Kolose 1 - Zanniat Bible

¹ Colose khua ai umtu Pathian ai minung, Khrih thawn ning pawlkomhnak manin rinsantlak Khristian unaute ning hnenah,

² Pathian lungkhimhnak in Khrih Jesuh ai nalang kaimah Paul le Khrih songah kin unau Timothy in lai ning kuat i ing. Pathian kin Pa in hmuifu le daphnak ning pe tu hram seh.

Anghnak Sawngen

³ Ning caah saw i ngen cang fangin kin Bawipa Jesuh Khrih ai Pa le kin Pathian hnenah anghnak thu rel ṭiode ing.

⁴ Zaimantifangin, Khrih Jesuh kin sanghnak le Pathian ai minungte hmuahhmuah hnenah ithnak ning nai khiah ning za manin ing.

⁵ A dikmi Thuthangpha ning hnenah a hleng sawng fangin zaibangtluk in umlamhnak ning pe i ti khiah ningmah in ling i si. Ciamanin sanghnak le ithnak tu vancung ah ning caah himniu in ning dahsahhnak umlamhnak vumah a ham bir i.

⁶ Pathian ninghiohnak ning za hmasaber nia ai panin tun tian a i bangin, Thuthangpha in hmuifu ning hnenah hlenpui ai laivum khuahacang ah karhzairuai i.

⁷ Pathian ai ninghiohnak tu Epafras hnenin ning zahnak i. Ani tu kin ithnak naperpui, kin caah rinsantlak ngai in Khrih napertu khai i.

⁸ Amah in Rauhla ai ning pehnak ithnak ning nai zia khai i rel i.

⁹ Hetih bangin ning thula i za sawng fangin ning caah sawngen ṭiode ing. Pathian in amah ai daihhnak lingthilhnak le Rauhla ai pehnak fimhnak le lingthiamhnak in ning dimruai tuhin Pathian hnenah ngen ing.

¹⁰ Ciatihin Bawipa ai daihhnak bangin nung thil tlang tuhai amah thinkhing dan khiah bawn thil tuh ṭio i si. Cen ning nunhnak in thai pha a phunphun thai tuhai Pathian ning linghnak ah ning khangso tuh zianzo i.

¹¹ Zaizongza heh thinsauhnak thawn tuar ben thil tuhin Pathian songlawihnak in suakhnak a thazang in ning hatruai tu hram seh.

¹² Tleuhnak ram songah Pathian in a mi thianghlim pawl ca ai a dahhnak khiah a cotu tuh ve in ning semsuahtu Pathian heh lungawi in thangphat tu ih.

¹³ Amah in kin uktu thimhnak huham songin kin o ai a Fahniang ukhnak songah kin lutpui zo i;

¹⁴ a fapa thawmin sualngaithiamhnak ngah ai miluat i zo ising.

Minung A Ihnak Le A Naper

¹⁵ Khrih tu hmu thil lomi Pathian ai hmuihmel larhnak i. Ani tu Fapa upa ber i ai semhnak thil hmuahhmuah tahin cungnung i.

¹⁶ Zaimantifangin Pathian in Khrih songin zaizongza vancung le laivum ah ituseh, hmu thilhnak le hmu thil lomi ituseh, rauhla lam huham naitu, bawi, uktute le thunaitute ituseh bawn i. Pathian in van le laivum zaizongza Khrih songah bawn ai Khrih caah khawlkhawm tuh sio in bawn i.

¹⁷ Khrih tu zaizongza hlanah um zo ai amah thawn pawlkomhnak thawmin zaizongza heh umhnak nai tlang ṭen i.

¹⁸ Pawlpui tu Khrih ruangpum i ai Khrih tu a lu i. A pumsa ruang ai nunhnak hampui tu amah Khrih i. Amah tu Fapa upa ber i ai zaizongza lakah cungnungber tuh ngio in thihhnak in thoruai leh zo i.

¹⁹ Fapa in amah songah Pathian ihnak semkhim in a naihnak heh amah Pathian ai lairelhnak i.

²⁰ Ciatihin a Fapa songin lai le van pumpuhluk heh Pathian in a hnenah letruai nuam leh i. Pathian in a Fapa thinglamteh vumai a thihnak manin lai le van ai umhnak thil hmuahhmuah thawn remhnak bawn ai ciatihin a hnenah letruai leh i.

²¹ Hlanah tu thil sual ning bawn manin le ning ruat manin Pathian thawn hla dun ai a ral awng i si.

²² Ikhalselai tuh ahcen a Fapa taksa ruangpum rori in thihhnak a tuarhnak manin Pathian in a rualpui ah ning bawn zo i. Cia remhnak a bawnhnak heh mi thianghlim, mawh nai lo le sawibang loin a hmaiah hlengruai ning nuam manin i.

²³ Ciatih imanin ning hamtohhnak a kho ngai vumah kho ngai in sanghnak thawn ding tu ngio ih. Thuthangpha ning zahnak in ning co ngahhnak umlamhnak thawn aisu inkhai ning khan thil maseh. Hemi Thuthangpha hrangah kaimah Paul heh cengfa ing ai, laivum khuahacang mite hmuahhmuah hnenai relhnak Thuthangpha i.

Pawlpui Cengfa Paul Ai Naperhnak

²⁴ Ningmah caah harsahnak i tuarhnak tepawl manin anghnak nai ing; zaimantifangin i taksa ai tawkhnak tuarhnak manin Khrih in a ruangpum Pawlpui hrang ahcen harhnak a tawkhnak khiah khimruai ve ing.

²⁵ Kai tu Pathian ai pawlpui cengfa ah i bawn zo i. Hemi naper a pehnak tu ningmah ai hnempuihnak tuhin i. Ciami tu Pathian thuthang semkhim liang in phuang khiah i ai,

²⁶ ciami thuthang tu san tampui song aisu miphun hnen ahkhai phuang loin thuphnak i ai tun fang ian in a minung hnenah phuanghnak Thuthangpha i.

²⁷ Pathian ai tumtekhnak tu mi zongzong caah a ruat cia a songlawi le ngaihsunurkul thuthup heh tunah a minungte hnenah larruai tuh khiah i. Cen ciami thuthup tu ning songai a ummi Khrih heh a ti nuamhnak imanin Pathian songlawihnak heh kawm tuh ve i si, tihnak i.

²⁸ Ciamanin aisusu hnen ahkhai Khrih heh phuang ising. Mi zongzong hnenah fimhnak kin naihnak hmuahhmuah hmangin ralringhnak thu rel tlang ai zirh ising. Ciatih ai kin bawnhnak tu aisusu khai Khrih thawn kin pawlkomhnak songin Khristian puitling cang in Pathian hmaiah hlenpui kin nuam manin i.

²⁹ Hemi hlehsuah tuhin amah Khrih in i pehnak, kaimah songah a roh ngai in na a pertu, hathnak hmangin per dekdo ing.