Joshua 22 - Zanniat Bible

Joshua Ai Vaihlahnak Thu

¹ Joshua in Reuben mi, Gad mi le nisuah lam Manasseh mi a hrekte tu hmunkhat ah ko ai anite hnenah,

² “Bawipa cengfa Moses ai thupehnak hmuahhmuah hlun tuh sio ai kaimah ai thupeciahnak khai a veksen in hlun sio i si.

³ Tunnia tian ah ning unau Israel mite vel khat bangkhai hlum awng lo i si. Tunnia tian ah Bawipa ning Pathian ai thupehnak fel ngai in hlun i si.

⁴ Tun in a hnenah a thukhamhnak bangin ning unau Israel mite hnenah cawlumhnak can pe i. Ciamanin Bawipa cengfa Moses ai ning pehnak ram, Jordan runpui in nisuah lamah tlung tuhang ih.

⁵ Bawipa ai cengfa Moses in, ‘Bawipa ning Pathian it tu ih; a lampui in vak tu ilai a thupehnakte hlun tu ih; Bawipa tu kho ngai in pom tu ih; ning thinlung le ning nunhnak a veksen in ruaih tu ih,’ tiin thu ning pehnak heh felfai ngai in hlun tum tu ih,” tiin thucah i.

⁶ Cen Joshua in hmuifu pe ai amahte khua ah tlung tlang i.

⁷ Manasseh hin a hrekkhatte tu Jordan runpui in nisuah lam Bashan tihnak peng ah Moses in lairam pe i; ikhalselai a hrek tu hindangte thawn hmun khat ah Jordan runpui an nitlak lamah lairam pe i. Reuben hin, Gad hin le Manasseh hin hrekkhatte tu amahte khua ah a tlung fangin, Joshua in,

⁸ Tun in ning khua ṭen ah, sumsaw le sumhnam tampui, sui, ngun, dar, thir le hnikpon tampui thawn lian ngai in tlung tuh i si. Ning ralte hnenin ning longhnak thilrite tu ning unau Israel mite thawn zem tu ih,” tiin thucah i.

⁹ Ciatihin Reuben hin, Gad hin le Manasseh hin a hrekte Jordan nisuah lam amahte khua ah tlung tlang i. Canaan ram Shiloh ai amahte riahbuk ah Israel midangte heh hlum ai Bawipa in Moses hnenah thu a pezohnak bangin amahte cohnak ram Gilead ah feh tlang i.

Jordan Runpui Hiangah Puleng

¹⁰ Canaan ram, Jordan runpui hiangai umhnak Geliloth a hleng fangin Reuben hin, Gad hin le Manasseh hin a hrekte in runpui hiangah puleng a lian ngai pakhat a co bik in bawn i.

¹¹ Ciafangin, “Ruat tu ih, Reuben hin, Gad hin le Manasseh hin a hrekte in Jordan runpui khat lam kam, Canaan ramri hiang, Geliloth ah puleng bawn i,” tiin mite in rel lianglo i

¹² Ciami tu Israel mizapui in ling fangin amahte veksen in Shiloh ah khawm tlang ai Reuben hin, Gad hin le Manasseh hin a hrekte heh tawng tum i.

¹³ Ciafangin suangbawi Eleazar ai fapa Phinehas tu Israel mite in Gilead ram Reuben hin, Gad hin, le nisuah lam Manasseh hin a hrekte hnenah hlat tlang i.

¹⁴ Amah lek ilo in Israel hinkhat in minung pakhat ṭen hotute pahra Phinehas thawn feh tlang i. Ciami palaite tu hinkhat ai a luber ciang i.

¹⁵ Gilead ram hleng ai Reuben mi, Gad mi le nisuah lam Manasseh mite hnenah,

¹⁶ “Zaimanin hebang thil sual heh Israel ai Pathian hmaiah bawn tlang i si? Hemi puleng heh ningmah caah ning bawn manin Bawipa tawngcai tlang i si. Amah hlun nawn lo i si.

¹⁷ Peor ah Israel mite sualhnak manin Bawipa in a minungte a cawh khiah hih lo ihang i sim? Ciami sualhnak manin tun tianin tuar tlang lai ising. Ciahmuah in tawk hang lo im?

¹⁸ Tun in Bawipa zangtak tuh i sim? Bawipa khiah tunnia tawngcai le i sikhaw thangha ah Israel mizapui vumah a thinraw tuh i.

¹⁹ Cen ning ram tu ningrim zo ai Bawipa biahnak hrangah tlak nawn lo i ti le i sikhaw Bawipa ram a Ponhlam umhnak ah kawi lehsal tu ih. Kinmah lakah covo lang tu ih. Ikhalselai Bawipa ning Pathian puleng siarlo Puleng dang ningmah caah sa in Bawipa khiah tawngcai mah ih; kinmah khai Pathian tawngcaitu kin can mah ih.

²⁰ Siatsuah tuh sio ti ai thupeciahnak Zerah ai fapa Akhan in a hlun nuam lo manin Israel pumpui in cawhhnak kin tuar khiah hih lo ihang i sim? Akhan sualhnak manin amah lek thi lo i,” tiin ti i.

²¹ Ciafangin Reuben mi, Gad mi, le Manasseh mi a hrekte in Israel mite hotute hnenah,

²² “Cungnungber Pathian! Ani tu Bawipa i! Hmualnai Pathian! Ani tu Bawipa i! Hemi thil kin bawnhnak thu heh Bawipa amah in kin ling i; Israel mite inkhai ling kul i si. Bawipa tawngcai ai zuarthlai ile ingkhaw tunnia ah kin nungruai mah ih.

²³ Bawipa ai thu hlun loin hersan ai kinmah caah maitai hibawlhnak, rong hibawlhnak le rualrem hibawlhnak tuhin puleng bawn ile ingkhaw Bawipa amah rori in kin cawh tuseh.

²⁴ Hetihin puleng kin bawnhnak tu zaiman i tifangin: hmai lamah ning tefate in, ‘Israel ai Pathian, Bawipa thawn ziang pehdunhnak nai i si?

²⁵ Reuben mi, Gad mite, ningmah le kinmah lakah ramri tuhin Pathian in Jordan runpui bawn zo i. Bawipa thawn ning tu pehzomhnak nai lo ihang i si,’ tiin kin fate hnenah kin ti pang fangin, ti kin lau man i. Ciatihin ti ngaingai selai ning fate in kin fate tu Pathian bia tuh kham cang tuh lo im?

²⁶ Ciamanin pehnak le maitai hibawlhnak hrang ilo in,

²⁷ Bawipa tu maitai hibawl le hibawlhnak le rualrem hibawlhnak thawn a Ponhlam thianghlim hmaiah bia i, ti khiah ningmah le kinmah karlak ah ituseh, ning fate le kin fate karlak ah ituseh, hnikhnaihhnak le lingpuitu ah he puleng bawn i ing. Hetihin bawn le singkhaw ning fate in kin fate tu, ‘Bawipa thawn ziang pehdunhnak khai nai lo i si,’ tiin hmai lamah ti thil tuh lo i.

²⁸ Ciatihin ti inkhai kinmah in, ‘Sik tu ih, Bawipa ai puleng bang rori in kin pupate in puleng pakhat tiang ve awng zo i. Hibawlhnak hrang le maitai hibawlhnak hrangah ilo in kin pahnih karlak ah hnikhnaihhnak thulingtu ah cang i,’ ti thil tuh i ing, tiin ruat i ing.

²⁹ Bawipa amah umhnak Ponhlam hmai ai umhnak Bawipa kin Pathian ai Puleng siarlo, maitai hibawlhnak le hibawlhnak dang le rong hibawlhnak hrangah puleng pakhat bawn in Bawipa khiah tawngcai tum hrimhrim lo i ing.

³⁰ Ciatihin a tihnak tu suangbawi Phinehas le a hnenai a teltu Israel miphun hotute in za fangin Reuben mi, Gad mi, le nisuah lam Manasseh mi a hrekte vumah ang ngai i.

³¹ Ciafangin Reuben mi, Gad mi le Manasseh mi hnenah suangbawi Eleazar ai fapa Phinehas in, “Bawipa tawng ning cai lo manin Bawipa tu kin hnenah um i, ti ling i ing. Bawipa ai cawhkuan tuar loin Israel mite tu luatruai i si,” tiin ti i.

³² Cen Phinehas le Israel phun hotute tu Gilead ramai a umtu Reuben mi, Gad mite hnenin let tlang ai Canaan ramai umtu Israel mite hnenah ciami thu heh rel i.

³³ Ciami thu za tlang fangin Israel mite tu ang tlang ngai i. Pathian thangphat tlang ai Reuben mi le Gad mite umhnak ram siatsuah tuhin raltho tuh heh rel nawn lo i.

³⁴ Reuben mi le Gad mite in bawnhnak puleng tu “Lingpuitu” tiin ko i; zaimantifangin “Bawipa tu Pathian i, ti khiah kin veksen caah lingpuitu i,” ti i.