Luka 1 - Zanniat Bible

¹ I Rual Theofilas, Mi tampui in kin lakai a canghnak thute heh a pha thil tawp in ngan tlang i.

² Anite ngan fangin cia thil canghnak a hampan in mit in a hmutute le ciami thu a reltu ai relhnak bangin nganhnak i.

³ Ciatih imanin kai inkhai he thulate heh a hampan in fel ngai in zingzoi zo sio manin a sangsang in nangmah caah ngan lengkhaw pha tuh i tiin ruat ing.

⁴ Amahte relhnak le zirhciahnak thu heh a semkhim in le dik ngai ai na linghnak tuhin he lai heh ngan ing.

Baptisma Petu John Tehnak

⁵ Herod tu Judea ramai kumpibawi a cang laiah, Abijah suangbawi phun songai a teltu ve suangbawi Zechariah um awng i. A nupui tu Elizabeth i ai ani khai suangbawi phun ve i.

⁶ Anite pahnih in Pathian mithmuh ah nuncan pha in nung kawm ai Bawipa ai dan le thupehnakte khai a khimliang in hlun kawm i.

⁷ Elizabeth tu facing imanin fate nai lo i, a nupa in tar kawm ngai ihang.

⁸ Vaikhat ah Zechariah tu nisiar a naperhnak can khim ai Biakinn songah suangbawi naper in um i.

⁹ Suangbawite in amahte hlunhnak de dan bangin puleng vumah rimhmui tai tuhin camciafung duk in Zechariah heh ril tlang i. Ciamanin Bawipa ai Biakinn songah lut i.

¹⁰ Cialai ahcen rimhmui tai can i ai mizapui tu Biakinn pualam ah sawngen tlang dekdo i.

¹¹ Vancungmi pakhat tu a hnenah lar ai rimhmui taihnak puleng kiahhan lam nakah ding i.

¹² Zechariah in a hmu fangin thingsut ai a thinlau i.

¹³ Ikhalselai vancungmi in, “Zechariah, lau mah! Pathian in na sawngenhnak heh za zo ai na nupui Elizabeth in fapa na cawi tuh i. A hming ah John bawn tuh isi.

¹⁴ Ciami na fapa a te fangin na ang tuh ngai ai midang tampui khai ang tlang tuh ngai i.

¹⁵ Ani tu Bawipa mithmuh ah mi thawmlian tuh i. Cabitti ituseh, zu ituseh ding tuh lo i. A te sawng fangin Rauhla Thianghlim thawn dim tuhai,

¹⁶ Israel mite tampui khai Bawipa amahte Pathian hnenah letruai leh tuh i.

¹⁷ Bawipa ai hmaiah a fehciatu palai cang tuhai prophet Elijah bangin a hatmi le hmual naimi cang tuh i. Pate ai thinlung khai amahte fate lamah merruai leh tuhai thu ngai lotute khai midikcangte ai thuruahdan lampui ah hoi leh tuh i. Bawipa caah Bawipa ai minungte ralring sah tuh i,” tiin ti i.

¹⁸ Zechariah in vancungmi hnenah, “Na relhnak bangin cang tuh ngaingai i, tiin akontih in ling thil tuh ing? Kai tu patar zo ai i nupui khai a tar ze zo i,” tiin ti i.

¹⁹ Ciafangin vancungmi in, “Kai tu Gabriel ing. Pathian hmaiah a dingtu ngio ing ai amah in he thula na hnenah rel tuhin i hlat i.

²⁰ Ikhalselai i thurelhnak na sang lo inkhai a can a khim fangin i thurelhnak khim tuh i. Hetihin na sang lo manin pong thil loin um tuh isi. Na hnenai i thukham a khimhnak nia a hleng hlanlo kam khatniu khai pong thil tuh lo isi,” tiin ti i.

²¹ Cia can song hmuahhmuah mizapui in Zechariah heh iang tlang ngio ai zaimanin Biakinn songah ciatluk lawmlam rai heh ini tiin khuaruahhar tlang i.

²² Biakinn songin a suak fangin a pong thil lo hmu tlang ai Biakinn songah larhnak hmu i tuh i, ti ling tlang i. Kam khatniu khai pong thil lo manin a kut in hmuh i.

²³ Biakinn songai a naṭuan can a bo fangin Zechariah tu inn ah tlung i.

²⁴ Tawkfang a rai hnuaah a nupui Elizabeth in naupai ai hla nga song pualam ah suak lo i.

²⁵ Elizabeth in, “Hnuataber ah Bawipa in i bawm ai misenpui hmaiah i zakthihnak i lang sah zo i,” tiin ti i.

Jesuh Tehnak Tuh Thuthan

²⁶ Elizabeth ai naupai a hlarukhnak ah Pathian in vancungmi Gabriel heh Galilee ram Nazareth tihnak khua ah hlat i.

²⁷ Kumpibawi David ai tesinfa songin Joseph thawn hoi dun tuhin thawlthan thukhamhnak a naitu fenu hnenah thu pakhat rel tuhin hlat i. Ciami fenu nu hming tu Mary i.

²⁸ Vancungmi a hnenah kawi ai, “Na hnenah daphnak um tuseh! Bawipa na hnenah um ai hmuifu tampui na pe i,” tiin ti i.

²⁹ Cia vancungmi ai thurelhnak a za fangin Mary tu a donhar ze in a ponghnak ai a sullam tu ziang heh ini tiin khuaruahhar in um i.

³⁰ Cen vancungmi in, “Mary, lau mah! Pathian mithmai pha co isi.

³¹ Naupai tuhai fapa in nai tuh isi. A hming ah Jesuh bawn tuh isi.

³² Mi songlawi i tuhai, Cungnungber Pathian ai Fapa tiin ko tuh i. Ani tu Pathian in a pu David bangin kumpibawi ah bawn tuhai,

³³ Jacob tesinfate ai vumah a kumzangza in kumpibawi cang tuh i, a penghnak bo tuh lo i,” tiin rel i.

³⁴ Mary in vancungmi hnenah, “Kai tu fenu him ing. Ciabang heh akontih in cang thil tuh i?” tiin ti i.

³⁵ Vancungmi in, “Rauhla Thianghlim na hnenah hleng tuhai Cungnungber ai hathnak huham na vumah um tuh i. Ciamanin na te tuhhnak fa tu fapa thianghlim i tuhai Pathian fapa tiin ko tuh i.

³⁶ Na songkhat Elizabeth khiah ling ilo sim? Fa nai thil nawn lo i tiin relhnak de inapui a tar ngai hnuaah naupai ai tun tu hlaruk khim zo ihang.

³⁷ Zaimantifangin Pathian in bawn thil lomi zaikhai um lo i,” tiin ti i.

³⁸ Mary in, “Kai tu Bawipa ai sal nu ing. Na relhnak bangin i vumah cang tuseh,” tiin ti i. Cen vancungmi tu feh leh i.

Mary In Elizabeth Leng I

³⁹ Cen Mary tu a thil pai ai Judea peng tlang vum khua ah rang ngai in feh i.

⁴⁰ Ciata a hleng fangin Zechariah inn ah lut ai Elizabeth in hnuksat i.

⁴¹ Mary ai ponkam tu Elizabeth in a za sawng fangin a pum songai nauniu heh mer i. Elizabeth tu Rauhla Thianghlim in dim ai,

⁴² cawm roh in, “Nang tu nupang hmuahhmuah lakah hmuifu ber nupang isi. Na te tuhhnak fa khai hmuifumi fa i!

⁴³ Zaimanin i Bawipa ai nu in kai bang rongra khai i leng nuam ini?

⁴⁴ Zaimantifangin na pong sawng fangin i pum songai nauniu heh lungawi aipuang in dawk i.

⁴⁵ Bawipa in na hnenai a relhnak thu heh na vumah khim tuh rori i ti ruat ai na lungawi tuh zia heh a mak roh i! tiin ti i.

⁴⁶ Mary in, “I thinlung in Bawipa thangphat i.

⁴⁷ Pathian i otu vumah i nunhnak in a ang ze i;

⁴⁸ Zaimantifangin mi nauta a sal nu heh Hai loin i ling ngio i. Tunai panin mi zongzong in mihmuifu iti tuh i.

⁴⁹ Cungnungber Pathian in kaimah caah thil songlawi bik a bawn zo manin, Amah hming tu thianghlim i,

⁵⁰ Sankhat hnua sankhat amah a kihzahtute tu ninghio i.

⁵¹ A ban thahat hoi ai mi puarthau mite tu amahte tumtekhnak thawn piakruai sio i.

⁵² Kumpibawi hat ngai pawl khai, amahte Bawi tohkham in hla ai, mi nauta pawl heh khaisang i.

⁵³ Rikam mite tu thil pha in cawm ai, Miliante tu kut lolek in letruai i.

⁵⁴ Kin pupate hnenah a thukhamhnak khimruai ai, a cengfa Israel bawm tuhin kawi zo i.

⁵⁵ Abraham le a tesinfate vumah a kumzangza in ninghio tuhin hih ngio i!” tiin ti i.

⁵⁶ Mary tu Elizabeth hnenah hla thum tha a um hnuaah a inn ah tlung i.

Baptisma Petu John Tehnak

⁵⁷ Elizabeth tu a nihla khim ai fapa in nai i.

⁵⁸ Elizabeth vumah a thawmlian Bawipa ai ninghiohnak heh a songkhat le innhnente hmuahhmuah in ling tlang ai amahte veksen in angpui tlang i.

⁵⁹ Nauniu tu a te hnua ni sarih ah a zarhtan tuhin kawi tlang ai a pa hming suang in Zechariah tiin a hming bawn tum tlang i.

⁶⁰ Ikhalselai a nu in, “I lo i, a hming tu John i tuh i,” tiin ti i.

⁶¹ Anite in, “Ning songkhat ah ciabang hming aisu khai um bang hlah e!” tiin ti tlang i.

⁶² Cen a pa tu kutzung hmuh in pon ai a fapa hming bawn a nuamhnak khiah zawt tlang i.

⁶³ Zechariah in lai nganhnak laihnah ngen ai, “A hming tu John i,” tiin ngan i. Anite veksen in lau tlang ai mangbang tlang ngai i.

⁶⁴ Cia ben sawng fangin Zechariah ai kahmur le lai heh nung leh ai pong thil leh manin Pathian thangphat i.

⁶⁵ A ompuite tu thinlau tlang ngai i; cia thu tu Judea tlang vum ram hmuahhmuah ah thang sio i.

⁶⁶ Cia thu a zatu hmuahhmuah in amahte thinlung ṭen in ngaisung tlang ai, “Hemi nauniu tu zaibang minung cang leh ni ngai maw!” tiin ti tlang ṭen i. Zaimantifangin Bawipa ai huham tu nauniu vumah um i, ti fiang ngai in ling tlang i.

Zechariah Thurelhnak

⁶⁷ John ai pa Zechariah tu Rauhla Thianghlim in dim ai hetihin Pathian thu rel i:

⁶⁸ “Israel ai Pathian Bawipa tu thangphat ngasing; A minungte bawm tuhin le, luatruai tuhin hleng zo i.

⁶⁹ Kin caah a thawmlian otu suakruai zo i. Ani tu Bawipa ai cengfa David ai tesinfa i.

⁷⁰ Khuahlan a thianghlim prophette songin thu kin kham ciazo i;

⁷¹ Kin huatute kut songin le Kin ralte kut songin huphim tuhin.

⁷² Kin pupate hnenah ‘Ninghio thinpemhnak nai tuhai, A thukhamhnak thianghlim heh hai tuh lo ing,’ tiin ti i.

^73-74 Kin pu Abraham hnenah, ‘Ning ralte kut songin ning o tuh ing; kihhnak zaikhai um loin kaimah i ruaih tuh isi.

⁷⁵ Kin nunsong hmuahhmuah i hmaiah midikcang le mi thianghlim ning cang tuh i,’ tiin cukcam in thukhamhnak bawn i.

⁷⁶ “I fapa, nang tu a sang ber Pathian ai prophet tiin na ko tuh i, Nang tu Bawipa ai lampui seltu tuhin a hmaiah feh tuh isi;

⁷⁷ A minungte tu amahte sualngaithiamhnak in ohnak ngah tuh i, tiin a reltu tuhin.

⁷⁸ Kin Pathian tu mi ninghiotu le mi nunnem a imanin, ohnak zing khuatleu heh Kin vumah tlangruai tuh i;

⁷⁹ Thimhnak le thihhnak nihlim hniaah a umtute caah Vancung in tlang tuhai, remhnak lampui in fehruai tuh i,” tiin ti i.

⁸⁰ Nauniu tu taksa in ituseh rauhla in ituseh khang ai thahat amam i. Israel mite hnenah zapui mithmuh in a lar hlanlo ciami ramkhing ah um i.