Joshua 23 - Zanniat Bible

Joshua Ai Vaihla Thucahhnak

¹ Can rai deuh ai amahte hiang ralte thawn daphnak Bawipa in Israel mite hnenah a pe hnuaah Joshua tu tar ngai ihang.

² Ciafangin Israel mite hmuahhmuah a upate, konghoitute, thukhantute le tlangsuakte thawn ko ai, “Kai tu i tar ngai ihang.

³ Bawipa ning Pathian in ningmah manin he ramai a umtu miphunte vumah a bawnhnak heh hmu tlang zo i si. Ningmah lam ṭangin Bawipa ning Pathian in raltawng i.

⁴ Ngai tu ih; kin neh lai lohnak miphunte vumah ituseh, kin neh sa nisuah lam Mediterranean Tifingriat tian a umtu miphunte ituseh, ningmah co tuhin ning pe zo ing.

⁵ Bawipa ning Pathian in he miphunte tu ning mithmuh in hnawt tuhai tlan tuh betbo i. Cen Bawipa ning Pathian thukham cia bangin amahte ram heh khur tuh i si.

⁶ Ciamanin hat ngai le fimkhur bik in um tu ih. Moses ai pehnak dan laibu songai a nganhnak bangin bawn tu ilai hlun tu ih; tlawmniu khai kiahhan lam ituseh, kekeh lam ituseh pial mah ih.

⁷ Ningmah lakai a tanglaimi he ram minungte thawn cokrawi in hoi dun mah ih; amahte khuavang hming khai sal mah ih, amahte hming in cukcamhnak khai bawn mah ih, amahte naper khai per mah ilai amahte hmaiah ning lu khai ut mah ih.

⁸ Tunnia tian Bawipa ai rinsantlak in ning um bangin hmai lam ahkhai rinsantlak in tu ngio ih.

⁹ Bawipa ai a hat ngai le a thupui ngai miphun heh, hmai lam ning nor amam fangin, ning hnawh ai ning tawng bentu aisu khai um lai lo i.

¹⁰ A thukhamhnak bangin ningmah ṭan in Bawipa ning Pathian in a tawng manin ningmah lakai mi pakhat inkhai ral thawng khat hnawt ben i si.

¹¹ Ciamanin Bawipa ning Pathian a ittu cang tuhin fimkhur in nung tu ih.

¹² Hnua lam her in ning hiangai a um laitute thawn kom dun in hoi dun le i sikhaw,

¹³ Bawipa ning Pathian in hemi miphunte tu hnawt tuh nawn lo ihang, ti khiah tunai panin ling cia tu ih. Ning ca khung bang le thang bangin a laukul cang tuhai ning zangkhun vithnak fungkek le ning mit songai hling bangin tuar tuh i si. Bawipa ning Pathian ai a ning pehnak he rampha in ning bo sek lai hlanlo ciatihin tuar tlang tuh i si.

¹⁴ “Kai tu i thi tuh ihang. Bawipa ning Pathian in thilpha hmuahhmuah ning thukhamhnak a veksen in a semkhim in khimruai zo ihang, ti khiah ning thinlung veksen in ning linghnak rori i. A thukhamhnak hmuahhmuah khimruai zo i, pakhat khai pelh lo i.

¹⁵ Bawipa ning Pathian in bawn sah tuhin a thukhamhnak hmuahhmuah heh bawn zo sio i. Ikhalselai ning vumai thil pha a bawntu Pathian thu hlun hlahle i sikhaw ning vumah thil sual hlengruai tuh i.

¹⁶ Bawipa ning Pathian in hlun tu ih ti ai thu a ning pehnak thutiam hlun loin khuavang dangdang hlun ai bia sawn le i sikhaw ning vumah a thinraw tuhai a pe cia he rampha ah minung pakhat khai tang loin ning bo tuh sio i,” tiin ti i.