrekkhat rek tuhai hrekkhat cawh tuh i,’ ti i.

⁵⁰ Ciatih imanin tun san mite heh laivum a hampan in prophette rek manin cawh tuh i.

⁵¹ Fiang ngai in ning rel ing: Abel rek a tuar ai panin puleng le Hmun Thianghlim karlak ai amahte rekmi Zechariah tian, thisan a suah manin tun san mite in cawh tuar tlang tuh i.

⁵² Ning Danthiam mite, ning hmai lam a pit ze i! Fimhnak inn luthnak dawngkham tawhfung tu awh tlang i si; cen ningmah tu lut nuam tlang lo ai a lut nuamtute kham fawn i si,” tiin Jesuh in ti i.

⁵³ Ciata in Jesuh a feh fangin Danthiam mite le Farasite in a roh ngai in sualsi ai thil tampui thu ah thu tampui zawt tlang i;

⁵⁴ Pakhatkhat pong sualhnak nai lekhaw amah ai pong lala in awk dun tuhin anite in thu tampui zawt dekdo i.