Biblia Todo Logo
Bìoball air-loidhne

- Sanasan -

Joshua 17 - Zanniat Bible


Nitlak Lamai Manasseh

1 Manasseh tu Joseph ai fapa upa ber imanin Jordan in nitlak lam ram a hrekkhat heh Manasseh ai fapate pe i. Cen Gilead ai pa Machir tu Manasseh ai fapa upa ber i ai ralkap hmingthang i. Ciamanin Jordan in nisuah lamai um Gilead Bashan khai Machir pe i.

2 Cen Manasseh ai tefate Abiezer, Helek, Asriel, Shechem, Hepher le Shemida khai ram zem ve i. Hemi hmuah tu Joseph ai fapa Manasseh tefate i ai hin khat in hotu ṭen i.

3 Ikhalselai Manasseh ai fapa Machir, Machir ai fapa Gilead, Gilead ai fapa Hepher, Hepher ai fapa Zelophehad, Zelophehad in fapa cawi lo ai; fanute lek nai i. A fanute hming tu; Mahlah, Noah, Hoglah, Milcah le Tirzah i.

4 Anite tu suangbawi Eleazar, Nun ai fapa Joshua le amahte hotute hnenah kawi tlang ai, “Kinmah ituseh, kin songkhatte ituseh, a bangvek in ram co tuh ve in Bawipa in Moses hnenah thupe ilo im?” tiin ti i. Ciamanin Bawipa ai thupeciahnak bangin a pa ai unaute lakah amahte covo ram ngah leh i.

5-6 Ciatihin a fapate bang thotho in Manasseh ai fanute inkhai ram co ngah ve manin Jordan runpui ralah Manasseh in Gilead le Bashan hlaiah a hlaihnak ram covo pahra ngah leh i. Gilead ram tu Manasseh ai a dang fapate hnenah pe i.

7 Manasseh ram tu Shechem in nisuah lam Asher in Mikmethath lam hleng i. A ramri tu Mikmethath in hlang lamah zu ai Jashib Entappuah ah hleng i.

8 Tappuah ram tu Manasseh ai i. Ikhalselai ramri hiangai um Tappuah khua tu Epharaim tefate ai i.

9 Ciata in a ramri tu Kanah rawnti tian hleng i. Hemi rawnti in hlang lamai um khuapuite tu Manasseh ai khuapuite lakah um napui Epharaim ai khuapuite i. Manasseh ramri tu cia rawnti sak lam tluan in i ai Mediterranean tifingriat ah tong i.

10 Epharaim ram tu hlang lamah i ai Manasseh ram tu sak lamah i. A ram hnih in nitlak lam ramri tu Mediterranean tifingriat i. Sak lam ah Asher tian, nisuah lamah Issakhar tian kau i.

11 Cen Issakhar le Asher ram songah rin Beth Shean le a hiangai khuate, Ibleam ai a umtute, (ti hiangai umhnak) Dor khua, Endor khua, Taanak khua, Megiddo khua le a hiang ṭen ai um khuate hmuahhmuah Manasseh ai i.

12 Ikhalselai Manasseh mite in cia khuate ai a umtu Canaan mite heh hnawt ben lo manin tun san tian a um tata ihang.

13 Israel mite a thahat ngai fangin khai Canaan mite tu hnawt lo i; ikhalselai Israel mite napertu ah bawn i.


Epharaim Le Manasseh In Ram Ngen Lehsal

14 Joseph ai tefate in Joshua hnenah, “Zaimanin kin co tuhin ram pakhat lek kin pe isi? Pathian in hmuifu kin pe ai minung kin tampui ihang. Ram kau deuh kin kul i,” tiin ti tlang i.

15 Ciafangin Joshua in, “Minung ning tam ai Epharaim tlang vum ram ning caah a fip ze lekhaw Perez ram le Rephaim ramah feh tu ilai a ramai tupui heh ning caah sat tu ih,” tiin ti i.

16 Joseph ai fate in, “Tun kin umhnak tlang vum ram heh kin caah a fip ze rori i. Zawllai ai a umtu Canaan mite in tu thirleng khai nai i. Ciahlaiah Beth Shean le a hiang khuatenau songai a umtu Canaan mite inkhai nai ve ai, Jesreel phairawn ai a umtute inkhai thir siphuhleng nai tlang ṭen i,” tiin ti tlang i.

17 Ciafangin Joshua in Epharaim le nitlak lam Manasseh hinte hnenah, “Minung ning tampui ai hat khai ning hat ngai ihang. Ciamanin covo pakhat tahin tam deuh ngah tuh i si.

18 Tlang vum ram tu ningmah ai cang tuseh. Tupui lek napui sat tu ilai khat lamin a khat lam tian co tu ih. Canaan mite khai thir siphuhleng nai ai hat ngai khalselai hnawt ben tuh thotho i si,” tiin ti i.

Zanniat Bible © Bible Society of Myanmar, 2018.

Bible Society of Myanmar
Lean sinn:



Sanasan