Joshua 20 - Zanniat Bible

Ralrelhhnak Khuapuite

¹ Bawipa in Joshua hnenah,

² “Hetihin Israel mite rel tu, ‘Moses hnenah i rel cia bangin mirektu ralrelhhnak khuapuite ril tu ih.

³ Tumhnak perpo zaikhai nai lo ai mi a rek pangtu a um fangin phuzultu hnenin a luatthilhnak tuhin ning rilhnak khuapuite tu amahte relhhnak hmun tuh i.

⁴ Mirektu heh hemi khuapui pakhatkhat ah tlan tuhai khuasong kotka ah com in khua upate hnenah a thula heh rel tuh i. Cia hnuaah khua songah lutruai tuhai a umhnak hmun ruat sah tuh i.

⁵ Phuzul nuamtu in cia khua tian hnawh lekhaw a kut songah mirektu heh pe maseh. Huadunhnak zaikhai nai loin a rek pang imanin khuasong mi in hup tuseh.

⁶ Khuasong mizapui hmaiah a thu a rel hlan song le, cialai ai Suangbawi Sang a thi lai hlanlo, cia khua ah um tu ngio seh. Cia hnuaah a nuam lekhaw a tlanhmun khua ah let tuseh,’ tiin rel tu,” tiin ti i.

⁷ Ciamanin Jordan ai nitlak lamah Naphtali tlang vum ram Galilee peng ah Kedesh khua, Epharaim tlang vum ramah Shechem khua, Judah tlang vum ramah Kiriath Arba (hemi tu Hebron) khua,

⁸ Jordan runpui in nisuah lamah Jericho khua an nisuah lamai umhnak tlangzawl ah Reuben hinte ram Bezer khua, Gad hinte ram song Gilead ah Ramoth khua, le Manasseh hinte ram song Bashan ah Golan khua ril i.

⁹ Hemi khuate tu Israel mite caah ituseh, amahte lakai a umtu ramdang mite caah ituseh, relhhnak tuhin a rilhnak i. Tum perpohnak nai loin a rek pangtu heh he khua ah huphnak ngah tuh i. Ciata ah mizapui hmaiah a thu rel tlang hlanah phuzultu in rek thil tuh lo i.