Joshua 21 - Zanniat Bible

Levi Mite Ai Khuapuite

¹ Levi hin hotute tu suangbawi Eleazar, Nun ai fapa Joshua le Israel miphun amahte hin ṭen ai hotute hnenah kawi tlang ai,

² Canaan ramai a riahbuk Shiloh ah khiah amahte hnenah, “Moses hnenah Bawipa ai thupehnak bangin kin umhnak hrangah khuapuite le kin sumhnamte hrangah hamhing umhnak ram kin pe tu ve,” tiin ngen tlang i.

³ Amahte ngenhnak bangin le Bawipa ai thupehnak bangin Israel mite in amahte cohnak ram songin khuapui le sumhnam lailenghnak ramte tu Levi mite hnenah pe i.

⁴ Levi mite lakah a hmasaber khuapui pe mite tu Kohath hinte i. Suangbawi Aaron hin senhnak Levi mite tu Judah, Simeon le Benjamin hinte ai ram an khuapuite hlaithum um i.

⁵ A tanghnak Kohath hinte tu Epharaim, Dan le nitlak lam Manasseh hin a hrekte ai ram an khuapuite pahra pe i.

⁶ Cen Gershon mite tu Issakhar, Asher Naphtali le Bashan ai umtu nisuah lam Manasseh hinte ram songin khuapuite hlaithum pe i.

⁷ Merari hinte tu Reuben, Gad le Zebulun hinte ram songin khuapuite hlaihnih pe i.

⁸ Ciatihin Moses hnenah Bawipa ai thupeciahnak bangin camciafung duk in Israel mite in khuapuite le sumhnam lailenghnak ramte khai Levi mite hnenah pe i.

⁹ Judah le Simeon hinte ai khuapuite lakin Levi mi,

¹⁰ Aaron tefate lakai Kohath songkhatte pehnak khuapui tu hemite i. Anite tu a hmasaber in pe i.

¹¹ Judah tlang vum ram Hebron tihnak Kiriath Arba khua le a hiang kimvel ram tu Kohath mi hnenah pe i. Arba tu Anak ai pa i.

¹² Ikhalselai Kiriath Arba khua hiangai lo le khuatenaute tu Jefunneh ai fapa Kaleb pe i.

¹³ Cen suangbawi Aaron ai tefate hnenah pehnak khua (mirektu relhhnak) Hebron khua vumah Libnah,

¹⁴ Jettir, Eshtemoa,

¹⁵ Holon, Debir,

¹⁶ Ain, Juttah, le Beth Shemesh khuate, a hiang sumhnam lenghnak ramte thawn pe i. Judah le Simeon phunte ram songin khuapuite khua kua pe i.

¹⁷ Cen Benjamin hinte ram songin Gibeon, Geba,

¹⁸ Anathoth le Almon khua, khuapuite pali tu sumhnam lailenghnak thawn pe i.

¹⁹ Suangbawi Aaron ai tefa suangbawite hnenah amahte sumhnam lailenghnak ramte thawn a veksen in khuapuite hlaithum pe i.

²⁰ Levi miphun Kohath hinte tu Epharaim hin ram songin khuapuite hrekkhat pe i.

²¹ Amahte pehnak tu Epharaim tlang vum ramai umhnak Shechem khua le a hiang ramte (Shechem khua tu mirektu relhhnak hrang a rilhnak khua i), Gezer khua,

²² Kibzaim khua le, Beth Horon khua, amahte sumhnam lailenghnak thawn a veksen in khuapuite pali i.

²³ Dan hinte hnenin Eltekeh, Gibbethon,

²⁴ Aijalon, le Gath Rimmon, a veksen in khuapuite pali tu sumhnam lailenghnak ramte thawn pe i.

²⁵ Nitlak lamah Manasseh ram hrek songin Taanak le Gath Rimmon khuapuite pahnih tu amahte sumhnam lailenghnak ramte thawn pe i.

²⁶ Ciamanin Kohath hinte in a sumhnam lailenghnak ramte thawn khuapui khua hra co i.

²⁷ Levi hin Gershon mite in nitlak lamai umhnak Manasseh hinte hnenin khuapuite khua hnih co i. Bashan peng ah mi rektu relhhnak khua Golan khua le, Be Eshterah khua, amahte sumhnam lailenghnak ramte thawn co i.

²⁸ Issakhar hin hnenin Kishion, Daberath,

²⁹ Jarmuth, le En Gannim khuapuite, a hiang sumhnam lailenghnak ramte thawn khuapuite khua li co i.

³⁰ Asher hin hnenin, Mishal, Abdon,

³¹ Helkath, Rehob khuapuite, khuapuite pali, a hiangai sumhnam lailenghnak thawn ngah i.

³² Naphtali hin hnenin, Galilee peng ah Kedesh khua (mirektu relhnak khua), Hammoth Dor khua le Kartan khuate, khuapuite khua thum, a hiangah sumhnam lenghnak ram khai ngah tlang i.

³³ Ciamanin Gershon hinte ai ngahhnak khuapuite tu a hiangah sumhnam lailenghnak ram thawn a veksen in khuate hlaithum i.

³⁴ Levi hin thotho Merari mite in Zebulun hnenin Jokneam, Kartah,

³⁵ Dimnah, le Nahalal khuapuite, khuapuite pali, a hiangah sumhnam lailenghnak ram thawn ngah tlang i.

³⁶ Reuben hin hnenin, Bezer, Jahaz,

³⁷ Kedemoth, le Mephaath khuate, khuapuite pali, a hiangai sumhnam lailenghnak ram thawn ngah i.

³⁸ Gad hin hnenin, Gilead ramah Ramoth (mirektu relhhnak khua), le Mahanaim,

³⁹ Heshbon, le Jazer khuate, khuapui pali, a hiangai sumhnam lailenghnak ram thawn ngah i.

⁴⁰ Ciamanin Levi hin Merari mite in a veksen in khuapuite hlaihnih co i.

⁴¹ Israel cohnak ram songin a veksen in khuapuite sawmli le pariat tu Levi mi hnenah pe i.

⁴² Hemi khuapuite hiangah sumhnam lailenghnak ram um sio i.

Israel Mite In Canaan Ram Khur I

⁴³ Bawipa in a pupate hnenah thu a kham cia bangin Israel mite hnenah Canaan ram heh pe ihang. Ram a lang ben sio fangin umhnak khur ai um tlang i.

⁴⁴ Cen a pupate hnenah a thukham cia bangin a ram song le a hiang hmun cangcang ah daphnak um i. Bawipa in nehhnak pe manin a ral zaibang inkhai Israel mite heh neh awng lo i.

⁴⁵ Bawipa in Israel mite hnenah a thukhamhnak hmuahhmuah pakhat khai pelh lo i, a veksen in khim sio i.