Joshua 2 - Zanniat Bible

Joshua In Jericho Ah Micultute Hlat I

¹ Cen amahte riahbuk Sittim in micultute pahnih a thupniu in Joshua in hlat ai, “Feh ta tu ilai amahte ram le khuapui Jericho cul ta tu ih,” tiin ruai i. Feh kawm ai Jericho khua a hleng fangin hlotlau nu Rahab inn ah cam kawm i.

² Ciami thu tu Jericho kumpibawi hnenah, “Kin khua le kin ram cul tuhin Israel mite zan ah hleng i,” tiin rel i.

³ Ciafangin Rahab hnenah kumpibawi in mi hlat ai, “Kin ram pumpuhluk cul tuhin hleng ai na inn ah a camtute suah tu,” tiin thupe i.

⁴ Ikhalselai Rahab in Israel mite pahnih tu thup ai kumpibawi hnenah, “I inn ah mi hrekkhat hleng peungai i; ikhalselai akon khua an hleng i ti ling lo ing.

⁵ Khua thim dawn hang ai khuapui kotka a kham banghma fangin feh ngah teu i. Konteng feh tum ti khai ling lo ing; ikhalselai rang ngai in hnawh le i sikhaw man tuh i si,” tiin ti i.

⁶ Rahab in micultute pahnih tu a inn phu ah kaipui ai a tluantluan ai dahhnak hnim kuang lakah thup i.

⁷ Cen kumpibawi ralkapte in khuapua a hleng sawng fangin kotka heh kham i. Jordan runpui hleng tianin ralkapte in hnawh tlang i.

⁸ Israel mite pahnih mitmu hlanah Rahab tu inn phu ah kai ai,

⁹ “Bawipa in hemi ram ning pe zo i ti ling ing. Kin veksen in thin kin lau ze ai kin ram pumpuhluk tu hlawng hlulhhlo i.

¹⁰ Egypt ram an ning suak fangin ning hmai rori ah Bawipa Pathian in Tipui San heh roruai i, ti ling i ing. Ciahlaiah Jordan runpui in nisuah lam Amor miphun ai kumpibawite pahnih Sihon le Og rek i ti za fawn i ing.

¹¹ Ciami thu kin za sawng fangin thin kin lau amam i. Ningmah ning lau manin mi zongzong tha nau tlang sio i. Bawipa ning Pathian tu van ai Pathian i ai laipua ai Pathian khai i.

¹² Ciamanin kai in ningmah heh phatak ngai in ning kilkhawl bangin i innsangte khai kilkhawl tuh ve in le ning thutiamhnak bangin hlun tuhin Bawipa hnenah cukcam in thukham tu ih. Cen rintlak ning ihnak larruaihnak tuhin thukhamdunhnak i pe tu ih.

¹³ I nu le i pa ituseh, i unaute le a songkhatte ituseh, hup tu ilai rek hram mah ih,” tiin ti i.

¹⁴ Ciafangin micultute in, “Kin thukhamhnak bangin bawn hlahle ingkhaw Pathian in kin nunhnak lang tuseh. Kin thil tihnak kin phuang hlahle sikhaw he ram Bawipa in a kin pe fangin kin thukhamhnak heh hlun tuh rori i ing,” tiin ti kawm i.

¹⁵ Rahab ai inn tu khuapui kulhhnak vingpui thawn a zom in sahnak i; Ciamanin a inn dawngkhamniu in rihual thawn sumpua ah hla i.

¹⁶ “Hampalak ah tlan tu ih; ciahlahle kumpibawi ralkapte in ning hmu tuh i. Ning situte let hlanlo, ni thum song relh tu ih. Cia hnuaah ning nuam hmunah feh leh tu ih,” tiin ti i.

¹⁷ Cen micultute pahnih in, “Na thukhamhnak bangin hlun tuh i ing.

¹⁸ Ngai tu! Ning khua kin sim fangin kin hlahnak awng na inn dawngkhamniu ah he ri san khit leh tu. Na pa le na nu, na hmingpate le na pa ai innsangte amahte veksen in na inn ah taikhawm tu sio ih.

¹⁹ Pakhatkhat in na inn in suak ai lampui ah vak in thi pang lekhaw amah mawh tuhai kin sualhnak i tuh lo i; ikhalselai na inn song na hnenai ummi pakhatkhat in tuahmawhhnak tawk lekhaw kinmah mawh tuh i.

²⁰ Ikhalselai kin thil tihnak phuang ai kin engsan lesikhaw kin thukhamhnak in kin awk maseh,” tiin ti i.

²¹ Ciafangin Rahab in, “Ning tihnak bangin lung i khim i,” tiin ti i. Cen Rahab in hla ai anite tu tlan kawm i. Cen rihual san a dawngkham ah khit i.

²² Micultute tu tlang vum hampalak lamah feh ai relh kawm i. Cen kumpibawi ralkapte in amahte ram pumpuhluk ah ni thum song si tlang i. Pakhat khai hmu lo manin Jericho ah let tlang leh i.

²³ Ciafangin micultute pahnih tu tlang vuman zu leh ai runpui a tan hnuaah Nun ai fapa Joshua hnenah tlung kawm ai amahte linghnak thu hmuahhmuah rel kawm i.

²⁴ Anite in, “A ram pumpuhluk in Bawipa in kin pe zo i, tiin sang i ing. Minung veksen in kin thawmvang kin za fangin a thinlau tlang ngaingai i,” tiin ti i.