Joshua 16 - Zanniat Bible

Epharaim Le Manasseh Cohnak Ram

¹ Joseph ai tefate hnenah pehnak ramai hlang lam ramri tu Jericho khua hiang Jordan runpui hiang um Jericho cirhti in nisuah lam nelrawn tian i. Cen Jericho in tlang vum ramah Bethel tian feh i.

² Bethel in Luz ah feh ai Archit mite umhnak Ataroth Addar lamah phai i.

³ Ciata in nitlak lamah Japhlet mi ram tian feh ai hlang lam Beth Horon tian hleng i. Cen Gezer ah feh ai a tonghnak tu Mediterranean tifingriat i.

⁴ Joseph ai tefa Manasseh le Epharaim hinte in nitlak lam Manasseh ram co tlang i.

Epharaim

⁵ Epharaim ai songkhatte cohnak ram tu hetihin i. Nisuah lam a ramri tu Ataroth Addar in Beth Horon tian hleng i.

⁶ Ciata in Mediterranean tifingriat tian hleng i. Sak lam ramri tu Mikmethath i. Nisuah lam ramri tu Taanath Shiloh lamah hel ai cia khua a lan hnuaah Janoah tian hleng i.

⁷ Cen Janoah in Ataroth le Naarah ah feh ai Jericho in Jordan runpui ah tawp i.

⁸ Cen nitlak lam ramri tu Tappuah in Kanah rawnti hleng ai ciata in Mediterranean tifingriat ah tawp i. Hemi ram tu Epharaim songkhatte ai cohnak ram i.

⁹ Manasseh ram songai um khuapui le khuatenau thawn Epharaim songkhatte hnenin pehnak sio i.

¹⁰ Ikhalselai Gezer ai a umtu Canaan mite tu hnawt lo i. Ciamanin Epharaim mite lakah tun san tianin um lai i. Ikhalselai sal naper per in um tlang i.