Joshua 8 - Zanniat Bible

Ai Khua Lang Tlang I

¹ Bawipa in Joshua hnenah, “Kih mah, na thin khai nau mah. Na ralkap hmuahhmuah thawn Ai khua ah feh tu. A kumpibawi, a minung, a khua le ram a veksen in nangmah ai tuh ihang.

² Jericho khua le a kumpibawi vumai na bawn bangin Ai khua le a kumpibawi vumah bawn tu; ikhalselai tun ṭum tu a thilri le sumhnamte ningmah in co tu ih. Ciamanin Ai khua tawng tuhin ralring tu ilai hnua lamin sim tu ih,” tiin ti i.

³ Ciatihin Joshua le a ralkapte tu Ai khua tawng tuhin ralring i. Mi ralpha ralkap thawng sawmthum ril ai zan seulai ah fehruai i.

⁴ Anite hnenah Joshua in, “Ai khua ai hnua lamin feh tu ilai relh tu ih. A hla ze ah um mah ih; vaikhat pah in sim thai cialep in ralring tu ih.

⁵ Kaimah le i hnenai um ralkap hmuahhmuah in helam in hual tuh i ing. Ai khua ralkapte in kin tawng fangin a hmasa ai bangpah in, khua songin suak tlang tuh i. Ciafangin kin tu hnua lam let tuh i ing.

⁶ Hnua lam kin let fangin kin hnawh tuhai amahte khua hlum sio tianin kin hnawh tlang tuh i. A hmasa ai tlan bangin tlan lala ihang, kin ti tuh i.

⁷ Cialai ah ning relh hmun an suak tlang tu ilai amahte khua heh lang tu ih. Bawipa ning Pathian in amahte khuapui heh ning kut ah ning pe tuh i.

⁸ Khua ning lang ben fangin khuapui heh mai in tai tuh sek i si. Bawipa ai ruaihnak bangin bawn tu ih. Thu ning pe ing!” tiin ti i.

⁹ Ciamanin Joshua in a ralkapte heh zan ah hlat ai Ai khua an nitlak lam, Ai le Bethel karlak ah relh tlang i. Joshua khai amahte riahbuk ah cam i.

¹⁰ Joshua tu a thangha zing khuahma niu in tho ai ralkapte khawm in Israel mite konghoitute thawn Ai khua ah feh tlang i.

¹¹ Khuapui kotka lamah feh ai Ai khua sak lamah cam tlang i. Amahte riahbuk le Ai khua karlak ah phairawn um i.

¹² A ralkap thawng nga tluk heh Ai le Bethel khua karlak, Ai khua an nitlak lamah relhruai i.

¹³ Ciatihin a relh laiah ralkap burpui sawn ciah Ai khua sak lamah um i. Ciatihin raltawng tuhin ralring i. Amah Joshua tu phairawn ah cam i.

¹⁴ Cen Ai khua kumpibawi in Joshua le a ralkapte amahte hiangah um khiah a ling fangin a ralkapte thawn vaikhat pah in suak tlang ai; cen a hmasa ai a tawngdunhnak hmunah Israel mite tawng tuhin Marabah phairawn ah feh tlang i. Hnua lam sawn in kin sim ta ngai ti ruat hal tlang lo i.

¹⁵ Joshua le a ralkapte tu khel lam let in nelrawn lamah tlan tlang bawn khel i.

¹⁶ Ai khua songai pasal hmuahhmuah Israel ralkapte hnawh tuhin kokhawm sio ai Joshua le a ralkapte heh amahte khua an a hlapui tian hnawh tlang i.

¹⁷ Israel mite hnawh tuhin pasal hmuahhmuah suak tlang sio i; amahte khuapui Ai khua kiltu tuhin aisu khai um lo i.

¹⁸ Ciafangin Bawipa in Joshua hnenah, “Na faipui heh Ai khua lam hoi in lim tu; he khuapui khiah na kut songah na pe tuh ing,” tiin ti i. A tihnak bangin Joshua in a faipui in lim i.

¹⁹ A kut a dang sawng fangin Ai khua sim tuhin a relhtu ralkapte suak tlang vut ai Ai khua lang i. Vaikhat pah in cia khua heh mai in tai i.

²⁰ Ai khua ralkapte in a hnua lam hoi fangin amahte khua an maikhu van tian kai ngualngo khiah hmu tlang i. Cen hampalak lam a tlantu Israel ralkapte tu let tlang ai a hnawhtu Ai ralkapte heh tawng i. Ai ralkapte caah luathnak um lo i.

²¹ Ai khua lang zo ai maitai zo ti khiah Joshua le a ralkapte in a hmu fangin hnua lam let ai Ai khua ralkapte heh rek tlang dekdo i.

²² Khuapui songai a umciatu Israel ralkapte suak tlang ai ralte hnua lamin tawng tlang i. Israel ralkapte in a hnua lamin kulh sio ai, amahte kumpibawi siarlo, minung pakhat khai tang loin rek tlang sek i.

²³ Cen Ai khua kumpibawi heh pom ai Joshua hnenah fehpui i.

²⁴ Hampalak tian ralhnawhtu Ai khua ralkapte tu pakhat khai luat loin Israel ralkapte in rek berh i. Cen Ai khua songah let ai khua ai ummi zongzong rek berh lala i.

²⁵ Khuasen in rek berh ai a rekhnak pasal le nupang a veksen in thawng hlaihnih i.

²⁶ Khua songmi a veksen in a rek ben hlanlo Joshua in a faipui heh Ai khua lam hoi in lim ngio i.

²⁷ Cen Joshua hnenah Bawipa rel cia bangin Ai khua songai a suthnak sumhnam le thilrite heh Israel mite in amahte caah lang sek i.

²⁸ Ciatihin Joshua in Ai khua heh zaikom inkhai um tlak tuh nawn loin mai in tai sio ai tun san tianin khuarop ah cang i.

²⁹ Ai khua kumpibawi tu thingkung vumah Joshua in tar ai ciata ah a luang heh zan lam tianin tar ngio i. Ni tla fangin Joshua in thupe ai a luang heh thing vuman a lang hnuaah khuapui luthnak kotka lampui ah lon i. A luang vumah lungto pum tlang ai cia lungpup tu tunnia tianin um lai i.

Ebal Mual Vumah Pathian Pehnak Dan

³⁰ Israel ai Pathian Bawipa caah Joshua in Ebal mual vumah puleng tiang i.

³¹ Ciami puleng tu Bawipa ai cengfa Moses in Israel mite hnenah thu a pehnak awng Moses dan Laibu songai a nganciahnak bangin, “Thir ai at lohnak lungto tianghnak puleng i.” Cia puleng vumah maitai hibawlhnak Bawipa hnenah sel ai, rualrem hibawlhnak khai sel i.

³² Ciata Israel mite mithmuh ah Moses ai nganhnak Thukham heh Joshua in lungto vumah ngan i.

³³ Israel mite veksen in, hotute, bawite, thukhantute, le anite thawn umtu ramdang mite thawn Thutiam Kuang a zawngtu Levi mi suangbawite hnenah hoi in Bawipa Thutiam Kuang sir veve ah ding tlang i. Israel mite a hrek tu Gerizim tlang zangtak in ding tlang ai a hrek tu Ebal mual zangtak in ding tlang i. Israel mite hmuifu pe tuh fangin ciatihin ding tuhin Bawipa ai cengfa Moses hnenah thu a pe cia i.

³⁴ Thukham laibu songai nganhnak bangin, hmuifu thu le cukcam thu thawn, Thukham heh Joshua in cawm ngai in siar i.

³⁵ Nupang, naupang, le a dang miphunte khai tel in Israel mizapui hmaiah Moses ai thupeciahnak pakhat khai pelh loin Joshua in siar sio i.