Joshua 7 - Zanniat Bible

Akhan Sualhnak

¹ Lang tuh lo ai khamhnak hmuahhmuah zaikhai dai mah ih, tiin Bawipa ai thupeciahnak heh Israel mite in hlun tlang lo i. Thilri a langtu heh Akhan i. Akhan tu Karmi ai fapa i, Karmi tu Zabdi ai fapa i. Zabdi tu Zerah hin i ai Zerah tu Judah miphun i. Akhan in thilri a lang manin Israel mite vumah Bawipa a thinraw i.

² Joshua in Israel mite hrekkhat Jericho khua an Ai khua ah khua le ram sik tuhin hlat i. Ai khua tu Bethel nisuah lam Bethaven khua hiangniu ai umhnak khua i. Ciamanin feh ai Ai khua heh cul tlang i.

³ A nalangte let fangin Joshua hnenah, “Kin veksen feh kul tuh lo ising. Ai khua sim tuhin minung thawng hnih thawng thum dung hlat tulai tawk tuh i. Mi zongzong ai tawng tuh tlak lo i, mi tlawmniu ian i,” tiin rel leh i.

⁴ Ciamanin Israel ralkapte thawng thum dung ian feh i. Ikhalselai Ai khua ai ralkapte in neh ai tlan tlang sio i.

⁵ Israel ralkapte sawmthum le paruk thi i. A khuasuah in Shebarim tihnak lungto langhnak tian Ai khua ralkapte in Israel ralkapte heh hnawh ai a tlanhnak tlangtluan ah ral in rek kong betbo i. Ciamanin Israel mite tu thinlau tlang i, lau ze manin tha nau tlang sualso i.

⁶ Ciafangin Joshua tu a lungsia in a hnikponte zik ai Bawipa ai Thutiam Kuang hmai laipua lakah bok i. Israel mite konghoitute khai a lungsia in amahte lu vumah laivut phulh tlang ai Joshua hnenah zan lam tianin bok tlang ve i.

⁷ Cen Joshua in Bawipa hnenah, “Aw Bawipa Pathian, zaimanin Jordan runpui ralkhat kin hlengpui isi? Amor mite kut songah tla tuhin le siatsuah pairal tuh sek in maw kin ti isi? Zaimanin Jordan runpui ralkhat lam sawn ah um sawn lo i ing?

⁸ Maw Bawipa, Israel mite ral in kin hnawh thliahthlo hnuaah ziang pong ngam pa nawn nga ing?

⁹ Ciatihin kin hnawthnak thula Canaan mite le midangte in kin ling fangin kin kulh tuh sio ai kin ci kin hmit tuh sio i. Na hmingthangruai tuhin ziang bawn tuh i si?” tiin ti i.

¹⁰ Ciafangin Bawipa in Joshua hnenah, “Tho tu, zaimanin bok ngio isi?

¹¹ Israel mite sual zo i. Hlun tuh tiin kin thukhamdunhnak hlun lo i. Lang mah ih tihnak thilri lang i. Ru in pheh ai amahte thilri lakah thup i.

¹² Ciamanin Israel mite in ral ning tawng thil lohnak i. Raltawnghnak in tlan ai tun tu siatsuah tuar tuh sek ihang i si. Ning ruhnak thilri siatsuah sek hlah le i sikhaw ning hnenah um tuh nawn lo ing.

¹³ Tho tu; na minungte tu amahte sualhnak in cianghlimruai tulai kaimah i tawk tuseh. Thaininghla i tawk tlang tuseh, phatak niu in rel tu; zaimantifangin kaimah Israel mite ai Pathian in amahte hnenah i pong nuamhnak tu hetihin i: ‘Aw Israel, lang tuh lo i tihnak thilri lang i si. Cia thilri ning lon sek hlanlo ning ralte neh thil tuh lo i si.

¹⁴ Ciamanin zing lamah a hinnam a hinnam in suak tu ih. Bawipa rilhnak nam songin a hin a hin in suak tu ih. Bawipa in ril tuhai Bawipa rilhnak hin songin songkhat songkhat in suak tu ih. Cen Bawipa rilhnak songkhat songin minung pakhat pakhat in suak tu ih.

¹⁵ Lang tuh lo ti ai khamhnak thilri a langtu heh a innsang le a naihnak hmuahhmuah thawn mai in tai tuh i si. I thukham hlun lo manin Israel miphun vumah zakthikul thil sual lianpui hlengtiar i si,’ tiin ti tu,” tiin ti i.

¹⁶ Joshua tu zing khuahma niu in tho ai Israel mite heh a nam a nam in kawiruai i. Cia namte songin Judah namte thur ngah i.

¹⁷ Judah nam songin a hin a hin in suakruai ai Zerah hinte thur ngah i. Zerah hin songin innsang innsang in suakruai lala ai Zabdi innsang thur ngah i.

¹⁸ Cen Zabdi innsang songin minung pakhat pakhat in suakruai ai Akhan heh mawh phurruai i. Akhan tu Karmi fapa i ai Zabdi ai tupa i.

¹⁹ Ciafangin Joshua in Akhan khiah, “I fapa, Israel ai Pathian Bawipa hmaiah thutak rel tulai na sualhnak phuang tu. Na bawnhnak i rel tucuk. Zaikhai pheh loin i rel tu,” tiin ti i.

²⁰ Cen Akhan in, “I, Israel ai Pathian Bawipa hmaiah sual zo ing. I bawnhnak tu hemi i.

²¹ Kin suthnak thilri songah Babylon pon mawi ngai pakhat, pawng nga tluk rit ngun tum khat le, pawng khat tluk rit sui tumkhat hmu ai i daih ze manin lang ing. I buk songah phum ai hmu tuh isi; a hniataber ah ngun tum dah ing,” tiin ti i.

²² Ciafangin Joshua in mi hrekkhatte hlat ai Akhan buk ah rang ngai in dawp ai a buk songai a phumhnak thilte heh hmu tlang i; ngun tum heh a hniataber ah hmu tlang ngaingai i.

²³ A phorh ben fangin Joshua le Israel mizapui hnenah koih ai Bawipa hmaiah dah i.

²⁴ Cen Joshua le Israel mite in Akhan le ngun tum, a sui tum le Babylon pon mawi ngai le, a fapate, a fanute, a kawlpaw, a siphuh, a tuu le a naihnak hmuahhmuah lang sek ai Harsahnak phairawn tihnak ah fehpui i.

²⁵ Ciata ah Joshua in, “Zaimanin kin vumah zakthi harsahnak kin hlen isi? Bawipa in na vumah harsahnak hlengruai tuh ve i,” ti ai amahte veksen in Akhan heh lungto in sep tlang dekdo ai thi i. A innsangte le a naihnak hmuahhmuah khai sep tlang le thi sio ai mai in tai sek i.

²⁶ Ciata Akhan thi hmunah lungto pum tlang ai tunnia tianin cia lungpup um lai i. Ciamanin cia hmun heh Akhor, Harsahnak phairawn, tiin ko i. Cia hnuaah Bawipa ai thinrawhnak tu bo leh i.