Joshua 4 - Zanniat Bible

Hihhnak Lungtote Bir I

¹ Israel mite veksen in Jordan runpui tan ben sek fangin, Bawipa in Joshua hnenah,

² “Israel miphun phun khat in minung pakhat ṭen minungte hlaihnih ril tulai,

³ anite hnenah, ‘Suangbawite dinghnak Jordan runpui laiteng ai lungtote hlaihnih lang tu ilai tun zan ning riahbuk ah dah tu ih,’ tiin thupe tu,” tiin ti i.

⁴ Cen a ril cia minungte hlaihnih khiah Joshua in ko ai,

⁵ “Jordan runpui ah Bawipa ning Pathian ai Thutiam Kuang hmaiah feh tu ilai lungto pakhat ṭen ti songin lang tu ilai ning kodar ah phur tu ih; lungto pakhat tu Israel miphun phunkhat aiawh tuh i.

⁶ Bawipa ai a bawnhnak hmuahhmuah heh Israel mite in hihhlenhnak tuhin he lungtote tu hnikhnaihhnak cang tuh i. Hmai lamah ning tefate in he lungtote tu a sullam ziang i tiin ning zawt fangin,

⁷ Bawipa ai Thutiam Kuang Jordan runpui ti a tan fangin, Jordan runpui tu luang lo in cat i, tihnak Israel mite in hihhlenhnak tuhin he lungto bir i ing, tiin rel tuh i si,” tiin ti i.

⁸ Ciamite in Joshua ai thupehnak bangin bawn i. Bawipa in Joshua hnenah a relhnak bangin minungte hlaihnih in lang ai Jordan tipui laiteng ai lungtote hlaihnih lang ai lungto pakhat in Israel miphun phunkhat ṭen aiawh i. Lungto tu lang ai amahte riahbuk ah dah i.

⁹ Cen Joshua in Jordan runpui laiteng, Thutiam Kuang zawngtu suangbawite dinghnak ah lungtote hlaihnih bir i. Ciami lungbirhnak tu tunnia tianin um lai i.

¹⁰ Israel mite bawn tuhin Bawipa in Joshua hnenah a thupehnak hmuahhmuah a bawn ben hlanlo suangbawite tu Jordan runpui laiteng ah ding tlang thliahthlo i. Ciami tu Moses in thupeciahnak a hlunhnak i. Cen Israel mite in rang ngai in runpui ti tan tlang i.

¹¹ Amahte veksen in run ralkhat hleng ngah fangin Bawipa ai Thutiam Kuang le suangbawite tu mizapui hmaiah feh i.

¹² Reuben mite, Gad mite le Manasseh mite a hrekkhat tu, Moses ai rel awnghnak bangin raltawng tuhin mizapui hmaiah feh i.

¹³ Raltawng tuhai a thuampai cialep minung thawng sawmli tu Bawipa mithmuh ah Jericho hiang zawllai lamah feh i.

¹⁴ Cia nia ah Bawipa ai thil bawnhnak manin Israel mite veksen in Joshua tu hming pha pe ai upat ngai i. Moses a upat bangin Joshua khai a nun song hmuahhmuah upat tlang ve i.

¹⁵ Cen Bawipa in Joshua hnenah,

¹⁶ “Thutiam Kuang a zawngtu suangbawite tu Jordan runpui songin suak tuh hangin thupe tu,” ti i.

¹⁷ Bawipa ruaihnak bangin Joshua in thupe i.

¹⁸ Suangbawite varkam in suak ai laipua ro a fon sawng fangin Jordan runpui tu a luang kel in luang leh ai ti khiah varkam sirhsan in tuk roh in luang i.

¹⁹ Israel mizapui in Jordan runpui heh hla hmasaber ni hra nia ah tan tlang ai Jericho in nisuah lamai umhnak Gilgal khua ah cam tlang i.

²⁰ Ciata ah Jordan runpui ai langhnak lungtote hlaihnih heh Joshua in bir i.

²¹ Joshua in Israel mite hnenah, “Hmai lamah ning fate in hemi lungtote tu a sullam ziang tica i?’ tiin ning zawt fangin,

²² ‘Israel mite in Jordan runpui tan tlang fangin laipua ro vuman feh i tica i,’ tiin rel tuh i si.

²³ Bawipa in Tipui San kin tan ben hlanlo a roruai bang thotho in ning ca ahkhai Jordan runpui ning tan ben hlanlo roruai ve i.

²⁴ Ciamanin laivum mi zongzong in Bawipa ai thil tithaihnak kutcak heh ling tuhai ningmah inkhai Bawipa ning Pathian khiah a kumzangza in upat tuh i si,” tiin ti i.