Joshua 11 - Zanniat Bible

Jabin Le A Ṭanpuite Neh Tlang I

¹ Israel mite in ral a nehhnak thute tu Hazor kumpibawi pa Jabin in a za fangin Madon kumpibawi pa Johab, Shimron khua kumpibawi, Achshaph khua kumpibawi,

² sak lam tlang vum kumpibawite, Galilee Tili in hlang lamai umtu Jordan phairawn kumpibawite, hlang lam zawllai ai umtu kumpibawite le nitlak lam Dor hiangai kumpibawite thucah i.

³ Cen Jordan runpui kap hnih ai umtu Canaan mite, Amor mite, Hit mite, Perizz mite, tlang vum ramai umtu Jebus mite le Mizpah ram Hermon Tlangham dung ai umtu Hiv mite cah sio i.

⁴ A cahhnak bangin kawi tlang ai amahte ralkap tu tifingriat runsiat zah i. Siphuh le siphuhleng tam roh keng tlang i.

⁵ Hemi kumpibawite in a ralkapte khawm tlang ai Israel tawng tuhin Merom ai umhnak Merom Cirh tihnak hiangah tawk dun tlang i.

⁶ Ciafangin Bawipa in Joshua hnenah, “Lau mah. A veksen in thangha tun camcu ah Israel kut songah na pe tuhai thi tuh sio i. Amahte siphuhte kaiza thari sat tu sio lai a siphuhlengte khai mai in tai sah tu sio,” tiin ti i.

⁷ Ciamanin Joshua le a ralkapte tu ralte mangrinlo lakfangin Merom Cirh hiangah tawng dekdo i.

⁸ Bawipa in nehhnak tu Israel mite kut songah pe ai a tawng fangin sak lamai umtu Sidon le Misrephoth Maim tiang, nisuah lamah Mizpah phairawn tian, ralte heh hnawh tlang i. Minung pakhat khai tang nawn lo tianin rek berh i.

⁹ Bawipa ai thupeciahnak bangin Joshua in amahte siphuhte kaiza thari sat ai amahte siphuhlengte khai mai in tai sek i.

¹⁰ Cen Joshua tu let ai Hazor khua neh le a kumpibawi khai rek i. Cia san ah Hazor khua kumpibawi tu kumpibawi ukhnak lakah huhamnaiber i.

¹¹ Hazor khuasong mite tu pakhat khai tang loin rek berh ai amahte khuate khai mai in tai sek i.

¹² Cia hiangai kumpibawite le a khuapuite hmuah heh Joshua in neh sio i. Bawipa ai cengfa Moses thupeciahnak bangin Joshua in rek berh i.

¹³ Ikhalselai mual cikniu vumah tohhnak khua lakah Joshua ai mai taihnak Hazor khua siarlo khuapui dang pakhat khai Israel mite in mai in tai lo i.

¹⁴ Hemi khuapuite songin amahte longhnak thil mankhung le sumhnam hmuahhmuah heh Israel mite in amahte caah lang sek i. Ikhalselai minung hmuahhmuah rek tlang sek i; pakhat khai luat lo i.

¹⁵ Bawipa Pathian in a cengfa Moses hnenah thupeciahnak ai Moses in Joshua hnenah thupe awng i; ciami thupeciahnak bangin Joshua in hlun sio i. Moses hnenah Bawipa thupeciahnak bangin Joshua in bawn sio i.

Joshua In Ram Pumpui Neh I

¹⁶ Ciami ram tu Joshua in neh sio i; tlang vum ram, Negev ram hmuahhmuah, Goshen ram hmuahhmuah, nitlak lam ram tlangham, Jordan phairawn, Israel ram songai tlang vum ram le zawllai ramte,

¹⁷ Sair ram lamai fehhnak Halak tlang in Hermon Tlang hnia ai a umhnak Lebanon phairawn ram songai Baal Gad tian neh sio i. Hemi ramai kumpibawite heh a pom hnuaah vit ai rek i.

¹⁸ Can raipui he kumpibawite heh tawng i.

¹⁹ Gibeon khua ai a umtu Hiv miphun siarlo, kon khua inkhai Israel mite thawn rualremhnak thukham bawn tlang lo i. A veksen in tawng dun hnuaah nehhnak lek i.

²⁰ Ninghiohnak zaikhai um loin rek berh le siatsuah tuh sek in amahte thinlung heh Israel mite tawng tuhin Bawipa in khoruai i. Ciatihin bawn tuhin Bawipa in Moses thupeciahnak awng zo i.

²¹ Cia can ah tlang vum ramai umtu; Hebron khua, Debir khua, Anab khua le Judah le Israel tlang vum ramte ai a umtu, mi ham ngaingai Anak mite tu Joshua in rek berh i. A minungte tu cihmit ruai hlaiah khuapuite khai siatsuah sek i.

²² Israel ram songah Anak mi pakhat khai tang nawn lo i. Ikhalselai Gaza, Gath le Ashdod khua ahcen a tlawmniu tang lai i.

²³ Bawipa in Moses hnenah thu a pe cia bangin ciami ram pumpuhluk heh Joshua in neh sio i. Cen cia ram heh Joshua in amahte cohnak ro cang tuhin Israel mite hnenah pe i; Israel miphun zah in ram heh khan tlang ai ram khat ṭen in pe i. Ciatihin amahte ram tu ral nai loin um i.