Joshua 1 - Zanniat Bible

Canaan Ram Neh Tuhai Pathian Thupehnak

¹ Bawipa ai cengfa Moses a thi hnuaah Moses bawmtu, Nun ai fapa Joshua hnenah Bawipa in,

² “I cengfa Moses tu thi zo i. Nangmah le Israel mite veksen in ralring tu ilai Jordan runpui tan tuhai i pe tuhhnak ramah feh tu ih.

³ Moses hnenai i rel cia bangin ning feh tuhhnak ram hmuahhmuah heh ningmah i miphunte hnenah ning pe zo ing.

⁴ Ning ram tu hlang lam nelrawn in sak lam Lebanon tlang tian, nisuah lamah Euphrates runpui in Hit ram hmuahhmuah le nitlak lamai Mediterranean tifingriat tian tuh i.

⁵ Na nunsong hmuahhmuah ah aisu inkhai na neh tuh lo i. Moses hnenai i um awng bangin na hnen ahkhai um tuh ve ing. Zaikom inkhai na hlum tuh lo ai na hnuaphnal tuh lo ing.

⁶ Hat ngai le ralpha ngai in um tu, zaimantifangin ning pe tuh ing tiin ning pupate hnenah i thukhamhnak he ram ning lang fangin Israel mite tu nangmah in konghoi tuh isi.

⁷ Moses ai na pehnak thukham heh a khim ngai in hlun tuhin hat ngai le ralpha ngai in um tu. Thukham a cik ber tian ngulsul loin hlun tulai na feh hmuncang ah lam na tluang tuh i.

⁸ Thukham laibu tu hai hrimhrim mah. A songai nganhnak bangin na nung thil tuhhnak ah sun le zan in siar tu ṭio. Ciatihin bawn lesikhaw na khangso tuhai na bawnhnak hmuahhmuah ah hlawh na tling tuh i.

⁹ Hat ngai le ralpha ngai in um tu ti ai i thupeciahnak heh zaikom inkhai hai mah. Lau mah, na thinnau mah; zaimantifangin Bawipa na Pathian kaimah in na feh hmuncang ah na umpui tuh ing,” tiin ti i.

Mipui Hnenah Joshua In Thupe I

¹⁰ Cen Joshua in Israel mite konghoitute tu,

¹¹ “Ning riahbuk ṭen ah feh tu ilai ‘Ning aih tuh le ning din tuh ralring tulep ih, zaimantifangin ni thum songah Jordan runpui tan tuhai Bawipa ning Pathian ai a ning pehnak ram co tuh ihang i si,’ tiin rel tu ih,” tiin thupe i.

¹² Joshua in Reuben mi le Gad mi le Manasseh mite a hrek hnenah,

¹³ “Bawipa ai cengpa Moses ai ning relhnak ‘Bawipa ning Pathian in ning khua le ram hrangah he ram heh ning pe ihang,’ a tihnak hih tu ih.

¹⁴ Ning nupuite, ning fanaute le ning sumhnam hmuahhmuah thawn Moses ai a ning pehnak ram, Jordan in nisuah lamah um tu ih; ikhalselai ningmah lakai ralkapte hmuahhmuah ning phunpui Israel mite caah raltawng tuhin hmaiah nor tuhai Jordan runpui tan tuh i si.

¹⁵ Bawipa ning Pathian ai a ning pehnak he ramah Israel ning unaute in umhnak a khuar ben fangin Bawipa ai cengpa Moses ai ning pehnak Jordan runpui in heta nisuah lamah ningmah khai let tuhai ning ramah um tlang tuh i si,” tiin ti i.

¹⁶ Ciami a za fangin anite in, “Na ruaihnak hmuahhmuah bawn tuhai na kin hlathnak cangcang ah feh tuh i ing.

¹⁷ Moses ai thu kin hlun bang thotho in na thu hlun tuh i ing; Bawipa na Pathian tu Moses hnenai a um awng bangin na hnenah um tu hram seh.

¹⁸ Aisu khai na thu a eltu le a hlun lotu in rekhnak tuar tuh i. Hat ngai le ralpha ngai in um tu,” tiin Joshua khiah ti tlang i.