Joshua 6 - Zanniat Bible

Jericho Khua Lang I

¹ Israel mite lut thil maseh tiin Jericho khua heh kho ngai in kulh ai kotka khai kalh i. A lut a suak aisu khai um lo i.

² Ciafangin Bawipa in Joshua hnenah, “Ngai tu! Jericho khua le a kumpibawi le a ralkapte veksen in na kut ah na pe ing.

³ Hemi khuapui heh nangmah le na ralkapte in ni khat ah vel khat niruk song hel tu ih.

⁴ Suangbawite pasarih, Thirhlung pakhat ṭen kengin Thukham Kuang hmaiah feh tlang tuseh. Ni sarihhnak nia ah nangmah le na ralkapte in khuapui heh vel sarih hel tu ilai suangbawite in tuucangki hlung hmut tlang tuseh.

⁵ Cen sau ngai in vel khat hmut tu selai ciami a za sawng fangin mizapui heh cawm roh in au tlang tuhai a khuapui kulhhnak vingpui min tuh rupro i. Ciafangin ralkapte tu amahte hmaicang ṭen in khua songah lut tlang tuseh,” tiin ti i.

⁶ Ciamanin Joshua in suangbawite ko ai, “Thutiam Kuang lang tu ilai, ningmah lakah suangbawite pasarih in tuucangki hlung pakhat ṭen keng in Thutiam Kuang hmaiah feh tu ih. Cen ralkapte tu ningmah hmaiah feh tuh i,” ti i.

⁷ Cen Israel mite hnenah Joshua in, “Feh pan tuhang ih. Khuapui hel tu ilai Bawipa ai Thutiam Kuang hmai lamah ralkapte feh tuseh,” tiin ti i.

⁸ Joshua ai thupeciahnak bangin Bawipa ai Thutiam Kuang hmai lamah suangbawite pasarih tu thirhlung tum kongin feh tlang i.

⁹ Thirhlung a tumtu suangbawite hmaiah hmainortu ralkapte feh ai hnuakhortu ralkapte in Thutiam Kuang hnua lamin hlun tlang i. Catloin thirhlung tum tlang i.

¹⁰ Ikhalselai Joshua in mizapui hnenah, “Au tuhang ih iti hlanlo aisu inkhai au mah ih, kamkhat bangkhai pong mah ih,” tiin ti i.

¹¹ Ciamanin Bawipa ai Thutiam Kuang thawn suangbawite tu Joshua ai hlathnak bangin khuapui heh vel khat hel tlang i. Cen amahte riahbuk ah let ai amahte buk ah cam tlang i.

¹² A thangha zing khuahma niu in Joshua tu tho ai; suangbawite in Bawipa ai Thutiam Kuang heh zawng tlang i.

¹³ Ciami suangbawite pasarih tu thirhlungte pasarih hmut kongin hmaiah feh tlang i. Hmainortu ralkapte in amahte hmaiah feh ai hnuakhortu ralkapte in Bawipa ai Thutiam Kuang khel lamin khor tlang i. Catloin thirhlung tum tlang i.

¹⁴ Ni hnihhnak nia ahkhai khuapui tu vel khat hel tlang lehthio ai riahbuk ah let tlang leh i. Ni ruk song ciatihin bawn tlang i.

¹⁵ Ni sarihhnak nia zingniu in tho tlang ai a hlan bangin khuapui tu vel sarih hel tlang i. Cia nia lek ah vel sarih hel i.

¹⁶ Velsarihhnak a hel tlang fangin suangbawite in thirhlung tum ai Joshua in mizapui hnenah, “Au tuhang ih! Hemi khuapui tu Bawipa in ning kut songah ning pe zo ihang.

¹⁷ Khuapui tu siatsuah tuh sek ai a songai umhnak hmuahhmuah heh Bawipa hnenah pe tuh sek ih. Micultute kin hlathnak himniu in thup manin hlotlau nu Rahab le a innsang lek zuah tu ih.

¹⁸ Cen lang tuh lo i si tihnak te khiah nong tuh hrimhrim lo i si. Lang tuh lo i si tihnak thil pakhatkhat lang pang le i sikhaw Israel mite vumah harsahnak le siatsuahhnak hlengruai tuh rori i si.

¹⁹ Ikhalselai sui le ngun, dar le thir ai bawnhnak hmuahhmuah Bawipa caah pe tusek ih. Bawipa ai tangka dahhnak inn ah dah tu sio ih,” tiin ti i.

²⁰ Ciafangin suangbawite in thirhlung tum tlang ai mizapui in za fangin cawm roh in au tlang dekdo i. Cia sawng fangin khuapui vingkulh khiah min rup i. Ciafangin ralkapte in amahte hmaicang in khuapui songah lut ai khuapui heh lang tlang i.

²¹ Amahte ralvang in khuapui songai a ummi zongzong nupang ituseh, pasal ituseh, naupang upa ti um loin rek berh i. Kawlpaw le tuu le laakte khai rek cih sio i.

²² Micultute a hlathnak pahnih heh Joshua in ko ai, “Hlotlau nu Rahab hnenah feh tu ilai ning thukhamhnak bangin amah le a innsangte heh hoisuak tu ih,” tiin ti i.

²³ Ciamanin feh kawm ai Rahab heh a pa, a nu, a hmingpate le a dang innsangte thawn suahpui i. A innsang le a salte thawn suahpui ai Israel mite zancam hmun buk pualam ah dah i.

²⁴ Cia hnuaah Jericho khuapui heh a songai ummi zongzong thawn mai in tai sek i. Mai ai tai lohnak sui le ngun, dar le thir hmuahhmuah lang ai Bawipa ai tangka dahhnak ah dah i.

²⁵ Ikhalselai hlotlau nu Rahab le a innsang tu Jericho khua a cultute pahnih a thup manin Joshua in rek loin zuah i. Tunnia tian Rahab ai tefate tu Israel mite ram songah um lai i.

²⁶ Cen Joshua in cukcamhnak thawn: “Hemi Jericho khuapui saleh a tumtu heh, Bawipa ai cukcamhnak tawk tuseh; Hemi khuapui tungding leh tum in khur a cotu heh, A fapa upa ber thi tuseh. Hemi khuapui kotka a bawnlehtu heh, A fapa nauta ber thi tuseh,” tiin ti i.

²⁷ Joshua hnenah Bawipa a um manin Joshua hming heh amahte ram pumpuhluk ah thang i.