Joshua 14 - Zanniat Bible

Jordan In Nitlak Lamai Ram Zem Dun I

¹ Israel mite langhnak Canaan ram tu suangbawi Eleazar, Nun ai fapa Joshua le Israel miphun hotute in Israel mite hnenah zem i.

² Moses hnenah Bawipa ai thupeciahnak bangin Israel miphunte phun kua le a hrekte ai co tuhhnak Jordan in nitlak lam ram tu camciafung duk in khan tlang i.

³ Jordan in nisuah lam ram tu Moses in Israel miphunte phun hnih le a hrekte hnenah pe zo i; ikhalselai Levi mite hnenah ram pe lo i.

⁴ Joseph ai tesinfate tu hmun hnih in khan i; Manasseh le Epharaim i. Levi mite tu cohnak ram nai lo i. Lai ram hrangah umhnak khuapui nai ai amahte kawlpaw le sumhnam hrangah sumhnam lailenghnak lairam nai i.

⁵ Moses hnenah Bawipa ai thupeciahnak bangin Canaan ram tu Israel mite in zem tlang i.

Hebron Tu Kaleb Pe I

⁶ Gilgal ah Judah mite tu Joshua hnenah kawi i. Kenizmi Jefunneh ai fapa Kaleb in Joshua hnenah, “Pathian ai minung Moses hnenah nangmah le kaimah ai thu Bawipa in Kadesh Barnea tihnak hmunah a relhnak thu tu ling i si.

⁷ Kadesh Barnea in hemi ram cul tuhin Bawipa ai cengfa Moses in i hlat fangin kum sawmli ing. I feh hnua fangin fel ngai in Moses hnenah thu than ing.

⁸ Kaimah thawn a fehtute in mizapui thinlung lauruai sio i. Ikhalselai kaimah in a semkhim in Bawipa Pathian thu heh hlun ing.

⁹ Cen Moses in, ‘Bawipa i Pathian thu tu a semkhim in na hlun manin tunai na fehhnak ram heh nangmah le na fate in co tuh i si,’ tiin ti i.

¹⁰ Cen ruat tucuk ve lai! Ciatihin Bawipa in Moses hnenai a relhnak tu kum sawmli le kum nga ihang. Cialai can ah Israel mite tu nelrawn ah a vak laitak i ai cia songah Bawipa in cak niu in kilkhawl ngio i. Tun i sik tu! Kum sawmriat le kum nga i khim zo i.

¹¹ Ikhalselai Moses ai i hlat lai awng bangpah in i hat lai i. Raltawng tuhin ituseh, a dang ṭuanvo i naihnak ah ituseh, i hat lai i.

¹² Ciamanin cialai ai Bawipa ai i thukhamhnak bangin tunah he tlang vum ram heh i pe tu hram. Anak mi miham ngaingai pawl tu ving kulhhnak khuapui songah um tlang i, ti khiah cialai ah ning rel zo ing. Na hnenah um tuh ing tiin i rel cia bangin i hnenah Bawipa um ngaingai lekhaw cia Anak mite heh hnawt tuh sio ing,” tiin ti i.

¹³ Ciafangin Joshua in Jefunneh ai fapa Kaleb heh hmuifu pe ai a covo ah Hebron khua pe i.

¹⁴ Kenizmi Jefunneh ai fapa Kaleb in Israel ai Pathian Bawipa ai thu fel ngai in a hlun manin Hebron heh tun san tianin Kaleb ai tefate ram ihang.

¹⁵ Ciahlan ahcen Hebron tu Kiriath Arba khua tiin ko awng i. Arba tu Anakim miphun lakai mi thupui ber i. Ciatihin amahte ram tu ral nai loin um i.