Jonah 1 - Zanniat Bible

Jonah In Pathian Thu Ngai Lo I

¹ Nikhat nia ah Amittai ai fapa Jonah hnenah Bawipa in hetihin rel i.

² “Tho tulai a thawmlian ngai khuapui Nineveh ah feh ta tulai a sual zia phuang tu. A phat lo zia heh kaimah in hmu sio ing,” ti i.

³ Ikhalselai Jonah tu Pathian hnenin tlan tuhin Tarshish khua ah feh tum i. Joppa khua ah feh ai ciata ah Tarshish feh tuh lawng pakhat hmu i. Lawng to man pe ai Bawipa ai hmuh ban lohnak Tarshish khua ah feh tuhin lawng vumah kai i.

⁴ Ikhalselai Bawipa in khuahupui a roh ngai in zuangruai ai tifingriat vumah tilep roh ngai in tho ai amahte lawng khiah khoi dawn sio i.

⁵ Lawng naṭuantute thinlau tlang ngai ai amahte khuavang hnen ṭen ah hehlaw tiin sawngen tlang dekdo i. Cen amahte lawng thil phurhnak zang deuh tuseh tiin thilri tampui ti songah lon tlang i. Cialak ah Jonah tu hniata khan ah mitmu hiar i.

⁶ Lawng bawipa kawi ai, “Zaibang minung isi, mitmu ang menma si? Tho tulai na khuavang hnenah sawngen hlah sim! Na khuavang in pai siang loin kin o thaipang nakhaw!” tiin ti i.

⁷ Cen hnuataber ah lawng naṭuantute in, “Kawi tu ih, hetlukin bawng kin sia heh aisu man ini, camciafung duk tuh ising,” tiin ti tlang i. Camciafung khiah duk tlang ngaingai ai Jonah in duk ngah lio i!

⁸ Ciafangin a hnenah, “Hetluk bawng kin sia heh aisu man ini kin rel tucuk!? Ziang per isi? Akon ram an kawi isi? Ziang miphun isi?” tiin zawt dekdo i.

⁹ Jonah in a hnenah, “Hebrew mi ing ai tifingriat le laivumpui a bawntu vancung Pathian Bawipa a biatu ing,” tiin ti i.

¹⁰ Cen Jonah in Pathian hnenin a tlan thu a rel fangin lawng naṭuantute tu lau amam ai, “Zaimanin he bangtluk bawn isi?” tiin hau dekdo i.

¹¹ Cen anite in, “Khuahu dap thai tuhin zaitin na ti tuh i ing?” tiin zawt i. Zaimantifangin khuahu roh amam i!

¹² Ciafangin Jonah in, “Khuahu dap thai tuhin i lon tu ilai khuahu dap tuh i. Hetihin khuahu roh ngai a zuang heh kaimah manin i ti ling ing,” ti i.

¹³ Lawng naṭuantute in laipua lam feh tuhin cawk thliahthlo napui tilep tu roh amam manin ti ben hrimhrim lo i.

¹⁴ Hnuavai fangin Bawipa hnenah au ai, “Aw Bawipa, he minung pakhat manin kin veksen in kin boruai siang hram malaw. Mawh nai lo thisan kin vumah tla tuh loin ning kin hio tu law, Aw Bawipa, nang in na daih bangin zaizongza heh cangruai isi,” tiin sawngen tlang i.

¹⁵ Cia hnuaah Jonah khiah dang ai tifingriat songah lon tlang i; cen tilep ciah dap sungso i.

¹⁶ Ciafangin lawng naṭuantute in Bawipa khiah lau tlang ngai ai hibawlhnak a sel hnuaah amah ruaih tuhin thukham dun i.

¹⁷ Bawipa in Jonah thontu tuhin ngapui ruai ai Jonah khiah ngapui pum songah ni thum le zan thum song um i.