Joshua 10 - Zanniat Bible

Amor Mite Neh Tlang I

¹ Joshua in Jericho khua hnawmcan sio ai a kumpibawi khai a rek bangin Ai khua khai hnawmcan ai a kumpibawi khai rek i, ti khiah Jerusalem kumpibawi Adonizedek in za i. Cen Gibeon mite in Israel mite thawn remhnak bawn ai amahte lakah um i ti khai za fawn i.

² Gibeon khua tu a dang khuapui tluk in lian ai Ai khua tahin lian sawn i. Amahte ralkap khai ralpha ngaingai manin Jerusalem mite thinlau tlang ngai i.

³ Ciamanin Jerusalem kumpibawi Adonizedek in Hebron kumpibawi Hoham, Jarmuth kumpibawi Piram, Lakhish kumpibawi Japhia le Eglon kumpibawi Debir hnenah thucah i:

⁴ “Gibeon mite in Joshua le Israel mite thawn remhnak thukham bawn tlang zo hang manin Gibeon mite tawng i bawm tu ih,” tiin ti i.

⁵ A cahhnak bangin Amor miphun kumpibawite panga: Jerusalem, Hebron, Jarmuth, Lakhish, le Eglon khua ai kumpibawite tu amahte ralkap veksen thawn hmunkhat in taikhawm ai Gibeon khua kulh ai tawng tlang i.

⁶ Ciafangin Gibeon mite in Israel mite riahbuk Gilgal ai ummi Joshua hnenah, “Bawipa, kin zangtak malaw. Rang ngai in kawi tulai kin bawm tu. Tlang vum ramai ummi Amor kumpibawite kom in kin sim ihang, Kin o tu hram law,” tiin bawmhnak ngen tlang i.

⁷ Ciamanin Joshua le a ralkapte tu, a ralkap a pha ber pawl thawn Gilgal in feh tlang i.

⁸ Cen Bawipa in Joshua hnenah, “Na thin lau mah. Nehhnak na pe zo ing. Aisu inkhai na tawngbentu um tuh lo i,” tiin ti i.

⁹ Joshua tu Gilgal in Gibeon tian zankhuavar feh ai mangrinlo in a ralte heh tawng i.

¹⁰ Israel ralkapte a hmu fangin a ralte khiah thinlau tuh sek in Bawipa Pathian in bawn i. Ciafangin Israel ralkapte in Gibeon khua ah ralte rek diamdo i. Cen Beth Horon tlangkawn in hnawh ai Azekah le Makkedah khua tianin rek kong betbo i.

¹¹ Ciahlaiah Israel ralkapte lau in Beth Horon tlangkawn in Azekah khua tian a tlan laiah van in Bawipa in bokbawn tiatia rial tlaruai ai tampui thi i. Rial tlahnak in a thimi heh Israel ralkapte ralvang thawn rekhnak tahin tam sawn i.

¹² Pathian bawmhnak in Israel mite in Amor mi a neh nia ah Israel mite zak rori ah Joshua in hetihin au i: “Maw Ninu, Gibeon khua vumah ding tu law; Maw Hlapa, Aijalon Horkuam vumah com tu law,” tiin ti i.

¹³ A ti bangin Israel mite in amahte ral a neh hlanlo ni ding ngio ai hlapui khai com rori i. Hemi thu heh Jashar laibu songah ngan tlang i. Ni tu feh nawn loin van laiteng ah ni khat pumpalah com i.

¹⁴ Cia nia bangin, Pathian in Israel mite ṭan ai Bawipa in minung thu a ngai can, laivum hampan in um awng kel lo i. Bawipa tu Israel lam ṭang in raltawng ve i.

¹⁵ Cen Joshua le a ralkapte tu a riahbuk Gilgal ah tlung tlang i.

Joshua In Amor Kumpibawite Panga Pom I

¹⁶ Kumpibawite panga tu tlan ai Makkedah lungkhukua ah relh tlang i.

¹⁷ Ciata ah a relh khiah ling fangin Joshua hnenah rel tlang i.

¹⁸ Joshua in, “Ciami Lungkhukua ka ah lungto lian puipui pum tu ilai a kiltu dah tu ih.

¹⁹ Ikhalselai ning tu cia hmunah um mah ih; ralte hnawh tu ilai a hnua lamin rek kong tu betbo ih; aisu khai amahte khuapui song hleng tlang maseh. Bawipa ning Pathian in ning kut songah ning pe zo sek i,” tiin ti i.

²⁰ Joshua le a ralkapte in ralte tu rek kong betbo ai neh sio i. A rek lohnak pakhat pahnih dung in a khuapui vingkulh song hleng ben ai ciamite tu rek lo i.

²¹ Cen a ralkapte tu Joshua hnen a riahbuk Makkedah ah himniu in hleng tlang sio i. Cia hnuaah Israel mite vumah aisu inkhai zaikhai pong ngam nawn lo ihang.

²² Cen Joshua in, “Lungkhu kua ka hong leh tuhang ilai kumpibawite panga heh i hnenah suahpui tu ih,” tiin ti i.

²³ A ti bangin bawn tlang i. Jerusalem khua kumpibawi, Hebron khua kumpibawi, Jarmuth khua kumpibawi, Lakhish khua kumpibawi le Eglon khua kumpibawite ciah suahpui i.

²⁴ Cia kumpibawite Joshua hnenah a hleng tlang fangin Joshua in Israel mite hmuahhmuah ko ai amah thawn raltawngtu a kuthnia tlangsuakte khiah, “Heta ah kawi tu ilai he kumpibawite ai hawng khiah ning ke in fon tu ih,” tiin ti i. A tihnak bangin kumpibawite hawng ciah fon tlang i.

²⁵ Ciafangin Joshua in anite hnenah, “Thin lau mah ilai ning tha khai nau mah ih. Hat ngai in ralpha ngai in um tu ih, zaimantifangin ning ralte vumah Bawipa in hetih bangin bawn tuh sio i,” tiin ti i.

²⁶ Cia hnuaah Joshua in kumpibawite tu rek berh ai amahte luang heh thingkungte kung nga ah tar tlang i. Ciatihin zan lam tian tar i.

²⁷ Ni tla fangin Joshua ai thupehnak bangin ciami luangte heh lang ai a hlanai amahte relhhmun lung khukua songah lon i. Cia lungkhukua ka ah lungto lian puipui pum ai cia lung pumhnak heh tun san tianin um lai i.

Joshua In Amor Ram Tampui Lang I

²⁸ Cia nia ah Makkedah khua heh Joshua in tawng in neh ai a kumpibawi khai pom lio i. A kumpibawi le a khua songmi veksen in pakhat khai tang loin rek berh i. Jericho kumpibawi vumah a bawn bang thotho in Makkedah kumpibawi vum ahkhai bawn i.

²⁹ Cia hnuaah Joshua le a ralkapte tu Makkedah in feh ai Libnah khua tawng i,

³⁰ Pathian in nehhnak a pe bangin Israel mite in cia khua le amahte kumpibawi pa khai neh i. Khua song mite tu pakhat khai tang loin vang in sat sio i. Jericho kumpibawi vumah a bawn bangin Libnah kumpibawi khai bawn i.

³¹ Cia hnuaah Joshua le a ralkapte tu Libnah in Lakhish ah feh i. Lakhish heh kulh ai tawng tlang i.

³² Pathian in Israel mite hnenah nehhnak pe ai Lakhish khua tu ni hnihhnak nia fangin neh i. Libnah mite a rek berh bangin Lakhish khua mite khai pakhat khai tang loin rek berh i.

³³ Cen Gezer kumpibawi Horam tu Lakhish khua bawm tuhin kawi napui Joshua in neh ai amah le a ralkapte heh pakhat khai tang loin rek berh i.

³⁴ Cia hnuaah Joshua le a ralkapte tu Lakhish in Eglon ah feh tlang i. Eglon khua khiah kulh ai tawng tlang i.

³⁵ Cia nia thotho ah lang ai Lakhish khua a bawn bangin Eglon khua mite khai pakhat khai luat loin vang in rek berh i.

³⁶ Cia hnuaah Joshua le a ralkapte tu Eglon in Hebron ah feh tlang ai tawng i.

³⁷ Hebron khua lang ai a kumpibawi rek ai a khua songmi hmuahhmuah le a hiang khua mite khai rek berh i. Hebron heh siatsuah sek i. Eglon khua a bawn bangin Hebron khua song ahkhai mi pakhat khai tang loin rek berh i.

³⁸ Cia hnuaah Joshua le a ralkapte tu Debir khua lamah her ai Debir khua tawng i.

³⁹ A kumpibawi pom lio ai cia khua le a hiang khuate khai lang i. A minung veksen in rek berh i. Hebron le Libnah khua mite le a kumpibawi a rek berh bangin kumpibawi le Debir khua mite khai pakhat khai zuah loin rek berh i.

⁴⁰ Ciatihin cia hiang ram pumpalah Joshua in neh sio i. Tlang vum ram le Negev nelrawn ram ituseh, zawllai ram le tlangtluan ram ituseh amahte kumpibawite thawn neh sio i. Israel ai Bawipa Pathian ai thupeciahnak bangin minung pakhat tal khai luat loin rek berh i.

⁴¹ Joshua in hlang lam ram Kadesh Barnea in tipui kamai um Gaza tian, Goshen ram hmuahhmuah le sak lam ramai Gibeon tianin neh sio i.

⁴² Israel ai Pathian Bawipa in Israel mite ṭanpui manin he ram hmuahhmuah le a kumpibawite khai vaikhat raltawnghnak ah Joshua in neh sio i.

⁴³ Cia hnuaah Joshua le a ralkapte tu a riahbuk Gilgal ah let tlang i.