Joshua 9 - Zanniat Bible

Gibeon Mite In Joshua Zawl I

¹ Joshua in he khuate a nehhnak thu Jordan in nitlak lamai a ummi kumpibawite le tlang vumai a um mite ituseh, zawllai ai um mite ituseh, Mediterranean tifingriat kam ai um mite, sak lam Lebanon ramai um mite tianin za sio i. Ciatihin Hit mi, Amor mi, Canaan mi, Perizz mi, Hiv mi le Jebus mi kumpibawite in za fangin,

² Joshua le Israel mite tawng tuhin tai khawm tlang i.

³ Joshua in Jericho le Ai khua vumah a bawnhnak heh Hiv miphun Gibeon khua song mite in a za fangin,

⁴ Joshua khiah zawl tum tlang i. Dip her in rong thun ai a dathnak cabitti thawl thawn laak phurruai i.

⁵ Dat fawmhnak kedawl le hnikpon siava sil ai amahte sunsiah kenghnak khai a ro le a uu ciang i.

⁶ Cen Gilgal ai a riahbuk ah feh tlang ai Joshua le Israel mite hnenah, “Ning hnenah lamhlapui in kawi ai remhnak thukham bawn tlang tuh ising,” tiin ti tlang i.

⁷ Ciafangin Hiv mite hnenah Israel mite in, “Kin nong niu ai ummi ile i sikhaw akontih in remhnak thukham bawn thil tuh i ing?” tiin ti i.

⁸ Cen Joshua hnenah, “Bawipa kinmah heh na salte i ing,” tiin ti tlang i. Joshua in, “Aisute i si? Konteng in kawi i si? tiin zawt i.

⁹ Ciafangin anite in, “Na Bawipa Pathian ai thil bawnhnak ling manin khua hlapui an kawi tlang i ing. Egypt ramai thil bawnhnak ituseh,

¹⁰ Jordan in nisuah lamai a ummi Amor miphun kumpibawite pahnih Heshbon kumpibawi Sihon le Ashtaroth ai a ummi Bashan kumpibawi Og vumah a bawnhnak thil ituseh ling sio i ing.

¹¹ Kin hotu le kin rammi hmuahhmuah in, ‘Rong keng tu ilai Israel mite tawk ta tu ih; ning sal i ing ai ningmah thawn remhnak thukham bawn tu ih,’ tiin rel tuhin kin ruai i.

¹² Kin kenghnak sang khai sik tu ih. Ningmah tawk tuhin kin inn in kin suak fangin a lum niu lai i. Ikhalselai tun tu ro sek hang ai uu sek ihang.

¹³ Cen cabitti thunhnak saphaw thawl khai sik tu ih. A thar inapui tun tu her sek ihang. Kin hnikpon le kin kedawl khai sik tu ih. Lamhlapui in kawi manin her sek ihang,” tiin ti tlang i.

¹⁴ Rong amahte kenghnak tu Israel hotute in lang ai ai tlang i. Ikhalselai Bawipa ai daihhnak si hmasa ta lo i.

¹⁵ Ciatihin Joshua in remhnak bawn ai rek tuar lohnak tuhin amahte thawn thukhamhnak bawn i. Cen Israel hotute in cia remhnak heh khoruai i.

¹⁶ Thukhamhnak a bawn hnua ni thumhnak fangin Gibeon mite tu a nong niu ai um mite i ti khiah Israel mite in ling leh i.

¹⁷ Ciamanin Israel mite tu feh ai, Gibeon mite umhnak Gibeon khua, Chephirah khua, Beeroth khua le Kiriath Jearim khua ah hleng i.

¹⁸ Ikhalselai Israel mite in Gibeon mite tu rek tuhin cang thil nawn lo i, zaimantifangin amahte hotute in anite thawn Israel ai Pathian Bawipa hming sal in thukhamhnak bawn tlang zo i. Cia thu manin Israel mizapuite tu a hotute vumah phuncam tlang murhmo i.

¹⁹ Ikhalselai hotu upate in, “Bawipa, Israel ai Pathian hming sal in thukhamhnak bawn i ing. Zaitin anite tu tok thil lo i ing.

²⁰ Thukham zo manin zuah rori kin kul ihang. Zuah hlahle singkhaw Pathian in kinmah kin cawh tuh i.

²¹ Ciamanin um tu ve hang seh; ikhalselai kin caah zanthing fom tuseh, ti cawi tuseh,” tiin ti i. Amahte konghoitute relhnak bangin misenpui in hlun tlang i.

²² Joshua in Gibeon mite ko ai, “Kin hiangniu ah ummi inapui zaimanin lamhlapui in kawi i ing tiin kin zawl i si?

²³ Hetihin kin zawl manin Pathian cukcamhnak i si. Tunai panin Pathian ai inn hrangah thingfomtu le ticawitu, sal ning cang tuh ihang,” tiin ti i.

²⁴ Ciafangin Gibeon mite in, “Bawipa na Pathian cengfa Moses hnenah thupe ai he ram pumpuhluk heh na kut songah pe tuhin le he ram songai a umtu hmuahhmuah rek tuh sio in rel i, ti fiang ngai in ling i ing. Kin rek tuh sio i ti ning kih ze manin hetihin kin bawnhnak i.

²⁵ Tun tu na kut songah um zo manin a dik na ti bangin bawn tuhang,” tiin ti i.

²⁶ Ciamanin Israel mite in rek tuh loin Gibeon mite heh Joshua in hup i.

²⁷ Ikhalselai Bawipa ai puleng hrang le mizapui caah ticawitu le thingfomtu hnenum ah bawn i. Bawipa in amah biahnak hrang a rilhnak hmuncang ah napertute tu tunnia tianin amahte ihang.